Numera 23
23
1KE Balaama ame ha kö Balaka, ka habe, Ânyâ thö je taben hut a seven eang, ke penapena thö eang seven ta bolok, ke seven ta mamoe baga. 2Me Balaka ame ânyâ helâ me hna ha hnö Balaama; ke haba Balaka me Balaama ödru me hudo hon je taben hut a ûsa khaca bolok me ûsa khaca mamoe baga. 3Ke haba Balaama ame ha kö Balaka, ka habe, U me he ka tot hnyi ânyâm hut, ke oge me he ka he but; me ame ne he la Iehova he ka ûkhanö mönya: ke haba hofuc e ame he ka omanenâ könya me oge me he bi nya ka thumeta u. Ke e ame he ka hnyi dok ae görany. 4Ke Khong ame ûkhanö me Balaama, me e ame ha kâu, ka habe, Oge hia but penapena je taben hut a seven, me ve hudo hon je taben ûsa khaca bolok me khaca mamoe baga. 5Ke Iehova ame bi hofuc ka hnyi hnyimö Balaama, me ha, ka habe, Hmetu thö kö Balaka, ke u me he ka ha kâu helâe. 6Ke e ame hmetu kâu, ke wâ bi, e ame tot hnyi anyin hut, e me je thaniny Moaba hia. 7Me e ame ha anyin ûhöûcû, ka habe,
Balaka ame hum nya ûhek Arama,
Wale than Moaba ûnyi hnyi je bucen e Deiö:
Aiö u, hangö Jekob hobi könya,
Ke aiö u, me û Isaraela.
8Oge ma kâmâu ka hangâ at a ca hangâ hnen Khong?
Ke oge ma kâmâu ka oû at a ca oû hnö Iehova?
9Oge me wâ e ûnyi hnyi hon kic,
Oge bwele kâu ûnyi hnyi dok ae görany:
Wâ bi, wale tavat adre me he ka hake laba,
Kʼ adre me ca he ka tha öû ödra me ta je hnyei.
10Ia ae khana he ka aû sesâi Jekob,
Me ha ûseiny ke keihen a vakiny Isaraela?
E na he ju mekik ka helâ me mekiny at ae wisa,
Me obiny melik helâ me obiny melen.
11Ke Balaka ame ha kö Balaama, ka habe, Ieû e u je ânyâ könya? oge hawo u he ka hangâ je iwahnaihmiony mönya, ke wâ bi, u je hia but hahnahici ödra bi. 12Ke e ame thu, ka habe, Hawa, oge me ca he ka wâ wia he ka ha hofuc Iehova ame ip hnyi hnyimök? 13Ke Balaka ame ha kâu, ka habe, Ö u me tha he mönya ka hnyi ke dok, mʼ u me he ka ö ödra hnyin; u me he ka wâ ke keihen tavat thibi, ke u me ca he ka wâ hia: ke u me be ka hangâ ling hobi könya. 14Me e ame hom e ka hnyi utkânâ iny Zofim, hnyi ban Pisega, kʼ ame otilâ je taben hut a seven, me ame hudo hon je taben ûsa khaca bolok ke khaca mamoe baga. 15Ke e ame ha kö Balaka, ka habe, U me he ka tot eang hnyi ânyâm hut, ke oge me he ka ûkhanö me Iehova e helē. 16Ke Iehova ame ûkhanö me Balaama, me bi hofuc ka hnyi hnyimen, ka habe, Hmetu thö kö Balaka me ha je hofuc eling. 17Me e ame o but, ke wâ bi, e ame tot hnyi anyin hut, ke tha e me je thaniny Moaba. Ke Balaka ame ha kâu, ka habe, Ieû a ha Iehova? 18Me e ame ha anyin ûhöûcû, ka habe,
Höhöi thö, Balaka, me löng ju;
Tevehlöng ju könya u nöku Zipora:
19Haba Khong me ca at bi, me me he ka thoi;
Ke ca nokon at bi, me me he ka ietra:
Hawa e ame fuc kʼ ame ca he ka ânyâ?
Ame ha hofuc, kʼ adre me ca he ka owhâdâ?
20Wâ bi, adre kunö nya he ka hahnahicâ:
Ke e ame hia but ohnahicâ, ke e ca khanö nya he ka wia e.
21E ame ca wâ hulö unyi Jekob,
Kʼ ame ca wâ monu ga Isaraela:
E unyin Iehova a Khongon,
Ke e hnyi wanbödra ûhongötiny than.
22Khong ame hum ödra ûhedra Aigupito;
Ke e hu but gan helâke tang hwegeiny bolok ae hiny.
23E hnathu, e ba bihihwakecin kö Jekob,
Ke ba biobotkong kö Isaraela:
Ke adre me he ka ha ga Jekob me Isaraela, ka habe,
Ieû a ânyâ Khong!
24Wa bi, ame tot tavat helâ me liona momo,
Kʼ ame höihöi thö helâ me liona baga:
Kʼ ame ca he ka mokut ke ne o but e ame an haniny,
Me ijem dren at adre hlingâ.
25Me Balaka ame ha kö Balaama, ka habe, Ca he ka hângʼ ödra, ke ca he ka hahnahici ödra. 26Ke haba Balaama ame thu me ha kö Balaka, ka habe, Oge me ca ha köu, ka habe, Hamök he ka ânyâ ta je ûnyi hia ame he Iehova ka ha könya? 27Ke Balaka ame ha kö Balaama, ka habe, Aiö u, mʼ inye he ka hum u ka hnyi ke dok; kʼ ame ne so ka Khong, me u ma he ka hângʼ ödra eling hobi könya. 28Me Balaka ame hum Balaama ka hnyi hon Peora, wale cicö hnyebuba. 29Ke haingö Balaama ka habe, Otilâ thö je taben hut eang a seven, ke penapena thö eang seven ta bolok, ke seven ta mamoe baga. 30Ke Balaka ame ânyâ hoton hna ha hnö Balaama, me hudo hon je taben hut ûsa khaca bolok, me khaca mamoe baga.
Currently Selected:
Numera 23: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society