Ta je Vejec 26
26
1HELÂ me kiona hnyi honivakeny, me helâ me we hnyi ûen menu;
Helâe minya e ca ûcû hmanenang ka at ae monu.
2Ame gâ monu meno, me gâ baû wahalep,
Ke helâe ame ca he bi ka man ûhangö baû.
3Hobi kâu hors ong uto, ke hobi kâu asina toiny hnyimen,
Ke hobi kâu unyin at ae monu osö.
4Ca thu ka at ae monu hoton anyin hwen monu,
Wâ u nye ûcû thö më.
5Thu thö ka at ae monu hoton anyin hwen monu,
Wâ e nye bemetâ hnyi ûnykûmenen.
6Haba at ame kunâ at monu he ka bi ûthumetu
E ame ka subâ li can bi, me ijem monu.
7Ame him li can at ae khikhin can:
Ke helâe vejec hnyi hnyimen tavat ae monu.
8Helâ me tang veto ae gan hwaban hnyi ve veto,
At ame ogânâ at ae monu.
9Helâ me makjöngöc ame dit hnyi hnyamen at ie monu,
Helâe vejec hnyi hnyimen at ae monu.
10Haba at fana ame aat hia,
Helâe at ame hawâ at ae monu he ka huliwa kâu, me tavat adre me he baû bi.
11Helâ me kuli ame hmetu ka hnyi hnen hna hmita,
Helâe at ae monu, wale ame hmetu ka hnyi anyin hwen monu.
12U je wâ at ae metâ hnyi hnen bi hna ûnykûme?
E so geju ka at ae monu hon e bi.
13Haingen üsënyin, ka habe, Kabeû ge liona;
Waleû liona hnyi gethen.
14Helâ me ame hwihwiö hlingen hwanuma hnyi hinj,
Helâe ūsēnyin hon hnen hna mokut.
15Haba üsënyin ame odilâ hnyamen hnyin mini,
Ke ti sēnyin e he ka ohmeto e ka hnyi hnyimen.
16E metâ üsënyin hnyi ka hnen hna ûnykûme
Hon tavat a seven adre me thu wisa.
17Haba at ame he, kʼ ame saû he ka hnyi hanen ivino anyin ke at,
E ûcû me at ame kât li hnyikonyen kuli.
18Helâ me at ae wiâkû ame khûâ ta je okûnû,
Me je fana, me mok,
19Helâe at ame iyâwâ ke at,
Kʼ ame ha, ka habe, Hawa, oge me ca ûhiö?
20E ka ba uto, me mok ut meic:
Helâe, e ka ba at ame ûhaiö, me ba but û.
21Helâ me walep hnyi wanben je uthmeic, ke uto hnyi meic,
Helâe minya at û, a hnân okûâ iwatretra.
22Haba hofuc hwan at ame ûhaiö, me helâ me je ujeû ae hnebwia,
Ame dit ka hnyi hnyin hnyekon.
23Haba esongot ae kaukahwa, ke hnyok ae kong,
Me ûcû me kaia kânâ adre me tube ge dron sileva.
24Haba at ame ûöhûköti, e ame iyawo hnen li esongodiny,
Me ip tang iyawo hnyi hnyekon:
25E ka ha hofuc ae wisa, ca kap bi;
Anyin a eû hnyi hnyekon je ûnyi ae ikiki a seven.
26Eja ke ne a ne khavâ anyin ûöhûköti ge iyawo,
Ame he ka manen hwakecin ae kong hnyi ûkhacaköu.
27Haba at ame hiny thop me ame he ka ta kâû ka hnyin:
Ke haba at tetebulo veto, me ame ka tetebulo hmetu bi kâu.
28Haba bohmen ae thoi, me ame hûkotiâ tavat e ame ovecâ;
Ke haba hnyem ae ûtakû, me ame okûâ ûokonguny.
Currently Selected:
Ta je Vejec 26: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society