Numera 32
32
1KE haba laku Reubena, me laku Gada ödrin e tren omeno ae se hia: ke ödra adre me wâ hnyei Jazera, me hnyei Gileada, me wâ bi, hnyei ae so hobi kâu ta je meno; 2me ame he laku Gada me laku Reubena, me ha kö Mose me Eleazara at bihut, me je tuhan ûkhacaköu, ka habe, 3Haba hnyei Atarotha, me Dibona, me Jazera, me Nimera, me Hesebona, me Eleala, me Sebama, me Nebo, me Beona, 4wale hnyei Iehova ame kot hnyi hnyimakan ûkhacaköu anyin at Isaraela, me, wale hnyei ae ûcû hobi kâu omeno, ke ohmun tavat tren omeno a lathnyabaem. 5Ke ödrin e ha, ka habe, U je ne betenge gahmun, ö u hna hnyei eling köhmun a lathnyabaem, me ihmun; ke ca hum ohmun bi he ka hanyâûâ Joridano. 6Ke Mose ame thu ka laku Gada me laku Reubena, ka habe, Hawa, ame he je liamekeiny möbun ka vat e helë, ke öbun e he biju ka laba eang? 7Ke ieû gabun öbun e ohluhluâ hnyekon lakon Isaraela, mʼ adre me ca he ka hanyâûâ ka hnyi hnyei waleji a ham ködra Iehova? 8Ame ânyâ helâe lakamöbun waleji hnyi hnok hna kunʼ ödrin ûheny Kadesi-banea he ka ecmâkâ hnyei. 9Anyin a ödrin e he but ka hnyi hnyigöulen bucen Esekolo, me wâ hnyei, me ödrin e ohluhluâ hnyekon lakon Isaraela, mʼ adre me ca he ka hnyi hnyei waleji a ham ködra Iehova. 10Ke ame ubâhlâ thö hmönyin anyi Iehova hnyi bong eling, me e ame khemanyin, ka habe, 11Haba tavat adre he jem ûhedra Aigupito, hwân ge tavat a twente huna me gan hon e, me adre me ca he ka hnyi wâ hnyei waleji oge khemanyin kö Aberahama me Isaaka, me Jekob; anyin adre me ca hnu hotuk hnyi ta je ûnyi hia: 12ke ca ha bi Kaleba nöku Jefune at Kenaza, me Josua nöku Nuna: anyin a ödre hnu hotu Iehova hnyi ta je ûnyi hia. 13Ke ame ubâhlâ thö hmönyin anyi Iehova ka at Isaraela, me e ame ohei ödra hnyi hnyebuba fâte je huna ke ne o but ame hia but tavat adre me ânyâ hulö hnyi hnyimakö Iehova. 14Ke wâ bi, öbun e o biju hwaban lakamöbun, a hanen tavat ae kong, he ka ogânâ hmönyin ae gan anyi Iehova kö Isaraela. 15Anyin a öbun e ne hmetu ûhebun unyin, me e ame he hmetu ka hna degeci öbun hnyi hnyebuba; ke öbun e he ka ohia tavat eang hia thithö. 16Me ödrin e hakekeny kâu me ha, ka habe, Ohmun e he ka si hagin halehmun je meno eang, me bi hnyaban lakuhmun, can aten hnyei: 17ke ohmun e he ka penapena me hnyimakan lakon Isaraela, ke ne o but ohmun e hum ödra ka hnyi idra: kʼ ame he lakuhmun bi ka labā je taun adre up haginy, can aten hnyei. 18Ohmun e ca he ka hmetu ka hnyi umöhmun je uma ke ne o but ame ve hu iny lakon Isaraela hia. 19Anyin a ohmun e ca he bi ka tha tren hnyei mödra hnyi ke keihen Joridano ke e jio, anyin adre kû köhmun ihmun hnyi ke keihen e deiö Joridano. 