Numera 10
10
1KE Iehova ame ha kö Mose, ka habe, 2U me he ka tibet li trutru sileva; u me be ka huliwan ge hama: ke wale li ûnyi hnân hawâ ûkhacaköu, me hnân he je bunyen. 3Ke ödra ka he ka tûâ, me ame he ka ûkhacaköu köu tavat hia hnyi hwanumen uma ûkhacaköu. 4Ke ödra ka he ka okhaca tûâ, me ame he ka ûkhacaköu köu ta je than, a je taben je thauzan unyin at Isaraela. 5Ke öbun ka tûâ hnahna, me ame he ka he tavat adre me hunuma hnyi ke keihen e deiö. 6Ke öbun ka olo tûâ hnahna, me ame he ka he tavat adre me hunuma hnyi ke keihen ka hnyi hwaiöu: ödra ka ke ka tûâ hnahna me hnân ohei ödra. 7Ke ödra ka he ka ûkhacaköuâ tavat, me adre me he ka tûâ thibi, kʼ adre me ca he ka tûâ hnahna. 8Ke hamen laku Arona hnyat bihut he ka tûö trutru, wale hnân hnanyibu köbun nyiele balua hnyi anyibun je dö. 9Ke öbun ka he ka vat hnyi ibun hnyei me je iwahnaihmiony möbun, tavat adre me okongu öbun, me öbun e he ka tûâ hnahna wale li trutru; me adre me he ka ûnykûmi öbun hnyi hnyimakö Iehova Khongubun, kʼ adre me he ka omeli öbun ûnyi ge je iwahnaihmiony möbun. 10Ke haba hnyi je bong öbun e senyin hnyin, me hnyi anyibun je bijeû adre thu, me hnyi hnyimakan je tehi, adre me he ka tûâ li trutru hon anyibun je hudiny leû, me anyibun je hudiny ole; mʼ adre me he ka ûnykûmi öbun hnyi hnyimakan Khongubun: Inya Iehova Khongubun.
11Ke haba hnyi huna a loiny, hnyi tehi a loiny, hnyi bong a twenteiny, me adre me hom goranyai ûlâ ûnyi hnyi hon uma mano uma ohnatho. 12Ke haba lakon Isaraela adre me he but ûheny hnyi hnyebuba Sinai; me ame tot u ûlâ hnyi hnyebuba Parana. 13Ke adre me bân ka he ûnyi hnyi musi anyi Iehova, a deny Mose. 14Ke ame he bân haten lap anyin laku Juda, hoton anyidra je utbavat: ke haba at ame musö anyin vat, me, Nasona, nöku Aminadaba. 15Ke haba at ame musö vat anyin tribuiny laku Isakara, me, Nathaniela, nöku Zuara. 16Ke haba at ame musö vat anyin tribuiny laku Zebulona, me, Eliaba, nöku Helona. 17Ke adre me āi uma mano, kʼ ame hwân laku Geresoma me laku Merari hnyat sukhöûnâ uma mano ka he. 18Ke ame hwân ka he haten lap anyi Reubena, hoton anyidra je utbavat: ke haba at ame musö anyin vat, me, Elizura, nöku Sedeura. 19Ke haba at ame musö vat anyin tribuiny laku Simeona, me, Selumiela, nöku Zurisadai. 20Ke haba at ame musö vat anyin tribuiny laku Gada, me, Eliasafa, nöku Deuela. 21Ke ame hwân at Kohatha ka he, ödrin e kap tilâ ûnyi ae kap: ke haba keihen ödrin e otilâ uma mano hobi kâu ödrin ka o thö. 22Ke ame hwân haten lap anyin laku Eferaima ka he, hoton anyidra je utbavat, ke haba at ame musö anyin vat, me Elisama, nöku Amihuda. 23Ke haba at ame musö vat anyin tribuiny laku Manase, me, Gamaliela, nöku Pedazura. 24Ke haba at ame musö vat anyin tribuiny laku Beniamina, me Abidana, nöku Gideona. 25Ke ame hwân haten lap anyi Dana ka he, wale obiny je lap hia, hoton anyidra je utbavat, ke haba at ame musö anyin vat, me Ahiezera, nöku Amisadai. 26Ke haba at ame musö vat anyin tribuiny laku Asera, me, Pagiela, nöku Okerana. 27Ke haba at ame musö vat anyin tribuiny laku Nafatali, me Ahira, nöku Enan. 28Wale hwakecin ûheny lakon Isaraela hoton anyidra je utbavat; kʼ adre me hwân ka he.
29Ke haba Mose ame ha hö Hobaba, nöku Reuela, at Midiana, a ûngu Mose, ka habe, Ohmun e he ka hnyi hnyei waleji Iehova ame ha, ka habe, Oge me he ka ham köbun; aiö u ötin e tha he, ke ohmun e he ka ânyâ so köu, anyin a hia but Iehova ha so kö Isaraela. 30Ke e ame thu kâu, ka habe, Oge me ca he ka hnyi he, ke oge me he bi nya ka hnyi ik hnyei me anyik lap. 31Ke haingen ka habe, Ö u ca he bi ka hnʼ ohmun; anyin a khanö u a ohmun e he ka hunuma hnyi hnyebuba, ke u me he ka emaköhmun. 32Ke u je ne tha he möhmun, me haba so ame he Iehova ka ânyâ köhmun, me ohmun e he minya ka ânyâ helâe köu.
33Ke adre me he but ûhedra hnyi bucen anyi Iehova hnyi kun ta bong; ke haba tangen ûhihinyköu ame he bân hnyi kun ta bong, he ka elâm hna menâ hobi ködra. 34Ke ethö bi hudrin ûlâ anyi Iehova hnyi lany, hnyi ûen adre me he ûhedra hnyi hnödra hna hunuma hnyin.
35Ke haba hnyi ûen ame hwân tang ka he, haba Mose ame ha, ka habe, Iehova lö, todrö, me me ve se but je iwahnaihmiony mou; me kec gam tavat adre me hukötiö u. 36Ke hnyi ûen ame menâ, me e ame ha, ka habe, Iehova lö, hmetuhmetu ju ka ta je thauzaniny aten Isaraela.
Currently Selected:
Numera 10: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society