Matfiejo 13
13
Primiéro (Sykaibena) pal Sieinybnaskireste
1Dro dová-pac' dyvés Isúso gijá javrí kheréstyr i sys beštó pašýl mórjo (derjáv). 2I skedynépe pašýl Léste but manušá, paldavá jov gijá andré bárka i sys beštó, a saré manušá sys terdé pe brégo. 3I rakirdiá lénge but sykliaibnytkone primierenca, rakirí: “Ake, sieinybnaskiro gijá javrí te čhuvél ziárka dre phuv: 4i, syr jov sieindia, vari-savé ziárki pyné pašýl drom, i privurniandyne čirikliá i shane len; 5ne javír ž pyné pe baruné štéty, kaj na sys but phuv, i jekhátyr (srázu) giné upré, pal-dová so phuv na sys xor, 6a syr uštyjá kham, šut'kirdia len; pal-dová so, syr na sys lénde kórni (rukhá), jone zašutine; 7ne javír pyné dre xrústy suv'jenca, i vybarija čar i zamardiá len; 8i javír pyné pe lačhí phuv, i dyné pribaripen dre šel móly, javír dre šovdešá, i javír dre trijánda. 9Konéste isyn kaná, mek te šunél.”
Savó Smyslo isyn dre dalé Primiery (Sykaibena)?
10Tén'ci sykliaibnýtka giné pašyledýr i phendlé Léske: “Sóske Tu rakirésa lénca primierienca (sykaibnenca)?” 11I Jov otphenélas lénge: “Tuménge isyn dynó te džinén garadó čačipén pal Kralipén dro Bolybnáskiro Rajo, a lénge na dynó; 12kodoléske, savéste isyn, javéla dynó i javéla léste but but, a konéste nane, kodolestyr lélape krig kodová nábut, so isyn léste. 13Paldavá Me rakiráva lénca primierenca (sykaibén), pal-dová so, syr jone dykhí, na dykhéna, i šuny, na šunéna, i na ĥaljona; 14i spolninelape pe lénde angilphenybén Isajoskiro, savó rakiréla: ‘Javéna te šunén kanenca, i na ĥaljona; te dykhén jakhénca, i na dykhéna; 15pal-dová so adalé manušéngiro iló kaštalyja, i jone šunéna fujes péskire kanenca i jakhá péskire zakerde, sob (kaj) te na dykhén jakhénca, i te na šunén kanenca, i te na ĥaljon ilésa, i te na risjon ke Me, sob (kaj) Me te vysastiakirav len.’ 16Tumaré ž jakhá isyn bahtalé, so dykhéna, i kaná tumaré, so šunéna, 17Čačes, Me rakiráva tuménge: but proróki i čačuné manušá kamlé drieván te dykhén dová, so tumé dykhéna, i na dykhné, i te šunén dová, so tumé šunéna, i na šundlé.
Isúso Piriphenela Primiéro (Sykaibén) pal Sieinybnaskireste
18Paldavá šunén, pal so isyn kadavá sykaibén (primiéro) pal sieinybnaskireste. 19Kiéli vari-kon, kon šunéla lav pal Devléskiro Kralipén, i na ĥaljola, tedy javéla nálačho i čorela léskire iléstyr kodová, so sys počhudo: kadasavó manúš isyn sýrby ziárka, saví sys čhudý pašýl drom. 20Ne savé sys čhudé pe baruné štéty, sykavéna manušés, savó šunéla lav, priléla les jekhátyr (srázu) dro iló radymása; 21ne syr davá lav na zadžála xor dro iló i patiaibén isyn krotko, tedy, kiéli javéna mén'ki i tradypen pal lav, jekhátyr jov mekéla te patial. 22Ne savé sys čhudé dre dylyny čar, sykavéna kodolés, savó šunéla lav, ne viekoskiri sujéta, tyrdypén ke barvalypén pirizorjakirena dro léngiro iló, i jov jačéla bi barjakirdeskiro. 23Ne savé sys čhudé pe lačhí phuv, sykavéna manušés, savó šunéla lav i ĥaljola les, jone déna barjakirdeskiro (plodoskiro) i pribaripen jekh dre šel móly, javír dre šovdešá, ne javír dre trijánda móly.”
Primiéro (Sykaibén) pal Dylyny Čar
24Javír sykliaibnýtko sykaibén rosphendiá Isúso manušénge, rakirí: “Kralipén dro Bolybnáskiro Rajo isyn sýrby manúš, savó čhudiá lačhí ziárka pe péskiri félda. 25Kiéli manušá sys suté, javdiá vérgo i čhudiá dylyny čar maškír giv i gijá krig. 26Ne kiéli lačhí ziárka ŭzgija i dyjá pribaripen, dylyny čar adiáke-pac' sykadyjá. 27I xuláskire pishárja javné i phendlé léske: ‘Rajo, tu ž čhudián lačhí ziárka pe félda? Katýr lyjape dylyny čar?’ 28I jov otphendiá lénge: ‘Vérgo manúš kerdiá davá.’ Léskire pishárja rakirna léske: ‘Kóli kamésa, ame džása i vykedasa len javrí.’ 29Jov rakírla: ‘Nad, sob (kaj) te na vyriskiren khetané dylyné čarjasa giv, syr tumé javéna te vyriskiren javrí dylyny čar. 30Mek te barjon khetané ke sčhinyben; i dro časo, syr te sčhinen, me phenáva žniecenge: ‘Skedén angledýr dylyny čar i phanden len dre pučki, sob (kaj) te xačkirén; a giv te skedén dre Mirí šúrna.’”
