Numera 30
30
1KE haba Mose ame ha ka je taben je tribuiny lakon Isaraela, ka habe, Walang ûnyi a hûna Iehova. 2Ame ne he ke at ka bi khöbi kö Iehova, ame ne khemanyin he ka ca hnyekon ge hwan hofuc, me e ame ca he ka hanyâûâ hnen hna ha; ke e ame he ka ânyâ hia hoton hna he but ûuyi hnyi hnyimen. 3Helâe minya ke momo ame ne bi khöbi kö Iehova, me ca hnyekon ge hwan hofuc, ke tiga e bi hnyi hnyaban kamen, ke tiga ca at hnathu; 4ke ame ne löng anyin khöbi hnen kamen, me hofuc ame ca hnyekon kâu, kʼ ame ne laba hnyibi kamen; awe ame he ka tethmâ hia anyin khöbi, ke haba khaca ame he ka tethmâ hofuc hia ame ca hnyekon kâu. 5Ke ame ne thawâ e hnen kamen, hnyi bong e ame löng hwan hnyin; awe, ame ca he ka tethmâ anyin khöbi, me hofuc a ca kâu hnyekon; kʼ ame he Iehova ka hna e, anyin a thawâ e hnen kamen. 6Ke ame ne hu âiân, ke ka e bi anyin khöbi, ame ne ke hofuc ae ûhlöhlök ame he ûnyi hnyi li esongodiny, wale ame hia but ca hnyekon kâu; 7ke e ka löng ut e hnen âiân baga, kʼ ame ca fuc kâu hnyi bong e ame löng hnyin; awe, ame he ka tethmâ anyin khöbi, me hofuc e ame ha, waleji a ca hnyekon kâu. 8Ke ame ne thawâ momo hnen âiân hnyi bong e ame löng hnyin; awe, e ame he ka oûnyibâûâ anyin khöbi, me hofuc ae ûhlöhlök unyi hnyi li esongodiny, waleji e ame ca hnyekon gan: ke Iehova ame he ka hna but e. 9Ke haba khöbiny safac, ame ne momo adre degec, me ame he ka tethmâ hia unyin hofuc hia e ame ca e gan. 10Ke ame bi khöbi hnyi uma umen âiân a baga, kʼ ame ne ca hnyekon ge hofuc adre khemanyin, 11ke a löng ut hnen âiân, kʼ ame ne laba hnyibi, kʼ ame ca thawâ, awe, ame he ka tethmâ hia anyin je khöbi hia, kʼ ame he ka tethmâ hofuc hia waleji e ame ca hnyekon kâu. 12Ke ame ne hia but oûnyibâûâ hnen âiân a baga hnyi bong e ame löng hnyin, awe, ame ca he ka tethmâ je hofuc ûnyi hnyi li esongodiny hnyi anyin je khöbi, me hofuc ame ca hnyekon gan: anyin a hia but oûnyibâûâ je ûnyi e hnen baga; ke ame he Iehova ka hna e bi. 13E khana âiân a baga he ka ohmâ, ke e khana âiân a baga he ka oûnyibâûâ je khöbi hia me je hna khemanyin hia a hnân ca hnyok. 14Ke ame ne ba hofuc hwan baga ka momo a âiân hnyi ke bong me ke bong; awe, e ame ohmâ ta je khöbi hia anyin âiân a momo, me hofuc hia e ame ca hnyekon gan: haba e ame otilâ hmâ e, anyin ae ba hnen hna ha kâu hnyi bong e ame löng hnyin. 15Ke ame ne he baga ka oûnyibâûâ, hnyi ûen e ame löng, awe, ame he ka takoû e hulö anyin momo. 16Wale je hnanyibu a hûna Iehova kö Mose ge baga me âiân, me kamen me nokon hlu e ka tiga ca at hnathu bi hnyi hnyaban kamen.
Currently Selected:
Numera 30: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society