Numera 5
5
1KE haba Iehova ome ha kö Mose, ka habe, 2Hûna ju ka lakon Isaraela inʼ adre me he ka kunâ ka hnyi hoton je hnyaba ta je lepera hia thithö, me tavat hia ame hingölö, me tavat adre me bo kong ûnyi ge komok: 3öbun e he ka kunâ obaga me omomo, bamöbun he ka kunʼ ödrin ka hnyi hoton je hnyaba; wâ ödra nye obokongâʼ öbun, a hnyei oge me laba hnyin. 4Ke haba lakon Isaraela adre me ânyâ helâe, me kunʼ ödrin ka hnyi hoton je hnyaba: ke a ânyâ lakon Isaraela hoton hna hûna hnö Iehova kö Mose.
5Ke Iehova ame ha kö Mose, ka habe, 6Ha thö ka lakon Isaraela, ka habe, E ka he baga ame ne momo ka ânyâ ke hwakecin ae kong, kʼ ame monu hnyi hnyimakö Iehova, ke hulö but at eling; 7me hamödra he ka omanenâ anyidra hulö waleji adre me ânyâ: kʼ adre me he ka bi hwaban bekhötâ anyidra hulö, me bi hanen ke keihen a thabûnginy ka hnyin, me ham ka at waleji e ame monu kâu. 8Ke ame ne ba ke liamekeiny mē at he ka ham hwaban monu kâu, me haba hwaban hulö adre bi hwaban kö Iehova ame he ka hobi kâu at bihut; ke ca ha bi mamoe baga hnân ûcû möt, wale hnân ûco anyin möt. 9Ke haba je hudiny kap goranyai ûnyi hnyi je ûnyi ae kap hia anyin at Isaraela, wale adre labö hom ka at bihut, me wale hnân hobi kâu e. 10Ke hobi kâu e ta je ûnyi a kapiny tavat: haba ta je ûnyi ame he ka ham hnen ke at ka at bihut, me wale hobi kâu.
11Ke Iehova ame ha kö Mose, ka habe, 12Ha thö ka lakon Isaraela, me ha ködra, ka habe, A ne monu âiân ke baga, me ame ânyâ hulö kâu, 13kʼ ame tha mokut me ke baga, kʼ ame ikhâlâ e ge âiân, me iyong, kʼ ame kong ut momo, ke ba at ame wâ hnân ohnathoâ, kʼ adre ca lelö e hnyi hnen hna ânyâ; 14ke ame ciâ baga hnyi hnyekon, kʼ ameciâ ge âiân a momo, kʼ ame kong ut momo: ke haba khaca, ame ne o ciâ hnyi hnyekon, ame ciâ ge âiân a momo, kʼ adre ca okongoâ: 15me hamen baga he ka hom âiân ka at bihut, kʼ ame he ka hom anyin hut hobi kâu e, a tap salawa bali a khaca omer; kʼ ame ca he ka hû e ge wakaco; kʼ ame ca be ka bi libanu ka hnyin; anyin a hudiny ciâ eling me hudiny oûnykûmeâ, hnân oûnykûmeâ hulö. 16Ke hamen at bihut he ka hom momo hakekeny, me ip e hnyi hnyimakö Iehova: 17kʼ ame he at bihut ka hom köiö ae kap hnyi kaia kânâ; kʼ ame he at bihut ka aoc sesâ hnyi kânâ eiö hnyi uma mano, me khûâ ka hnyi utköiö: 18ke hamen at bihut he ka otilâ momo hnyi hnyimakö Iehova, me hna but leûnen ban momo, me ip hnyi hnyamen hudiny oûnykûmeâ, a wale hudiny ciâ: ke e hnyi hnyamen at bihut köiö ae hiny at ame ohnaûhangöâ: 19kʼ ame he at bihut ka kunâ momo he ka khemanyin, me ha kâu, ka habe, U je ne ca tha mokut me ke baga, a ca âiâm bi, ke u je ne ca saû ka hnyi ûnyi ae ikiki, awe, u me he ka gufa ge utköiö ae hiny eang, at ame ohnaûhangöâ: 20ke u je ne hia but monu me ke at a ca âiâm, kʼ adre okongu u, ke a ne hia but tha mokut mou ke at ke ca âiâm bi: 21me hamen at bihut he ka kunâ momo he ka khemanyin a khemanyin hnân ohnaûhangöâ, kʼ ame he at bihut ka ha ka momo, ka kabe, Ame he Iehova ka wiö u hnân hangâ me khemanyin hnyi wanben em hnyei, e ka he Iehova ka oavâ jevam me okhibö hnyekom; 22ke haba utköiö eang at ame ohnaûhangöâ ame ke ka dit ka hnyi hnyekom, me okhibö hnyekom, me oavâ jevam: ke ame he momo ka ha, Amen, Amen. 23Ke hamen at bihut he ka sihnalimen je ûhangö eling hnyi ke tusi, me hneû degecâ hmetu hnyi utköiö ae hiny: 24ke e ame he ka habelen momo ge utköiö ae hiny at ame ohnaûhangöâ: kʼ ame he köiö at ame ohnaûhangöâ ka dit ka hnyi hnyekon me me hiny jut. 25Ke ame he at bihut he ka hom hudiny ciâ ûnyi hnyi hnyamen momo, me hajijingâ hut eling hnyi hnyimakö Iehova, me hom ka hnyi taben hut: 26ke hamen at bihut he ka okhaca aoc hudiny salawa ge hnyamen, hnân oûnykûmeâ, me le hon taben hut, ke hwaban e, e ame he ka habelen momo ge utköiö. 27Ke e ka hia but habelen momo ge utköiö, ke ame ne monu but momo, kʼ ame ne hia but ânyâ hulö ka âiân, me ame he utköiö at ame ohnaûhangöâ ka dit eû hnyi hnyekon, me me hiny jut, me ame he ka khibi hnyekon, me oavâ jevan: ke ame he ka hnaûhangö momo hnyi wanben iny hnyei. 28Ke adre me ne ca hia but okongoâ momo, kʼ ame ne bo so; awe, ame ke ka he bâu bi momo, kʼ ame he ka erkin bi. 29Wale hnanyibuiny ciâ, e ka monu but momo me ke at, a ca âiân bi, me me kong ut: 30ke ameʼ ne hwân hnyekon baga he ka ciâ, kʼ ame ciâ âiân momo; me ame he baga ka ip âiân momo hnyi hnyimakö Iehova, me ame he at bihut ka ânyâ kâu hnanyibu eang hia. 31Ke ame he ka he baû bi baga ge hulö, kʼ ame he momo ka hom takoû anyin hulö.
Currently Selected:
Numera 5: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society