Ta je Vejec 30
30
1JE hofuc ho Agura nöku Jake: wale hofuc.
Haingen at kö Ithiela, wale Ithiela me Ukaia, ka habe,
2E hnathu iny monu hon tavat,
Ke ba gak wâhmakhmeto anyin at:
3Ke oge ca hia but ûne ge metâ,
Ke oge me ca wâhmakhmeto At ae Kap.
4Ie at ame ölö hnyi dranyai me ut hmetu but?
Ie at ame ûkhöûnâ ang hnyi li hnyamen?
Ie at ame lan köiö hnyi ûkhaûen?
Ie at ame otilâ hia je can hmeledrany?
Ia ien ke ia ien nokon ame ne khanö u?
5E kalaöt hia hofuc hwan Khong:
E thibi becin tavat adre me labageju kâu.
6Ca bi hanen bi ka hnyi hwan hofuc,
Wâ e nye he ka nö u, kʼ u thoi bi.
7Lo li ûnyi oge me sumâtâ gam;
Ca behânâ bi gak inye tiga ca mok;
8U na öûsâkâûöâ but mönya ûnyi baû me thoi:
Ca otheduoci nya, me otreni nya;
Ke haök ge ûnyi ae ûcû könya.
9Wâ e nye sekuk dö, me ivino u, me ha, ka habe, Ia Iehova?
Ke wâ iny nye theduoc, me venöu,
Me ha monoâ ien Khonguk.
10Ca hai thoiâ athnyaba ka tuhan,
Wâ e nye hangö u hnen e, ke adre me haikongu u.
11E hu dö adre me hangâ kamödra, Me ca haisoâ hinyödra.
12E hu dö ae ba hnyikongon hnyi hnödra hna ûnykûme bi.
Ke adre me ca hneû degecâ ikiki gadra.
13E hu dö ae gorany hmonyin je emakodra,
Ke ti gorany dö je bademaködra.
14E hu dö ke hele vat je nyudra, ke je hele vat je wehûlûsinaidra,
He ka an tavat ae theduoc hnyi hnyei, ke tavat ae ba ta unyi unyin tavat.
15Lo li hlu laku Aluka, ödru me ha, ka habe, Hojem, hojem.
Kun ta ûnyi ame ca hnyi sekon bala,
Eke, vak ta ûnyi ame ca hnyi ha, ka habe, Soju:
16Wale erkemok; me hnyok ae toûnyi;
Me kânâ ame ca unöngöt ge köiö;
Me meic ame ca ha, ka habe, Soju
17Haba ecmak at ame hlumâ kamen,
Ke höcö long hinyen,
Me ame he je orebainy hnyigöulen bucen ka ûâ e,
Kʼ ame he je lakon aeto ka an e.
18Kun ta ûnyi ae iyong könya,
Eke, vak ta ûnyi ae ca khanö nya:
19Wale deny aeto hnyi drany;
Me deny on hnyi kic;
Me deny hu hnyi wanben köiö;
Me deny baga me hlu.
20Helâe deny momo ame bi ûnyi monu;
E ame han ke kot hnyimen,
Me ha, ka habe, E ba monu oge me ânyâ.
21Ame öbubuny hmeledrany can kun ta ûnyi,
Ke ca khana he ka hokhnyokâ ta ûnyi a vak:
22Wale athnyaba kʼ ame ne than bi;
Me at ae monu ae sekon dut ge jeû
23Can momo ae kong ae hu âiân dut;
Me athnyaba a momo at ame he ka hwöhwaban at ame muso e.
24Vak ta ûnyi ae ûhnyûkong eang hmeledrany,
Ke ödrin ti metâ gan hmâ bi:
25Wale je wahajö a ödra ca hwege bi,
Ke so bi adre me penapenö öʼ dra hnyi honivakeny;
26Je shefani a ödra ca man bi,
Ke adre me bi umödra hnyi je kic;
27E ba tuhan je wahamon,
Ke so bi adre me he gaga hia hnyi je bunyen;
28Je behölök ame iyâw ge li hnyamen,
Ke e bi hnyin je uma umen than.
29Kun ta ûnyi ae hmanenang hnyi hnödrin hna he,
Eke, vak ta ûnyi ae mec ûhedrin.
30Wale liona, at ae man hon je meno,
Kʼ ame ca whiö bi ge ke je meno hia;
31Horsiny vat, me got baga minya;
Me than, ae ca khan ödra tot metâ kâu.
32U je ne hia but hwen monu me ka oganö u bi,
Ke u je ne vak hulo, Kât ju hnyimâm.
33Ödra ka huliwan debai me ame manen dut bata,
Ke ödra ka ken böhöhiny, me ame hingölö but dra:
Helâe ödra ka hlec wathethot, me ame o but iwatretra.
Currently Selected:
Ta je Vejec 30: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society