II. Samuela 3
3
1KE ame vat beû hmâ, lap anyi Saulo me lap anyi Davita: ke Davita ame hwege tot, ke ame ngâ tot lap anyi Saulo. 2Ke Davita ame hnokoâ lakon obaga hnyi Heberona: Aminona nokon a bâu, nöku Ahinoam momo Jezerela; 3ke Kile-aba ûtangköu mē, nöku Abigaila, safaci Nabala, at Karemela; ke Abasoloma a kuniny, nöku Maaka, momo nöku Talemai than Gesuri; 4ke Adonia vakiny, nöku Hagitha; ke Sefatia a thabûnginy, nöku Abitala; 5ke Itherama a siksiny, nöku Egela öiö Davita. Adre hnöku ödrin ga Davita hyni Heberona.
6Ke hnyi ûen ae tiga hu vat ge lap anyi Saulo me lap anyi Davita, me haba Abinera ame sihwegiâ e bi singiny lap anyi Saulo. 7Ke e hu ke momo anyi Saulo, adre hwenyi ien me Rizepa, nöku Aia: ke Ise-boseth ame ha kö Abinera, ka habe, Ieû gam u je hom momo anyi cica? 8Me Abinera ame ti hmonyin can hofuc ho Ise-boseth, me ha, ka habe, Hawa, iny ban kuli anyi Juda? Haba hnyi ûen ang oge me omanenâ ibetengiö ka lap anyi Saulo a kâmâm, me je liamekeiny mē, me je lahanen, me ca hnö u ka hnyi hnyamö Davita, ke so bi u je he hnyi bong ang ka haikongu nya me momo ang? 9Hamen Khong he ka ânyâ helâe kö Abinera, me bi hanen minya, oge ne ca he bi nya ka ânyâ kö Davita helâ me Iehova ame khemanyin kâu; 10he ka wia dökhu ûnyi hnyi lap anyi Saulo, me otilâ theron anyi Davita hon Isaraela me hon Juda, hwân hnyi Dana ke ne o but hnyi Bere-seba. 11Me e ca khana he ka thu kö Abinera ke hofuc a khaca, anyin a e ame outen. 12Haba Abinera ame kunâ je ûthumetu kö Davita, a ka ûnyi gan bi, ka habe, I ia hnyei? haingen minya, ka habe, U me he ka ânyâ ûhihinyköu mönya, me wâ bi, ame he hnyamok ka tha e möu ke ka wia köu Isaraela hia thithö. 13Me haingen, ka habe, E so, me oge me he ka ûhihinyköu möu: ke so bi khaca thibi ûnyi; oge me wek gam, ka habe, a u me ca he ka wâ hnyimakök u ka ca hum Mikala nöku Saulo jem, u ka he jem, ka iouny mönya. 14Ke Davita ame kunâ je metâ i kö Ise-boseth, nöku Saulo, he ka ha, ka habe, Ham dö könya öiök, jia Mikala, waleji oge me bi sâniny ge je unen unyin ai Filisiti a wan haded. 15Me haba Ise-boseth ame kunâ je uthumetu he ka hom e anyin âiân baga jia Paletiela nöku Laisi. 16Ke ame tha he baga me âiân, kʼ ame tenge hoton, ke ne o but hnyi Bahurim. Me wale Abinera ame ha ka baga, ka habe, Hmetuhmetu ju: me e ame he hmetu.
