Luka 12
12
1HNYI ûen eling ame ûkhacaköu tavat ae se hia je thauzan, ke adre me iutiödraköuödra, me e ame hwân ka ha bânâ ka laten, ka habe, Ö ʼbun âu ge leven anyin ta je Faresaio wale thoi. 2Anyin ae ba ûnyi adre me ikhâlâ ame ca he bi ka manen: ke ba ûnyi ae iyong adre me ca he ka wâ. 3Anyin a wale, adre me he ka long hnyi lany, ûnyi öbun e hia but ha hnyi lit; ke adre me he ka khetâ hon je uma hnobun hna ha ka hnyi hnyekönyen hnyin hnyeule. 4Ke inya oge me ha köbun lahanök, ka habe, Ca ot bi gadra adre me hlingâ unyin, ke ba minya hnödra hna khana he ka ânyâ. 5Ke oge me he ka kû köbun at öbun e he ka outen: Outen ju e at ae tren man he ka khûâ hnyi gena, at ka hia but hlingâ; eke, inya oge me ha köbun, outen ju e. 6Hawa, adre ca ûco bi je wahelö a thabûng hwaban li asari? ke Khong ame ca hnying ke at gadra. 7Ke adre hia but aû je leûnen böbun. Ca ot, anyin a öbun beönua hon ta je wahelö ae se hia. 8Ke inya oge me ha köbun, ka habe, Haba at ame he ka haiö nya hnyi hnyimakan tavat, me ame he Nokon at ka hâiâ e hnyi hnyimakan ta je angela anyin Khong: 9ke haba at ame he ka ivinö nya hnyi hnyimakan tavat, me adre me he ka ivinoâ e hnyi hnyimakan ta je angela anyin Khong. 10Haba at ame he ka bifuco Nokon at, me adre me he ka hna e: ke haba at ame he ka haikongoâ Hanu Kap, me adre me ca he ka hna degecâ e. 11At ka hum öbun ka hnyi ta je sunago, me ka tavat owisa, me ta je musi, ca ûnykûme bi, ka habe, ieû hnân thu, me ieû hnân he ka ha: 12anyin ame he Hanu Kap ka nʼ öbun ge ûnyi hnân he ka ha hnyi ûen eling.
13Ke ame ha kâu hnen ke at hnyi tavat ae se hia, ka habe, At Ûne lö, ha thö ka liamekeiny mönya he ka tha khenâ mönya jekhöûhmu. 14Me e ame ha kâu, ka habe, Ketha lö, ia otilö nya hnân he ka owisa me khenâ köbun? 15Me haingen ködra, ka habe, Wâ eaû, tuʼ öbun ju, wâ Öbun nye behnyekon: anyin ame ca möt at ge ûganiny ta je ûnyi ame hu kâu. 16E ame ha ködra ûhöûcû, ka habe, ame gan troban kânân ke at ae tren omjeû: 17me e ame ûnykûme eû hnyi hnyekon, ka habe, Ieû oge me he ka ânyâ, anyin ae ba hnen anyik ta je ûnyi? 18Ke haingen, ka habe, Walang ûnyi oge me he ka ânyâ, oge me he bi nya ka luâ ta je omhanik, me otilâ gânâ; ke oge me he ka ukhöûnâ eling troban ik hnyei, me anyik ta je ûnyi 19Mʼ oge me he ka ha ka hanuk, ka habe, Hanuk lö, e se hia ta je ûnyi adre ûkhöûnâ hobi köu hnân ta je huna ae se; ö u menâ, han me ic me senyin. 20Ke haba Khong ame ha kâu, ka habe, U at ae monu, adre me he ka hom hanom hnyi lit ang; ke hobi kö ia bi ju ta je ûnyi u je penapena? 21E ûcû at ang me at ame ka ip tang omjeû hobi kâu e bi, ke ba bi tang omjehen unyin Khong.
22Ke haingen ka laten, ka habe, Waleling me oge me ha köbun, ka habe, Ca mē ûnykûme bi ge anyibun möt, wale ge hnöbun hna he ka han; ke unyibun, wale ge hnobun hna he ka khavâ. 23Anyin ae beönua möt hon jeû, ke unyin hon ûkhaû. 24Ûnykûme ju öbun ta je meköta, wale adre me ca hnyi belök me menu; ke ba umödra uma hnân hip ûnyi, me omhanidra; ke Khong ame ha ö ʼdra: ke hawa gabun, e ca beönua öbun hon ta je meno ame gâ? 25Ke ie ke at gabun ae khana he ka bi hanen hna thu beny ka hnyi ibeûen, anyin ame ka weny bi? 26Anyin a wale, a ne ca khanʼ Öbun he ka ânyâ ûnyi ae ûhnyûkong, ieû can gabun a öbun e ûnykûme ûjengoâ ka hnyi ke ta je ûnyi? 27Ûnykûme ju öbun ûkûiny ta je ibedila, adre me ca huliwa bi me amo; ke inya oge me ha köbun, a haba Solomona hnyi anyin hmanenang hia, me ame ca khaû bi helâe. 28Ke a ne khavâ Khong hnyot helâe, wale a e bi hnyi hnyei hnyi bong ang, ke nyi adre me he ka khûâ ka hnyi wahnainyâ; hawâ, e ca ûnyi hnathu kâu he ka okhaûʼ öbun hnyat ame labageju ûhnyûkong? 29Ke ca elâm öbun hnobun hna he ka an me ic, ke ca loloâ bi. 30Anyin a haba ta je ûnyi e, me ame elâm minya aten ta je hnyei: ke e khana Kamöbun ae ûcû köbun ta je ûnyi e. 31Ke so bi elâm bi thʼ öbun dokhon dokhu, ke adre me he ka ham minya köbun ta je ûnyi e. 32Hnahat mamoe ae wakhalet lö, ca ot bi, anyin ae weny Kamöbun he ka ham köbun dokhu. 33Ûco thö anyibun ta je ûnyi me ham hnân ibetengiö; ânyâ ju je tang mone ae nâk hobi köbun, wale tang omjeû hnyi drany ame ca ba balua bi, ame ca hakekenyâ at ae venöu, kʼ ame ca okongoâ minya bi hnen nokon walelaba. 34Anyin a haba hna ip tang omjehebun hnyin wale bi e minya je hnyekubun.
