Ta je Vejec 1
1
1TA je vejec anyi Solomona nöku Davita tuhan Isaraela:
2Me me khana metâ me hna ûnö:
Me wâhmakhmetoâ je hofucin wâ tremângâ;
3Me kap hna ûne hnyi hwakecin ae metâ,
Me wisa, me hna owisa, me hwakecin ae ûcû;
4Me me ometâ tavat ae ba hnyekudra,
Me ham ka wahidröu hna ûne me hna ûnykûme:
5Me me long hnen at ae metâ, me bi hanen anyin metâ;
Me me he at wâhmakhmeto ka hu metâ hnân ûhnenamö:
6Me me wâhmakhmetoâ vejec me ûhöûcû;
A ta je hofuc hwan tavat ae metâ, me hodra ta je hofuc ae vhet.
7Haba hwakecin he ka ot kö Iehova, me wale hwân he ka wâhmakhmeto;
Haba tavat ae monu me adre me hmiôdra meta me hna ûne.
8Nokuk lö, long ju hna nö u hnen kâmâm,
Ke ca degec bi hna ûne hnen hinyâm:
9Anyin ame he ka helâ me korona ae hmanenang hon bâm,
Ke sawakiny hnyi nyem.
10Nokuk lö, a ne cubic u tavat ae kong,
Ca hmehmela bi.
11Adre me ne ha, ka habe, Öta be,
Ate me mokulec at,
Ate me he ka tuö at ae ba hnyikongon, ke ba can;
12Ate me he ka utʼ ödra meli ödra helâ me hedis,
Ke tiga bekhot, helâ me tavat adre me utut ka hnyi thop;
13Ate me he ka wâ je wakomjeû hia
Ate me he ka ounöngötâ umöta je uma ge ta je ûnyi adre söh;
14U ma tha ugleköbâ möhmun;
Kʼ ame he minya ka tha tangöta tang hia:
15Nokuk lö, ca tha he hnyi gethen mödra;
Behânâ ju cam ge dedra je gethen:
16Anyin ame wadring je cadra ka hnyi hulo,
Ke adre he mweimwei he ka hingâlâ dra.
17Anyin e ûnyi baû he ka lau hnewe,
E ka wâ but e hnen meno ame gâ:
18Ke haba je hnyat eling adre me khöu mokut kodra bi,
Adre me mokut duöng kodra bi.
19Helâe dedra ta je gethen hia tavat adre me behnyekudra omjeû;
Ame ohia möt anyin tavat ae tren e.
20Metâ ame kuku eû hnyi gethen,
E ame hongot ge hwan hnyi je hnaudrâ;
21E ame kuku hnyi je dok ae ûnyi hnathu adre laba ûkhacaköu hnyin;
Hnyi hna dit hnyi je homagöule,
E ame ha hwan je hofuc hnyi taun; ka habe;
22Tavat ae ba hnyekudra lö, öbun e he ka hnyok ka hwakecin ba hnyekon ke ne o but kehö?
Me tavat ûhiö he ka hiâ ke ne o but kehö,
Me tavat ae monu ha hmiödra wâhmakhmeto?
23Hwio thʼ öbun ge hnok hna ûne:
Wâ bi, oge me he ka hingâlâ köbun hanuk,
Oge me he ka omanenâ köbun hok ta je hofuc.
24Can oge me hongot, ke öbun höcö;
Oge me hinôbeny, ke ba at ame long;
25Ke öbun e oûnyibâûâ hia anyik ûhnenamö,
Me ca weny bi hnok hna ûnö;
26Oge me he bi inya ka hlumā anyibun vec;
Me ûhiö e ka o köbun ot;
27E ka o köbun ot helâ me weneû,
E ka o köbun vec helâ me hou;
E ka o köbun vec me hmak.
28Me adre me he ka tenge könya, ke oge me ca he bi nya ka thu;
Adre me he ka elölöm nya, kʼ adre me ca he ka o nya:
29Anyin adre me hûkötö he ka wâhmakhmeto,
Kʼ adre me ca ûca he ka outö Iehova:
30Ke adre me ca wedra anyik musi;
Kʼ adre me hmiödra hia hnok hna ûnö;
31Anyin a wale adre me be ka an wan hwakecidra bi,
Kʼ ame he ka sekudra hnen anyidra bi bihihwakecin.
32Anyin adre me he ka hlingʼ ödra hnen ihwiöiny tavat ae ba hnyekudra bi,
Ke ame he ka hiʼ ödra hnen sot anyin tavat ae monu.
33Ke haba at ame ling nya me ame he ka laba khötkic,
Me laba wia, me ca outen ûnyi ae kong.
Currently Selected:
Ta je Vejec 1: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society