Matfiejo 7
7
Pal Sendiakiriben
1Na sendinén, i tumen na javéna te sendinén, 2pal-dová so, syr tumé sendinena, adiáke-pac' i tumen javéna te sendinén; savé mierasa tumé mierinena, dasavé-pac' mierasa tumen javéna te mierinen. 3Sóske tu dykhésa pe tykny phusinka dre jakh tyré pšaleskiri, a baró berno na dykhésa dre péskiri jakh? 4Ci, syr tu phenésa pšaléske peskireske; ‘de, me vylava phusinka tyré jakhatyr; a berno isyn dre tyrí jakh? 5Dujemuitko, vyle angledýr berno péskire jakhatyr, tedy dykhésa, syr te vyles phusinka tyré pšaléskire jakhatyr. 6Na den dová, so isyn svénto, džuklenge, na čhurdén mutinia (žemčugi) angíl balyčende, sob (kaj) jone te na štakiren len ĥerénca, i te na risjon, i te na roskušen tumen.
Mangén, Rodén i Marén dro Vudár
7Mangén, i javéla dynó tuménge; rodén, i lathéna; marén dro vudár, i psiravena (otphandena) tuménge. 8Pal-dová so kažno, kon mangéla, doreséla péskiro; kažno, kon rodéla, lathéla; kažnonéske, kon marela dro vudár, javéla psirado (otphandlo). 9Ci isyn vari-kon tuméndyr, kóli léskiro čhavó mangéla léstyr maró, te del čhavéske bar? 10I kiéli mangéla mačho, te del léske sapes? 11Kóli tumé san nalačhé, i džinéna te kerén lačhipén péskire čhavénge, pe kicý butýr tuméndyr tumaró Bolybnáskiro Dad keréla lačhipén odolénge, savé mangena Léstyr. 12Kerén dová javirénge, so tuménge isyn pir iló, sob (kaj) i javír te kerén tuménge; Zakóno i proróki sykliakiréna davá-pac'.
Ciasno Pórta
13Zadžán dro ciasno (tango) pórta, pal-dová so buĥly isyn pórta i otphandlo isyn drom, savó lydžála dro xasiakiriben, i but džána dro davá vudár. 14Pal-dová so ciasno isyn pórta i nabuĥlo isyn drom, savó lydžála dro džiibén, i nábut lathéna les.
Kašt (Drévo) i Léskire Barjakirdé
15Rakhénpe xohané prorokendyr, savé javéna ke ame dre bakrany ídia, ne andrál jone isyn xoliamé ruvá; 16tumé ĥaljona len pir léngire barjakirdé. Ci skedéna dylyné čarjatyr vinagrado (drakh) ci inžyro kodriljostyr (diedoŭnikostyr)? 17Adiáke-pac' kažno lačhó kašt déla lačhé barjakirdé (plódy) i dylynó kašt déla dylyné barjakirdé. 18Lačhó kašt na moginéla te del dylyné barjakirdé, i dylynó kašt na déla lačhé barjakirdé. 19I kažno kašt, so na déla lačhé barjakirdé, čingirena telé i čhurdena dre jag. 20Adiáke pir léngire barjakirdé tumé ĥaljona xohané prorokén.
Dyvés, Kiéli Javéla Séndo
21Na kažno, savó rakiréla Mánge: ‘Dévla, Dévla!’ – zadžála dro Kralipén dro Bolybnáskiro Rajo; ne kodová, savó keréla pir vólia Miré Dadéskiri, Savó isyn dro Bolybnáskiro Rajo. 22But manušá phenéna Mánge dro dová dyvés, kiéli javéna te sendinén: ‘Dévla, Dévla! Ci na Tyré lavésa ame angilphendiam? Ci na Tyré lavésa ame vytradasas nalačhé dúhi? Ci na Tyré lavésa but dívy kerasas?’ 23Tén'ci Me phenáva lénge: ‘Me nikieli na džindjom tumen; džán krig Mándyr tumé, savé keréna čoripén.’
Rázna Kherá
24Kažno, kon šunéla lavá Miré i kandéla len, isyn syr god'varó manúš, kon čhudiá péskiro kher pe bar. 25I giné bryšynda, i ĥazdynépe réki (leniá), i lyné te phurdén balvalia, i saró pyjá pe davá kher; i jov na pyjá, pal-dová so sys čhudó pe bar. 26Ne kažno, kon šunéla lavá Miré, i na kandéla len, isyn syr balvalitko manúš, kon čhudiá péskiro kher pe práho; 27i giné bryšynda, i ĥazdynépe réki (leniá), i lyné te phurdén balvalia, i saró pyjá pe davá kher. I pyjá kher, i rospyjape sarésa.’”
Isusóskiro Pravo
28I sys adiáke: kiéli Isúso končyndia dalé lavá, manušá divindlépe Léskire sykliakiribnastyr, 29pal-dová so Jov sykliakirdiá, syr Odová, Savéste isyn pravo, a na syr lylvarítka.
Currently Selected:
Matfiejo 7: ROMBALTR
Highlight
Share
Copy
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
