Ta je huliwa 25

1AME o but Feso ka hnyi hanymen, ke hwaban kun ta bong e ame he but Jerusalema ai ûheny Kaisaria. 2Ke haba je taben tavat bihut, me je taben at Juda, me adre me haiö Paulo kâu; ke adre me khöû kâu, 3me sumâtâ e he ka betenge kodra hu Paulo, me he ka kunâ e Jerusalema ai; mʼ adre me he ka mokut duöng eû hnyi gethen he ka hlingâ. 4Ke haba Feso ame thu, ka habe, Adre me tuö Paulo hnyi Kaisaria, ke ca kueny bi me oge me he ka he but kâe. 5Ke haingen, ka habe, Anyin a wale hamen tavat ae ûnyi hnathu unyibun he ka tha he mönya, a ne hu konginy at e he ka hâiâ.

6Ke a hia but laba unyidra ame ne eit ame ne ten ta bong, e ame he but Kaisaria ai; ke nyi e ame laba hon taben owisa, me ûkhûnöng he ka hawo Paulo. 7Ke e ame o but, kʼ ame tot igigilo e at Juda adre me utut ûhedra Jerusalema, me bi fuci Paulo ge ta je ûnyi ae hmak, ke ta je ûnyi ae se, ke ca khanʼ ödra he ka ohnatho; 8ke haba Paulo ame haiwisa e bi, ka habe, Oge me ca ânyâ ke ong monu bi ka hnyi hnanyibu anyin at Juda, ka ba minya ka hnyi uma kap, ke ba minya bi kö Kaisara. 9Ke haba Feso ame weny he ka osenyinâ at Juda, me e ame thu kö Paulo, ka habe, E wem he ka he Jerusalema ai, mʼ adre me he ka hnö eling ta je ûnyi hnyi hnyi-makök? 10Haba Paulo ame ha, ka habe, Inya but ang oge me tot hnyi hnyimakan taben owisa anyi Kaisara, wale ae ûcû he ka hnei nya hnyin: e ba monu oge me ânyâ ka at Juda, e khanö u wia but e. 11Ke a ne hu anyik monu, me ke ûnyi oge ânyâ ae ûcû könya he ka mok hnyin, iny ca höcö bi he ka mok: ke e ka ba hnathu hnyi ta je ûnyi adre me bi fuci nya hnyin, e ba minya at ae khana he ka hnö nya kodra. Inya oge me hawo Kaisara. 12Ke a hia but Feso ûsabö me hnyat ûhnenamö, e ame thu, ka habe, U me hawo Kaisara; awe, u me he ka he but kö Kaisara.

13Ke hwaban ke je bong ame o but hnyi Kaisaria Ageripa than me Berenike me iouny me Feso. 14Ke se hia je bong ödru me laba eling, haba Feso ame haimemenâ ka than ûnyi ame kû kö Paulo, me ha, ka habe, E hu ke at adre ca ame hna ang bala hnö Filiki: 15ke tiga inya bi hnyi Jerusalema, haba je taben tavat bihut me wahingatiny at Juda adre me hâiâ e, me sumâtâ he ka bi hwaban kâu. 16Me oge me thu kodra, ka habe Ca hwakecin at Roma he ka hna ke at ke tiga ca um bi ûhnyimakanköu at adre bi fuco, me tavat adre me bi fuco e, me me hu ûen he ka haiwisa e bi ge hna bi fuco e. 17Anyin a wale adre me o but eang me oge me ca bec, ke haba nyi oge me laba hon taben owisa, me ûkhûnöng he ka hawâ e jem. 18Ke a hia but tot tavat bi fuco e, me ba thö monu ödrin e omanenâ helâ me hnok hna ûnykûme; 19ke adre me hâiâ e hnyi ke je ûnyi hnyi anyidra hmi, me ke at Iesu ien, waleji a mokcu, ke haingö Paulo bala bi, ka habe, a möt dö. 20Ke inya oge me loloâ hna ûhnö ta je ûnyi e, me oge me hnö e, a ne weny he ka he Jerusalema ai, mʼ adre me he ka hnö eling ge ta je ûnyi eling. 21Ke Paulo ame ha weny he ka kap hna owisa ûnyi ga than tot, me oge me hûna he ka tuö e ke ne o but oge me he ka kunâ e kö Kaisara. 22Haba Ageripa ame ha kö Feso, ka habe, Iny behe minya ka long at e. Haingen ame ha, ka habe, nyi u me he ka long e.

23Haba nyi ame o but Ageripa me Berenike me hmanenang ae gan, me didro ka hnyi dok adre me long hnyin, me je taben ae nua, me je at hnathuiny taun, haba Feso ame ûkhûnöng he ka hawo Paulo. 24Haba Feso ame ha, ka habe, Than Ageripa lö, me tavat hia eang a tha ödra mʼ öta, öbun e wâ at eang, hnen tavat Juda a ödra se hia hna bi fuco e könya hnyi Jerusalema, me eang minya, adre me ha, ka habe, e ca ûcû hmetu bi he ka möt. 25Ke oge me ca wâ ke ûnyi a ânyâ me me ûcû he ka mok: ke so bi e ame hia but hongot ka than tot, weleling me me mou thö hnyekuk he ka kunâ e. 26Ke ba ûnyi ae ûnyi hnathu gan oge me wâ he ka sihnalimen ka tuhok. Anyin a wale oge me hawâ e jem ka hnyi hnyimaköbun, ke hnyi hnyimâkâm taböny than Ageripa, me inya wâ thö ke ûnyi hnân sihnalimen, hwaban hna hnö e. 27Anyin oge me ûnykûme ae ca so bi he ka kunâ at adre me ca, kʼ adre me ca omanenâ bi can adre me hâiâ.

Currently Selected:

Ta je huliwa 25: IAAI

Highlight

Copy