Numera 3
3
1KE walang je dö anyi Arona me Mose hnyi bong ame fuc Iehova kö Mose hon bucen Sinai. 2Ke walang ien je laku Arona; Nadaba a atö, me Abiu, me Eleazara, me Ithamara. 3Wale je ien laku Arona, a hnyat bihut adre hû, waleji e ame otilâ hnân bi hut. 4Ke ame mokcu Nadaba me Abiu hnyi hnyimakö Iehova, hnyi hnödru hna hudo meic ae ke bongon hnyi hnyimakö Iehova, hnyi hnyebuba Sinai, ke ba nökudru: ke Eleazara me Ithamara ödru me labö bi hut hnyi hnyimakan kamödru.
5Ke haba Iehova ame ha kö Mose, ka habe, 6Hom but jem tribu Levi, me ip ödrin hnyi hnyimakö Arona at bihut, mʼ ödrin e he ka huliwa kâu. 7Ke ödrin e he ka vheno hna hûna kâu, me hna hûna ka ûkhacaköu hia hnyi hnyimakan uma ûkhacaköu, he ka ânyâ huliwainy uma mano. 8Ke ödrin e he ka tuö omjehen uma ûkhacaköu hia, me hûna ka lakon Isaraela he ka ânyâ huliwa hnyi uma mano. 9Ke u me he ka ham at Levi kö Arona me lakon: adre ham muʼ ödrin kâu ûhedrin unyin lakon Isaraela. 10Ke u me he ka otilö Arona me lakon, ke ödrin e he ka labö tuö hanymen at bihut: ke adre me he ka hlingâ atkanyua at ame hakekenyâ.
11Ke Iehova ame ha kö Mose, ka habe, 12Me wâ bi, haba inya oge hia but hom at Levi ûhedra unyin lakon Isaraela hnân bi hnen je atö wale a hodra lakon Isaraela ka hnokoâ: me hobi könya at Levi: 13anyin a hobi könya lakon hia a bân; ke oge me okabâ könya je atö hia ge lakon Isaraela, at me meno, hnyi bong oge me kot hnyin je atö hia hnyi hnyei Aigupito: hobi könya ödrin; Inya Iehova. 14Ke Iehova ame ha kö Mose hnyi hnyebuba Sinai, ka habe, 15U me he ka aû je laku Levi hoton je hnyaban lakamödrin, me anyidrin je lap: u me he ka aû obaga hia, hwân ge tavat a khaca tehi me gan hon e. 16Ke haba Mose ame öû ödrin helâ me hna ha hnö Iehova, hoton hna hûna kâu. 17Ke walang ien laku Levi; Geresoma, me Kohatha, me Merari. 18Ke walang ien li laku Geresoma hoton anyidru li lap; Libeni me Simei. 19Ke haba laku Kohatha hoton anyidrin je lap; me Amerama, me Izara, me Heberona, me Uziela. 20Ke li laku Merari hoton anyidru li lap; me Maheli me Musi. Wale je lap anyin at Levi hoton je hnyaban lakamödrin.
21Haba lap anyin at Lebeni, me lap anyin at Simei, me ûnyi ga Geresoma: wale li lap anyin at Geresoma. 22Haba tavat adre aû gadra, a ûseiny obaga hia, hwân ge tavat a khaca tehi me gan hon e, wale adre aû gadra sevente thauzan ke faiv haded. 23Haba lap anyin at Geresoma ame he ka hunuma hnyi hoton uma mano ke e jio. 24Ke haba thaniny hnyaban lakamen at Geresoma, me Eliasafa, nöku Laela. 25Ke haba hanymen laku Geresoma hnyi uma ûkhacaköu, me wale uma mano, me uma, me baniny, me singiny hwanumen uma ûkhacaköu, 26me mano adre uhno hnân hak, me singiny homagouleny, hnyi uma mano, me hnyi taben hut igigilö, me je wen, hobi kâu ta je huliwainy hia.
