Genese 13

1HABA Aberama ame he but ûheny Aigupito, e, me âiân, me anyin ta je ûnyi hia, me Lota minya, ka hnyi Hwaiöu. 2Ke Aberama ame tren omjeû ae gan hmâ wale je meno, me sileva, me gol. 3Ke e ame hok tot ûheny hnyi Hwaiöu ke ne o but Bethela, ka hnyi dok adre ip umen uma mano hnyin a bân, wanben Bethela me Ai; 4me ka hnyi dok e ame otilâ hnyin taben hut a bân: ke hnyi dok eling Aberama ame hawâ iö Iehova. 5Ke e hu minya ga Lota, at ame tha he me Aberama, ta je mamoe, me kâu, me je uma mano. 6Ke ca ûcû ödru hnyei ka tha laba: anyin ae gan hmâ omjehedru, me me ca khanʼ ödru ka tha laba. 7Ke e hu iwatretra ge hnyat tuö meno hale Aberama, me hnyat tuö meno hale Lota: ke at Kanana me at Perizi adre me ka laba hnyei. 8Me haingö Aberama kö Lota, ka habe, E so e me ca hu iwatretra gatu, ke ûnyi ge hnyat tuö halek je meno, me hnyat tuö halem: anyin a ötu liamekeiny. 9Hawa, e ca e hnyei hnyi hnyimâkâm? e so ötu na ûsâkâûö: u ka he but ka hnyi ke keihen a me, awe, oge ma he bi nya ka hnyi ke keihen a metâ; ke u ka he ka hnyi ke keihen a metâ, awe, oge ma he bi nya ka hnyi ke keihen a me. 10Haba Lota ame bwele me wâ dok ae thahon hia hnyi Joridano, a gʼ ame hu köiö hnyi je ke keihen hia, ke tiga ca ohia Sodoma me Gomora hnö Iehova, helâke hnyei i Iehova, helâke hnyei Aigupito, gethen Zoara ai. 11Me haba Lota ame ûca hobi kâu bi dok ae thahon hia hnyi Joridano: me Lota ame hok tot deiö, ke ödru me ûsâkâûö but. 12Haba Aberama ame laba hnyi hnyei Kanana, ke Lota ame laba je taun hnyi dok ae thahon, me sukhöûnâ umen uma mano ke ne o but Sodoma. 13Ke e kong at Sodoma, ke beönua anyidra monu hnyi hnyimakö Iehova. 14Haba Iehova ame ha kö Aberama hwaban hna ûsâkâûö a e me Lota, ka habe, Bwele thö, me wâ eang dok u me tot hnyin ka hnyi hwadrö, me hwaiöu, me deiö, me jio: 15anyin a haba hnyei hia u ma wâ, oga ma he ka ham köu, me je mâtrânâm nyiele balua. 16Ke oge me he ka wia ta je mâtrânâm, me me helâ me sesâiny kânâ: waleling me a ne khana ke at he ka aû sesâing kânâ, me adre me he minya ka aû ta je mâtrânâm. 17Todrö, vheno thö hnyei hnyi ibeûen me ûlauen; anyin oge me he ka ham e köu. 18Me Aberama ame oc umen uma mano, me o but me laba hnyi sawajo anyi Mamere, wale hnyi Heberona, kʼ ame otilâ eling ke taben hat kö Iehova.

Currently Selected:

Genese 13: IAAI

Highlight

Copy