Ta je Vejec 13
13
1HABA nokon ae metâ me ame long hna ûne hnen kamen:
Ke haba at ame ûhiö, me ame ca long bi hna nâ.
2Ame he at ka an so ûnyi hnyi wan hnyimen:
Kʼ ame he tavat iyawö ka an ûokonguny.
3Haba at ame tuö hnyimen, me ame tuö bi anyin möt.
Ke haba at ame fuc gânâ me ame he ka hu hnaûhango.
4Ame weny hnen hnyekon ūsēnyin, ke ba bi:
Kʼ ame he ka pipikhenya at ae hwege huliwa.
5Haba at ae wisa me ame hûkotiâ hofuc ae thoi:
Kʼ adre me ikiki at ae kong, me hnân ohmehma.
6Hwakecin ae wisa ame tuö at ae ba hnyikongon eû hnyi gethen:
Ke hwakecin ae monu ame hagutâ at ae kong.
7E hu tavat adre me otreni ödra omjeû, me ba bi:
Ke hu tavat adre me otheduoci ödra, me gan bi omjeû gadra.
8Haba hwaban möt anyin at, me ûnyâ tang omjehen:
Ke ame ca long hna nâ hnen at ae theduoc.
9Ame senyin melaminy tavat ae wisa:
Kʼ adre me he ka omoko lamepa anyin tavat ae kong.
10Ame oâ iwatretra ge bigan
Ke hu metâ ge tavat adre me kap ûhnenamö ae so.
11Haba omjeû adre me ie hom, me ame he ka hia tot bi:
Kʼ ame he ka osehia hnen at ame ûkhöûnâ deny huliwa.
12Haba geju adre bec ka ohwâdâ me ame omoko hnyok:
Ke adre me ne ohwâdâ weny, me helâke ûöiny möt.
13Haba at ame hûkötiâ hofuc, me ame okongoâ e bi:
Ke ame he ka hu troban ge at ame outen hnanyibu.
14Haba hnanyibu anyin at ae metâ, me wale pupuainy möt,
Me me kec ge je hnewe adre me mekiny.
15Haba ûnykûme ae so, me ame okûâ ibetengiö:
Ke hokong gethen deny tavat iyawo.
16Ame huliwa metâ hnen at ae so:
Ke haba at ae monu me ame omanenâ anyin hwen monu.
17Haba ûthumetu ae monu me ame ta ka hnyi hulo:
Ke haba ûthumetu ae hnathu me hnyi hwegien unyin.
18Ame he ka theduoc me hmehma at ame höciâ hna ûne;
Ke adre me he ka ogânâ at ame long hna nâ.
19E hnebwia ka hnyi hnyok hna weny ae hwâdâ:
Ke ikiki ka tavat ae monu he ka saû ûnyi hnyi hulo.
20Tha he ju me tavat ae metâ, mʼ u me he ka metâ:
Ke ame he ka iei at ame hanen tavat ae monu.
21Ame he hulo ka he hoton tavat ae kong:
Ke adre me he ka bi hwaban so ka tavat ae wisa.
22Haba at ae so me ame he ka ha jekhon je laöbiny;
Ke adre me ip hobi kâu tavat ae wisa omjehen at ae kong.
23E gan hmâ jeû hnyi hnyei iny at ae theduoc:
Ke e hu minya hna ohia ge hna owisa ae hwali.
24Haba at ame behânâ osö me ame hûkötiâ nokon:
Ke haba at ame betenge ge nokon me e ame nâ e hnyi ke je ûen.
25Ame han me sekon at ae wisa:
Ke ame he ka ba onyen hnyekon tavat ae kong.
maintained by the British and Foreign Bible Society