Psalmy 112
112
[111-r.s.] 1Alliluia.
Bahtaló isyn manúš, Savó daréla Rástyr-Devléstyr, Savó bahtaljola zoralés Léskire priphenybnendyr. 2Léskire čhavé dživéna mištés pe daja phuv, a čačipnaskire ródy, so javéna duredýr, javéna bahtalé. 3Mištypén i barvalypén javéna dro léskiro kher i léskiro čačipén jačélape pe saré viéki. 4Dud (svéto) ĥazdélape dro kalypén (ciamlypén) vaš čačipnaskirenge, i kadavá manúš isyn lačhé-dieskiro i čačipnáskiro, i jov tanginela lačhé manušén. 5Lačhó manúš i déla pe patýv lové lénge, jov lydžála péskire réndy pir Zakóno. 6Pal-dová so jov na peréla, čačipnaskire manušés javéna ŭsády (sak) te ripirén. 7Jov na javéla te darel čoré malvendyr, dro léskiro iló isyn zoraló patiaibén dre Raste-Devléste. 8Léskiro iló isyn tvardo, jov na daréla, paka jov dykhéla vergén, so jone isyn tel ĥerá. 9Jov rozdyja saró iléstyr, jov dyjá odolénge, konéste isyn trébima, léskiro čačipén usady (sak) jačélape: léskiri zor usá butýr skedéla patýv. 10Fuj manúš javéla te dykhél i léskiro iló javéla te kaljol; jov javéla te skriežynel dandenca i te našavel zor; a dová, so jov užakirdia, xasjola krig.
Currently Selected:
Psalmy 112: ROMBALTR
Highlight
Copy
Compare
Share
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