20Ke haba Mose ame thu ködrin, ka habe, Öbun e ne he ka ânyâ ûnyi e; wale öbun e ne he ka penapena he ka he hnyi hnyimakö Iehova he ka hnyi vat e helë, 21kʼ ame ne he tavat penapena hia unyibun ka hanyâûâ Joridano hnyi hnyimakö Iehova, ke ne o but e ame obâ je iwahnaihmiony mē hnyi hnyimakan, 22me hom ûhnyûkongo hnyei hnyi hnyimakö Iehova: awe, öbun e he ka hmetu hwaban e, kʼ ame he ka ba hulö gabun hnyi hnyimakö Iehova, me hnyi hnyimakan at Isaraela; ke haba hnyei eang, me ibun bi hnyei hnyi hnyimakö Iehova. 23Ke öbun e ne ca ânyâ e, me wâ bi, öbun tavat hulö kö Iehova: ke wâhmakhmeto ju öbun, a gʼ ame he ka omanenʼ öbun ge anyibun hulö. 24Otilâ ju je taun hobi kâu je lakubun, me bi haginy halebun je mamoe; ke he thʼ öbun ka ânyâ ûnyi ame o ûnyi hnyi je hnyimö-bun. 25Me ame ha laku Gada me laku Reubena kö Mose, ka habe, Ohmun e he a lathnyabaem ka ânyâ helâ me than ame ha. 26Ame he lakuhmun me laöiöhmun, me halehmun je hnahat mamoe, me halehmun je meno hia ka laba hnyi je taun e Gileada: 27kʼ ame he lathnyabaem ka hanyâûâ, a tavat gahmun hia adre me hom omjehen vat hnyi hnyimakö Iehova he ka hnyi vat, hoton hna ha hnen than.
28Me haba Mose ame hûn ödra kö Eleazara at bihut, me kö Josua nöku Nuna, me ka je taben ae beönua hnyi je tribuiny lakon Isaraela. 29Ke Mose ame ha ködra, ka habe, Ame ne tha he möbun laku Gada me laku Reubena ka hanyâûâ Joridano, a je hnyat hia adre hom omjehen vat, hnyi hnyimakö Iehova, me hom ûhnyûkongoâ hnyei hnyi hnyimaköbun; awe, öbun e he ka ham ködra hnyei Gileada me me idra bi: 30ke adre me ne ca hom omjehen vat me tha hanyâûâ unyibun, awe, adre me he ka tha hnyei unyibun hnyi hnyei Kanana. 31Ke haba laku Gada me laku Reubena adre me thu, ka habe, Ohmun e he ka ânyâ helâ me Iehova ame ha köhmun a lathnyabaem. 32Ohmun e he ka hom omjehen vat me hanyâûâ hnyi hnyimakö Iehova ka hnyi hnyei Kanana, me me he ka hu ihmun hnyei hnyi ke keihen e deiö Joridano. 33Me haba Mose ame ham ködra, a laku Gada, me laku Reubena, me hafiny tribu Manase a nöku Josefa, dökhu dökhu Sihona thaniny at Amora, me dökhu dökhu Oga thaniny Basana, wale hnyei me je tauniny, a je tauniny hngei igigilö. 34Ke haba laku Gada, adre me otilâ Dibona, me Atarotha, me Aroera; 35me Aterotha-sofana, me Jazera, me Jogebea, 36me Bethe-nimera, me Bethe-harana: a je taun adre up haginy, me je haginy mamoe. 37Ke haba laku Reubena, me adre me otilâ Hesebona, me Eleala, me Kiriathaima; 38me Nebo, me Baala-meon (kʼ adre wia li ien,) me Sibema: ke adre me ve hwenyi ien je taun adre otilâ. 39Ke haba laku Makir nöku Manase, me, adre me he Gileada ai, me hûgûnâ, me obâ at Amora ûnyi hnyin. 40Ke Mose ame ham Gileada kö Makir nöku Manase; mʼ adre me labā e. 41Ke haba Jaira, nöku Manase, ame he me hûgûnâ je tauniny, me hwenyi ien Havoth-jaira. 42Ke haba Noba ame he me hûgûnâ Kenatha me je tauniny, ae ûhnyûkong, me hwenyi ien e Noba hoton ien bi.
Currently Selected:
Numera 32: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society