Malaki 2
2
1KE walang ang, tavat bihut lö, walang hna hûna hobi köbun. 2Öbun e ne ca he ka long, me ca ip hmâ hnyi hnyekubun, he ka ogânâ iök, haingö Iehova tuhan sabaoth, me oge me he bi nya ka kunâ köbun hnaûhango, ke oge me he ka hangâ hna ha hnahici öbun; eke, oge hia but hangâ, anyin öbun e ca ip hmâ e hnyi hnyekubun. 3Wâ bi, oge me he ka thawâ je hatong gabun, me khino tatet hnyi je hnyimaköbun, wale tatetiny halebun je hut; kʼ adre me he ka tha hom degeci öbun më. 4Ke öbun e he ka wâ a oge me kunâ köbun hna hûna e, me me e unyin at Levi anyik ûhihinyköu, haingö Iehova tuhan sabaoth. 5E unyin anyik ûhihinyköu ge möt me ûsoköu; ke oge me ham e kâu me me he ka ot, me e ame outö nya, me öbubuny ge iök. 6E hnyi hnyimen hnanyibuiny hnathu, ke adre me ca wâ hwakecin ae kong hnyi esongodiny: e ame tha he mönya hnyi ûsoköu me wisa, me ohmeto tavat ae se hia ûnyi hnyi hulö. 7Anyin a hamen li esongodiny at bihut he ka tuö metâ, ke e ûcû he ka elâm hnanyibu hnyi hnyimen: anyin a e ûthumetu anyi Iehova tuhan sabaoth. 8Ke öbun e saû but ûnyi hnyi gethen; öbun e hia but ohavâ tavat ae se hia hnyi hnanyibu; öbun e hia but okongoâ ûhihinyköu anyi Levi, haingö Iehova tuhan sabaoth. 9Anyin a wale oge hia but wiʼ öbun hnân hûkötiâ me kong hnyi hnyimakan tavat hia, hoton hnobun hna ca tuö dek je gethen, ke öbun e ûciâköuâ ge hnanyibu.
10Hawa, ca khaca kamöta hia? a ca up ota hnen Khong a khaca? anyin a ieû ate me ûiyawököu, me okongoâ ûhihinyköu anyin lakamöta? 11Juda ame hia but iyawö, ke adre ânyâ ûnyi ae ikiki hnyi Isaraela me Jerusalema; anyin a hia but Juda okongoâ ûnyi ae kap waleji e ame hnyok kâu, me hom hlu nokon khong kanyua me âiân. 12Ame he Iehova ka subâ degecâ at ame ânyâ e, wale at ame tue me at ame thu, hnyi je uma mano umo Jekob, me at ame hudo hut kö Iehova tuhan sabaoth. 13Ke wale minya ang hnobun hna ânyâ: öbun e tube taben hut anyi Iehova ge dân ecmak, me tenge, me mâng, me me ca wâ hmetu hut, me ca kap senyinâ e ûnyi gabun. 14Ke öbun e ha ka habe, Anyin a ieû? Anyin a Iehova ame hia but ohnathoâ gam me âiân ânyâm hidröu waleji u je iyawöâ, ke e bi lihum möu, me âiâm u je ûhihinyköu më. 15Hawa, e ame ca ânyâ ûnyi a khaca, ke e unyin kolon hanu? Ke at a khaca geû? Anyin e ame elâm mâtrân ae so. Anyin a wale, tuö ju je hanubun, me ca he ke at ka iyawâ âiân anyin hidröu. 16Anyin a haingö Iehova Khongon Isaraela, ka habe, Hûkötiânök he ka digic ta momo, me at ame tube khaûen ge ûokonguny, haingö Iehova tuhan sabaoth: anyin a wale tuö ju je hanubun me me ca iyawö.
17Öbun e hia but ohmakö Iehova ge je ifucibun. Ke haingöbun, ka habe, Öhmun e ohmakâ e ge ieû? Anyin öbun e ha, ka habe, E so kö Iehova tavat hia adre me ânyâ hulö, ke e ame senyin kodra; ke haingöbun, ka habe, Ewa Khong at ame owisa?
Currently Selected:
Malaki 2: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