35Hûkâlâ ju wen je hnyekubun, ke so e umumelam anyibun je lamepa; 36ke so öbun e tha ûcû me tavat adre me halubahingen tuhödra ûheny hnyi hna faipoipo; me adre me he ka ie khöng kâu, e ka o ka seseto. 37Hnahic hnen je athnyaba, wale e ka o than ka ō ʼdrin, ödrin e hmâkâ: e hnathu inya oge me ha köbun, e ame he ka hûkâlâ wen hnyekon, me olabʼ ödra ju, me he but he ka bi athnyaba kodra. 38Ke a ne o hnyi awa a loiny, ame ne awa a kuniny, me ō ʼdrin, ödrin e helâe, hnödrin hnahic. 39Ke wâûnykûme ju öbun ang, a ne khana tuhan uma ûen ame he ka o hnyin at venön, ame ne hia but hmâkâ, me e ame ca hna bi umen uma mʼ adre me he ka kia e. 40E so öbun e laba metâ minya: anyin ame he ka o but Nokon at, hnyi ke ûen öbun e ca ûnykûme bi.
41Haba Peteru ame ha kâu, ka habe, Than lö, u me ha ûhöûcû ang kohmun, hawa u me ha ka tavat hia minya? 42Haba Than ame ha, ka habe, Ewa athnyaba ae hnathu me metâ, wale hnen tuhan hna otilâ he ka muso hnyaban, he ka khenâ jeû a jekhöûdrin hnyi ûen? 43Hnahic hnen athnyaba eling, e ka o tuhan me wâ a gʼ ame ânyâ helâe. 44E hnathu oge me ha köbun, ka habe, e ame he ka otilâ e he ka musö anyin ta je ûnyi hia. 45Ke a ne ha athnyaba eling eû hnyi hnyekon, ka habe, E tiga bec tuhok; kʼ ame ne hwân he ka kot je athnyaba obaga me omomo, me he ka han me ic, me ic monu; 46awe, ame he ka o tuhan athnyaba eling hnyi bong e ame ca ûnykûme, ke hnyi awa e ame ca wâhmakhmeto, me ame he ka subâ luâ e, me ham kâu jekhon unyin tavat adre me ca ûling. 47Ke haba athnyaba wale ame wâhmakhmetoâ weny tuhan, kʼ ame ca penapena bi, kʼ ame ca ânyâ ûnyi ae ûcû me weny, me adre me he ka osehia kot; 48ke haba at ae ca khana, kʼ ame ânyâ ûnyi ae ûcû he ka kot hnyin, me ame he ka wakhalet hna kot e. Ke haba at adre me ham gânâ kâu, me adre me he bi ka elâm gânâ unyin: ke haba at adre me ip gânâ unyin, me adre me he bi ka hawâ gânâ kâu.
49Oge me o but he ka khûâ meic ka hnyi hmeledrany; ke ieû wek, at ka hia but vâc walang ang? 50E ka hu bapataiso hobi könya a gʼ adre me he ka bapataisoi nya kâu; e pason anyik, vec ke ne o but ame hwâdâ thö e. 51Öbun e ûnykûme la, a oge me o but he ka ham hnahic ka hnyi hmeledrany? Inya oge me ha köbun, e ba, ke so bi hna oveseâ: 52anyin adre me he ka hwân walang ang he ka kia hnyat a thabûng, ödrin e tha laba hnyi uma a! khaca, haba kun, me ama iwahnaihmiony me lo, ke haba lo, me ödru me iwahnaihmiony me kun. 53Adre me he ka ve kia kamen me nokon, ke nokon me kamen; ama iwahnaihmiony hinyen me nokon hlu, ke nokon hlu me hinyen; ame he ka iwahnaihmiony ûngon me ûngon hlu, ke ûngon hlu me ûngon.
54Ke e ame ha minya ka tavat ae se hia, ka habe, Öbun ka wâ ûlâ ame o ûheny jimeû, me öbun e ie ha, ka habe, We but ang; ke ka e bi. 55Ke e ka si thö ang a hwaiöu, me haingöbun, ka habe, Ame he ka gan seûno; ke ka e bi. 56Öbun hnyat thoi, e khanʼ öbun he ka wâhmakhmetoâ hmeledrany me drany; ke hawa bi ang öbun e ca wâhmakhmetoâ ûen ang? 57Ke ieû gabun öbun e ca wâhmakhmetoâ bi wisa? 58Ke u ka tha he me iwahnaihmöny möu ka at owisa, wâ wia eû hnyi gethen me me hnö u but; wâ e nye lili u thö ka at owisa, ke at owisa ame hnö u but ka at tue, ke at tue ame khûö u thö ka hnyi uma ceat. 59Inya oge me ha köu, u me ca he ka dit ûhem e, ke ne o but u me ham je ong mone hia.
Currently Selected:
Luka 12: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society