Primiéro (Sykaibén) pal Garčyčno Ziárka
31Javír sykliaibnýtko sykaibén rosphendiá Isúso lénge, rakirí: “Kralipén dro Bolybnáskiro Rajo isyn sýrby garčyčno ziárka, saví manúš lyjá i počhudia pe péskiri félda, 32joj isyn tyknedýr saré ziarkendyr, ne kiéli vybarjola, jačélape baredýr saré javire xrustendyr i jačélape syr kašt, adiáke so čirikliá bolybnýtka khuvena gniázdy (kúfy) dre léskire randiá.”
Primiéro (Sykaibén) pal Droždžy
33Javír sykliaibnýtko primiéro rosphendiá lénge Isúso: “Kralipén dro Bolybnáskiro Rajo isyn sýrby droždžy (rožčyna), savé džuvlý lyjá i zamiešyndia dre viadra (nemra) jaržesa, paka saró xumer (ciasto) jaciá šutlo.” 34Ake, saró Isúso phendiá manušénge primierenca (sykaibnenca); i nisó Jov na rakirdiá lénge bi primierengiro, 35sob (kaj) te spolninélpe, so sys phendló pir prorokoste: “Me otkerava uštá Miré dre primiery (sykaibena); vyphenava dová, so garadó odoléstyr, syr svéto sys sozdynó.”
Isúso Piriphenela Primiéro (Sykaibén) pal Dylyny Čar
36Tén'ci Jov mekciá manušén i gijá dro kher. I podginé ke Jov sykliaibnýtka Léskire i phendlé: “Piriphen aménge primiéro (sykaibén) pal dylyny čar pe félda.” 37I Jov phendiá dro otphenybén: “Kon sieinela (čhuvéla) dre phuv lačhí ziárka isyn Čhavó Manušéskiro; 38félda isyn svéto; lačhí ziárka-davá isyn čhavé Kralipnaskire, kaj xulainela Devél; dylyny čar-davá isyn čhavé nalačheskire, 39vérgo, savó počhudia len-davá isyn nálačho, sčhinyben-davá značynéla viekoskiro kónco (jagóro), žniecy isyn Jangóly. 40Paldavá, syr vykedena dylyné čarjá i shačkirena jagása, adiáke-pac' javéla dro viekoskiro kónco (jagóro): 41bičhavéla Čhavó Manušéskiro Péskire Jangolen, i skedéna Léskire Kralipnastyr saró, so zlydžala manušén ke grého, i sarén, kon keréla na pir Zakóno; 42i čhurdena len dro bov jagása; odój javéla roibén i dandengiri skriežyma. 43Tén'ci patiaibnytka javéna te ziainen syr kham dro léskire Dadéskiro Kralipén. Konéste isyn kaná, mek te šunél.
Primiéro (Sykaibén) pal Garady Drógima
44Kralipén dro Bolybnáskiro Rajo isyn sýrby drógima dro kučipén, so isyn garady pe félda, savó manúš, syr lathiá, garadia, i radymátyr džála i saró biknela, so léste isyn, i kinela kodoia félda.
Primiéro (Sykaibén) pal Mutin
45Iščo Kralipén dro Bolybnáskiro Rajo isyn sýrby kúpco (tylgári), savó rodelas drieván goža mutinia; 46i syr lathiá jekh kuč mutin (žemčugo), gijá i bikindia saró, so léste isyn i kindia la.
Primiéro (Sykaibén) pal Khudy
47Iščo Kralipén dro Bolybnáskiro Rajo isyn sýrby bari khudý (sietka), so čhurdyné dro mórjo (derjáv) i saví skedyjá rázna mačhé, 48i syr khudý sys pherdý, manušá tyrdyne javrí la pe brégo i bešné, skedyi lačhé mačhé dre pirja, a nalačhé čhurdyné javrí. 49Adiáke-pac' javéla dro viekoskiro kónco (jagóro): džána telé Jangóly i roskedena nalačhen patiaibnytkonendyr, 50i čhurdena len dro bov jagása; odój javéla roibén i dandengiri skriežyma.”
Neve i Phurané Čačipena
51“Ci ĥalyné tumé davá saró?” Jone phendlé Léske: “Adiáke, Rajo.” 52i Jov phendiá lénge: “Paldavá kažno lylvarítko (knížniko), savó syklyja pal Kralipén dro Devléskiro Rajo, isyn sýrby manúš, savó isyn kheréskiro xulái, kon lydžála javrí péskire kučipnaskire piraliatyr saró nevó i phuranó.”
Isúso dro Nazarieto
53I isyn adiáke: kiéli končyndia Isúso dalé primiery (sykaibena), Jov gijá péske odothýr. 54I syr Jov javdiá dro Péskiro fóro, sykliakirdiá len dre sinagoga adiáke, so jone drieván divindlépe, rakirí: “Katýr adalé manušéste isyn dasavo godypén i zoralypén? 55Na Jov isyn skamindariskiro Čhavó? Na Léskire Da kharéna Maríia, i pšalén Leskiren Jakovo i Joza i Símono i Juda? 56i pheniá Léskire nane saré maškír aménde? Katýr ža Léste saró davá?” 57I na patianas Léske. Ne Isúso phendiá lénge: “Saré manušá kutiakirena prorokós, féni na dro Léskiro fóro i na dro léskiro kher” 58I Jov na kerdiá but dívy odój, pal-dová so jone na patiandyné Léske.
Currently Selected:
Matfiejo 13: ROMBALTR
Highlight
Share
Copy
Want to have your highlights saved across all your devices? Sign up or sign in
maintained by the United Bible Societies for the Baltic Romani Mission
