Isaia 3
3
1A NYIN a wâ bi, haba Than Iehova tuhan sabaoth, ame hom ûnyi Jerusalema me Juda ke ci me ke ci, wale je ci areto hia, me je ci köiö hia; 2me at hwege, me at vat; me at owisa, me perofeta, me at bi khong, me hingat; 3me taben ka fifte, me at lung so, me obongon, me at tretrau ae metâ, me at ae khana khet. 4Ke oge me he ka ham ta je wanakat me hnân tuhödra, ke ame he ta je mendreng ka musi ödra. 5Ke ame he tavat ka ûöveciköu, ke at me ke at: ame he wanakat ka bi gan ka hingat, me hoûmonu ka je than. 6Ke ame he at ka kât liamekeiny mē hnyi hnyaban kamen, me ha, ka habe, E hu ûkhaûâm, u me he ka tuböhmun, ke u me he ka muso monu ang: 7ke haba hnyi bong eling e ame he ka hongot goranyai, me ha, ka habe, Oge me ca he ka bi anyin, anyin ae ba jeû me ûkhaû hnyi umök uma; ca he öbun ka otilö nya bi hnân than thaniny hnyei. 8Anyin ame hangâ but Jerusalema, ke Juda ame ü: anyin ae iwahnaihmiony me Iehova je bohmödra me anyidra je huliwa, he ka ohinyâ li emakan ae hmanenang. 9Ame omanenʼ ödra hnen ta je hnyimakodra; ke adre me omanenâ anyidra hulo helâ me Sodoma, adre ca ikhâlâ bi. Ekölö ge hanudrin! anyin adre me hia but bi hwaban hulo kodra bi. 10Ha thö ka at ae wisa hwakeciu, ka habe, ame he ka hu so gan; anyin adre me he ka an wan anyidra huliwa. 11Ekölö ge at ae monu! ame he ka hu kong gan; anyin adre me he ka ham kâu hwaban li hnyamen. 12Ke haba lakeik, ame sedʼ ödra hnen je wanakat, ke ame musi ödra hnen je momo. Lakeik lö, a omonu u hnen tavat adre me su u, me ohia dem ta je gethen. 13Ame todrö Iehova he ka! ivino, e ame tot he ka owisa ta je hnyei. 14Ame he Iehova ka he me owisa ka wahingatiny lakeiny, me latuhödra; ka habe, Öbun e hia but an hia hnyei vine; ke eio hnyi umöbun je uma ta je ûnyi adre hûgûnâ ge tavat ae theduoc: 15ke ieû gabun öbun e okongoâ lakeik, me omomono hnyimakan ta je theduoc? haingö Iehova tuhan sabaoth.
16Ke ame ha Iehova, ka habe, Can anyin ame hop wahluiny Ziona, kʼ adre me he me obeûâ je nyidra, ke iyawo li ecmak, ke he hop, ke ocuha je omakhmâiny cadra: 17anyin a wale ame he Than ka kot wanben je hodra ge oholök, kʼ ame he Iehova ka omanenâ je unyidra. 18Ke haba hnyi bong eling, me ame he than ka hûgûnâ je mecin je ohmakhnainy je cadra, me je boert, me je omjehedrin e ûcû me ong tehi; 19me je ûnyi adre ohima, me je waen, mē je ûnyi hnân tubi hnyimak; 20me je hnabecin, me je omjehen li cadra, me je wen hnyok, me je kaia hnân hnulâ, me je ong khong; 21me je wen banyen, me je otru hnân hnyingoidra; 22me je ûkhaû ae hmanenang, me je ûkot, me je mano hnân tube, me je tang; 23me je ong uselat, me je lino ae ûhnyûkong nân, me telenuiny ban, me je ûkhaû ae halelöû. 24Ke ame he ka hu bebong hwaban bo so; ke tö ae gan nân, hwaban wen hnyok; ke hadreû, hwaban hna theibâ ban; ke hnamöc a mano ae gan nân, hwaban ûkhaû ae laû; ke delâ, hwaban hmainy hnyimak. 25Ke ame he je obaga unyâm ka ta ge hele vat, ke tavat hwege bi hnyi vat. 26Kʼ ame he je homagouleny ka tenge me hlöuhlöu; ke e ame he ka laba eû hnyi kânâ ke ba at unyin.
Currently Selected:
Isaia 3: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society