Numera 17
17
1KE Iehova ame ha kö Mose, ka habe, 2Ha thö ka lakonʼ Isaraela, me hom ûnyi gadra je uci a ûsa khaca hoton je hnyaban lakamödra, ûnyi ge anyidra je than hia hoton je hnyaban lakamödra, a twelv je uci: ke u me he ka ve sihnalimen je iödrin hnyi anyidrin je uci. 3Ke u me he ka sihnalimen iö Arona hon uci anyi Levi: kʼ ame he ka ûsa khaca uci hobi kâu je ve taben lap anyin lakamödrin. 4Ke u me he ka ip je uci hnyi uma ûkhacaköu cicö tangen ohnatho, dok oge me labö iouny möbun hnyin. 5Ke haba at oge me he ka ûca, me ame he ka vhong anyin uci: me oge me he ka bi obiny gak je hna ulidri nya ge lakon Isaraela, wale adre me ulidri öbu. 6Ke Mose ame fuc ka lakon Isaraela me anyidra je than hia, mʼ ödrin e ve ham kâu je uci, a ûsa khaca uci anyin ke than me ke than hoton je hnyaban lakamödrin, a twelv je uci. 7Ke haba Mose ame ip je uci hnyi hnyimakö Iehova hnyi uma ohnatho. 8Ke nyi Mose ame didro ka hnyi uma ohnatho; ke wâ bi a vhong ut uci anyi Arona hobi kâu hnyaban at Levi, ke a hlau but, ke vhong je vhongon, me wa but a je wan saked. 9Ke haba Mose ame hom je uci hia ûnyi hnyi hnyimakö Iehova ka lakon Isaraela: mʼ adre me wâ, me ve hom anyidrin uci. 10Ke Iehova ame ha kö Mose, ka habe. Ip hmetu ju uci anyi Arona ka hnyi cicö tangen ohnatho, mʼ adre me tuö me hnân haten ka tavat bi tot; mʼ u me he ka bi obiny hnödra hna ulidri nya, mʼ adre me ca he ka mok bi. 11Ke Mose ame ânyâ helâ me Iehova ame hûna kâu, wale hnen hna ânyâ.
12Ke haba lakon Isaraela adre me ha kö Mose, ka habe, Wâ bi, ohmun e he but ang ka mok, me hia, me hia hia. 13Haba tavat hia adre me he hakekeny, wale adre me hakekenyâ uma mano umo Iehova, adre me mok: ke hawa adre me he ka hlingʼ ohmun hia thithö?
Currently Selected:
Numera 17: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society