17Ke haba Abinera ame ûhnenamö me wahingatiny Isaraela, me ha, ka habe, Haba ehac öbun e elöm Davita me me tuböbun: 18awe, ânyâ thö walang ang: anyin a Iehova ame hia but ha ga Davita, ki habe, Oge me he ka omelö lakeik a at Isaraela ûnyi hnyi hnyamen at Filisiti, me ûnyi hnyi hnyamen je iwahnaihmiony mö-îrin ge hnyamö Davita athnyabaik. 19Ke Abinera ame fuc minya hnyi hnyikonyen at Beniamina: ke ame he minya Abinera ka fuc hnyi hnyikönyö Davita hnyi Heberona ge ta je ûnyi hia ae so kö Isaraela, me lap hia anyi Beniamina. 20Me Abinera ame o kö Davita hnyi Heberona, ke tha e me tavat a twente. Ke Davita ame ânyâ bijeû hobi kö Abinera me anyin bunyen. 21Ke Abinera ame ha kö Davita, ka habe, Oge me he ka tot me he, me ûkhacaköuâ ka than a tuhok Isaraela hia, mʼ ödrin e ûhihinyköu möu, me u me musi ködrin hia hoton wem. Me Davita ame kunö Abinera; me e ame he hnyi hnahic. 22Ke wâ bi ame o but lakei Davita me Joab ûheny hnyi hna hnu vat, me oâ je ûnyi adre sö ae gan: ke hiö Abinera unyi Davita hnyi Heberona; anyin a hia but kunâ e, kʼ ame he but hnyi hnahic. 23Ke hnyi ûen ame o but Joab me utbavat hia unyin, adre me ha kö Joab, ka habe, A mwi ang Abinera nöku Neri, a he ka wâ than, ke e a hia but kunâ e, me a be but hnyi hnahic. 24Haba Joab ame o ka than, me ha, ka habe, Ieû ang u je inyâ wâ bi a o köu Abinera; anyin a ieû u je kunâ e, ke a he but eja? 25E khanö u Abinera nöku Neri a ga o he ka iyawö n, me wâhmakhmeto hnâm hna didrut me didrö, me he ka wâhmakhmeto ta je ûnyi u me ânyâ. 26Ke ame didrut Joab ûheny unyi Davita, me e ame kunâ je ûthumetu hotu Abinera, ke ödrin e ohmeto e ûnyi hnyi an Sira: ke ca khanö Davita bi. 27Ke ame hia hmetu Abinera Heberona ai, me haba Joab ame tha saû but mē hnyi homagöule he ka ûhnenamö duöng, me ame dâ e eling hnyi hnyekon, me ame mokcu, can drö Asael liamekeiny mē. 28Ke hwaban e Davita ame long me ha, ka habe, Iny gufa me dökhuk dökhu hnyi hnyimakö Jehova nyiele balua ge dra drö Abinera nöku Neri: 29e so e he ka takoû bö Joab me lap hia anyin kamen; ke ame ca he ka hia ûnyi hnyi lap anyi Joab at ame hingölö, me lepera, me at ame ci, me at ame ta ge hele vat, me at ae ba jeû. 30Ke Joab me Abisai liamekeiny mē ödru me hlingö Abinera, can e ame hlingö Asael liamekeiny mödru hnyi Gibeona hnyi vat.
31Ke haba Davita ame ha kö Joab, me tavat hia unyin ka habe, Kia but anyibun je ûkhaû, me weikâ ec mano ae gan nân, me tengiö Abinera. Ke haba Davita a than ame he hoton taben komok. 32Ke adre me konim Abinera hnyi Heberona: ke ame tenge goranyai than hnyi hu Abinera; kʼ ame tenge tavat hia. 33Ke than ame tengiö Abinera, me ha, ka habe,
Hawa, e ûcû Abinera he ka mokcu helâ me imekiny at ae monu?
34Adre ca ca li hnyamâm, me inâ li cam hnyi wen a fao:
Helâ me at ame ta hnyi hnyimakan tavat ae kong, me u je ta helâe.
Kʼ ame tenge hmetu bi tavat hia gan. 35Ke ame o but tavat biâ ka kunö Davita ka han falawa e me tiga lany; ke Davita ame khemanyin, me ha, ka habe, Hamen Khong he ka ânyâ helâe könya me bi hanen minya, oge ne kâlâ falawa, ame ne ke jeû bi, e ka tiga ca dit bi seûnö. 36Ke haba tavat hia adre me wâhmakhmeto e, ke so hwakecin kodra bi: ke haba khaca, ame senyin bi tavat ge ta je ûnyi hia a ânyâ than. 37Me ame wâhmakhmetoâ hnen tavat hia me at Isaraela hia hnyi bong eling a ca ûnyi ge than he ka hlingö Abinera nöku Neri. 38Ke haingen than ka lakeiny, ka habe, Hawa, e ca khanʼ öbun a ga ta but ke taben me at ae gan hnyi bong ang hnyi Isaraela? 39Ke iny sēnyin dut hnyi bong ang, eja ke ne adre me hia but hû nya hnân than; ke ti hmak könya li at ang a li laku Zeriua: e so Iehova ame he ka bi hwaban ka at a ânyâ hwakecin ae kong hoton anyin bi monu.
Currently Selected:
II. Samuela 3: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society