27Haba lap anyin at Amerama, me lap anyin at Izara, me lap anyin at Heberona, me lap anyin at Uziela, me ûnyi ga Kohatha. 28Haba numerainy obaga hia, hwân ge tavat a khaca tehi me gan hon e, me ödra eit thauzan ke siks haded, tavat adre tuö hanymödra hnyi dok ae kap. 29Ame he je lap anyin laku Kohatha ka hunuma hnyi ke keihen uma mano ka hnyi hwaiöu. 30Ke haba thaniny hnyaban i kamen je lap anyin at Kohatha, me Elizafana nöku Uziela. 31Ke haba hanymödra, me wale tang, me laulau, me taben lamepa, me li taben hut, me je utkaiainy dok ae kap, wale adre huliwa kâu, me mano hnân: uhni, me ta je huliwainy hia. 32Ke ame he Eleazara nöku Arona at bihut he ka tuhan je thaniny at Levi, me homakan tavat adre me huliwan dok ae kap.
33Haba lap anyin at Maheli, me lap anyin at Musi, me ûnyi ga Merari: wale li lap anyin at Merari. 34Ke haba tavat adre aû gadra, a numerainy obaga hia, hwan ge tavat a khaca tehi me gan hon e, me ödra siks thauzan ke tu haded. 35Ke haba thaniny hnyaban kamen je lap anyi Merari, me Zuriela nöku Abihaila: adre me he ka hunuma hnyi ke keihen uma mano ka hnyi hwadrö. 36Ke haba hanymen adre ham ka laku Merari, me esöiny uma mano, me je venyâiny, me je ûtoiny ame tot, me je taben, me je omjehen hia, me ta je huliwainy hia; 37me je khetepiny hak igigilö, me je taben e, me je faoiny e, me je wen e. 38Ke haba tavat adre me he ka hunuma e deiö hnyi hnyimakan uma ûkhacaköu wale ame o seûno hnyin, me; Mose, me Arona, me je lakon, he ka tuö hanymen hnyi dok ae kap, a hanymen lakon Isaraela; ke adre me he ka hlingâ atkanyua at ame hakekenyâ e. 39Haba tavat hia adre aû a at Levi, wale Mose me Arona ame aû helâ me hna hûna hnö Iehova, hoton anyidra je lap, a obaga hia, hwân ge tavat a khaca tehi me gan hon e, me ödra twente tu thauzan.
40Ke Iehova ame ha kö Mose, ka habe, He thö ka aû obaga hia, a je atö unyin lakon Isaraela, hwân ge tavat a khaca tehi me gan hon e, me aû numerainy je iödra. 41Ke u me he ka hom at Levi hobi könya, (Inya Iehova) hnân bi hwaban je atö hia unyin lakon Isaraela; me omeno haleny at Levi, hnân bi hwaban omeno hia a bân haleny lakon Isaraela. 42Ke haba Mose ame aû je atö hia unyin lakon Isaraela, helâ me Iehova ame hûna kâu. 43Ke haba numerainy je ien obaga a je atö hia, hwân ge tavat a khaca tehi me gan hon e, a tavat adre aû gadra, me ödra twente tu thauzan ke tu haded ke sevente theri.
44Ke haba Iehova ame ha kö Mose, ka habe, 45U me he ka hom at Levi hnân bi hwaban je atö hia unyin Lakon Isaraela, me omeno haleny at Levi, hnân bi hwaban haledra omeno: kʼ ame he ka hobi könya at Levi; Inya Iehova. 46Ke haba hnân bi hwaban möt anyin tavat a tu haded ke sevente theri a je atö unyin lakon Isaraela, wale tavat ae nua biju hon ûseiny at Levi, 47me u ma he ka kap ûsa thabûng je sekel hwaban ke at me ke at; u ma he ka kap e hoton sekeliny dok ae kap (haba sekel, me twente je gera): 48ke u ma he ka ham mone, wale hwaban tavat ae nua biju gadra, kö Arona me lakon. 49Ke haba Mose ame kap mone adre ham hnân bi hwaban möt anyin tavat ae nua biju hon ûseiny tavat a bi hwaban anyidra möt hnen at Levi: 50ke e ame kap ta je mone ûnyi ge ta je atöiny lakon Isaraela; a wan thauzan ke theri haded ke sikste faiv je sekel, hoton sekeliny dok ae kap: 51ke haba Mose ame ham mone eling, wale adre bi hwaban kâu möt, kö Arona me lakon, helâ me hna ha hnö Iehova, hoton hna ha hnö Iehova kö Mose.
Currently Selected:
Numera 3: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society