Mataio 2
2
1A DRE me hnöku Iesu hnyi Betheleema hnyi hnyei Juda hnyi ta je bong bongu Heroda a than, ke wâ bi, ame o but ta je magoi hnyi Jerusalema ûhedrin jimeyö, 2ke haingödrin, ka habe, Ewa at adre hnokoâ me Tuhan at Juda? anyin a ohmun e wâ but jimeyö anyin okhû, ke ohmun e o but he ka khudrung kâu. 3A long ut Heroda a than, me e ame hlohlo tha e me Jerusalema hia. 4Me e ame ûkhacaköuâ tavat bihut ae nua, me tavat sihnalimen hnyi hnyei, me e ame hnei ödra ge dok adre me he ka hnöku Keriso hnyin. 5Haingödra kâu, ka habe, Betheleema hnyi hnyei Juda: anyin a walang hna sihnalimen hnen perofeta, ka habe,
6Ke haba u Betheleema hnyei Juda,
U ca ûhnyûkong ge je taben hnyi hnyei Juda:
Anyin ame he ka o gam at musi,
At ame he ka muso lakeik a at Isaraela.
7Ke haba Heroda ame hawâ duöngâ ta je magoi, me hnö cicilâ gadrin a manen kehö okhû. 8Ke e ame kunʼ ödrin Betheleema ai, me ha, ka habe, He thʼ öbun ka elâm wia bongon inma; ke öbun ka wâ ju, thumetu nya thö, mʼ inye he minya ka munyi khudrung kâu. 9Ödrin e hia but long hwan than, me ödrin e he but; ke wâ bi, haba okhû waleji ödrin e wâ e jimeyö, ame bân hnyi hnyimaködrin, ke ne o but ame laba cicö hon dok a e hnyin inma. 10Ödrin e wâ okhû, me ödrin e ti senyin gan hmâ. 11Ke ödrin e o thö ka hnyi hnyin uma me wâ inma me Maria a hinyen; ke ödrin e ta ju me khudrung kâu; ke ödrin e khong ut tang omjehedrin me ham kâu je bwihlany, gol, me libanu, me muro. 12A hia but Khong koû ködrin hnyi bwi mʼ ödrin e ca he ka hmetu kö Heroda, me ödrin e he but ka hnyi idrin hnyei hnyi ke gethen bi.
13Ödrin e he but, me wâ bi, ame manen dut angela anyin Than kö Josefa hnyi bwi, ame ha, ka habe, Todrö, hom dö inma me hinyen, ke kec dö Aigupito ai, me laba eling, ke ne o but hnyi ûen oge me he ka thumetu u hnyin: anyin ame he Heroda ka elâm inma he ka hlingâ e. 14Me e ame todrö hnyi hnyinghet me hom inma me hinyen, me he Aigupito ai; 15me laba eling ke ne o but hnyi ûen ame mokcu hnyin Heroda: me me hwâdâ hna ha ge Than a deny perofeta, ka habe, Oge hia but hawâ nokuk ûheny Aigupito. 16A wâ but Heroda a je magoi ödrin e iyawâ e, me e ame hmonyin gan hmâ, me ûkhûnöng he ka hlingâ ta je wanakat hia thithö hnyi Betheleema, ke hnyi je hnyigoulen e, hwân ge tavat a lo hunaidra ke ne o but ka ta je mendreng, hoton ûen e ame hia but hnö wia hnyin ta je magoi. 17Me ame hwâdâ thö hna ha ga Jeremia perofeta, ka habe,
18Adre me long hnyi Rama hwan,
Hwatenge me tenge thungaû,
Rakela ame tenge ge lakon;
Kʼ ame ca tubet bi, anyin ae hiʼ ödrin dut.
19Ke a mokcu Heroda, me wâ bi, ame manen dut angela anyin Than kö Josefa hnyi bwi hnyi hnyei Aigupito, 20ame ha, ka habe, Todrö hom dö inma me hinyen, me he thö ka hnyi hnyei Isaraela: anyin ödrin e mokcu hnyat ödrin e elâm inma he ka hlingâ. 21Me e ame todrö, me hom inma me hinyen, me he ka hnyi hnyei Isaraela. 22Ke e ame long a gʼ ame than biju Arekelao hnyi Juda, hwaban kamen a Heroda, me e ame ot he ka he kâe; ke adre me koû kâu hnyi bwi, me e ame he ka hnyi ke keihen Galilaia, 23me o thö ka hnyi taun a Nazareta ien me laba ju eling: me me hwâdâ thö hna ha ge ta je perofeta, ka habe, Adre me he ka hâiâ e, me e at Nazareta.
Currently Selected:
Mataio 2: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society