II. Thesalonika. 2
2
1ÖHMUN e ûjongi öbun hnyat me lakeiny, wale ge ioiny hmetu Tuhöta Iesu Keriso, me hna ûkhacaköu öta kâu; 2ka habe, ca ie bwebwet bi je hnyekubun, ke ca loloâ minya bi, wale hnen hanu, me hofuc, ke ca hnen minya bi tusi, helâke ûnyi gahmun, ke helâke me hakekeny jut bong bonginy Than; 3ca he ke at ka iyâwʼ öbun bi ge ke ûnyi: anyin ame ca he ka o bong eling, e ka ca bân ka o kolu but a tavat, me adre me he ka omanenâ but aten hulo, wale aten hnaûhango, 4wale at ame bi iwahnaihmiony, me ka hamen ogö-ranyâ e hon ta je ûnyi hia thithö adre me ha me Khong, me hna khudrung kâu; waleling me me laba hnyi uma umen Khong, me ka omanenâ e bi, ka habe, e Khong. 5Hawa öbun e ca ûnykûme, a oge hia but ha ta je ûnyi eang köbun, waleji ke tiga inya bi unyibun? 6Ke walang ang e khanʼ öbun ûnyi at ame ovhelâ, me me he ka manen dut e hnyi anyin bi ûen. 7Anyin ame huliwa walang ang ûnyi ae iyong hnyi hulo: ke e hu at ame ovhelâ walang ang, ke ne o but adre me hom e. 8Ke hnyi ûen eling ame he ka manen dut at ame ânyâ hulo, wale hnen Than Iesu hna he ka hlingâ ge homenâiny hnyimen, me he ka ohia ge unyin ae manen dut e ka o but; 9haba ioiny me hoton huliwa anyi Satana, me man hia thithö, me ta je haten, me ta je ûöman ae thoi, 10me tang iyawo hia thithö hnyi hwakecin ae ca wisa bi unyin tavat adre me he ka hnaûhango; anyin adre me ca kap hnyok ka hnyi hnathu, mʼ adre me he ka möt. 11Ke can thibi e, Khong ame kunâ kodra he ka huliwan monu, mʼ adre me he ka kap thoi: 12mʼ adre me he ka bi hwaban kodra hia thithö, tavat adre me ca hnyi kap hnathu, ke adre me senyin bala bi ka hnyi hwakecin ae ca wisa.
13Ke hamöhmun he ka oleâ bala bi gabun, hnyat me lakeiny a laoûnykûminy Than, anyin a Khong ame ûcʼ öbun ûnyi hnyi can he ka möt, hnyi hna okabâ hnen Hanu, me he ka kap hnathu. 14Waleji e ame hawʼ öbun ka hnyin hnen anyihmun ûthumetu ae so, me öbun e he ka hu hmanenanginy Tuhöta Iesu Keriso. 15Anyin a wale, hnyat me lakeiny lö, tethmâ ju, ke kât hmâ ju hna hûna waleji adre nʼ öbun kâu, ame ne hofuc, ame ne anyihmun tusi.
16Ke hanymen Tuhöta Iesu Keriso, me Khong a Kamöta at ame betenge gata me ham köta hnahic ame ca ba balua me geju ae so hnyi ibetengiö baû, 17hamen he ka okahwa je hnyekubun me otethmâ hnyi ta je huliwa ae so me hofuc ae so hia thithö.
Currently Selected:
II. Thesalonika. 2: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society