I. Korinito 2
2
1HNYAT me lakeiny lö, haba ge imwik e unyibun, me oge me ca tha o me hofuc ae hmanenang me metâ, hnyi hnok hna omanenâ köbun ûnyi ae iyong anyin Khong. 2Anyin ae mou but eû hnyi hnyekuk ehac, a gʼ ame ca he ka khanö nya ke ûnyi unyibun, ke hake Iesu thibi a gʼ adre osatauroâ ehac. 3Ke inya unyibun hnyi sēnyin, me ot, me öbubuny ae gan hmâ. 4Ke haba ifucik ke hnok hna khetâ, me ca hnen bi hofuc ae senem hnyi metâ, ke ame kû hnen Hanu me man: 5me me ca he ka e hnyi metâiny at anyibun labageju, ke so bi hnyi man maniny Khong.
6Ke ohmun e khetâ metâ unyin tavat ae ti metâ; ke so bi ca metâ ûnyi eang hmeledrany ke ca ûnyi ge je tuhan meledrany, wale ame he ka hia bi: 7ke ohmun e ha metâ anyin Khong ûnyi ae iyong, waleji adre me ikhâlâ, ke a ip hnen Khong adrem ke tiga hia bi hmeledrany hnân ogânʼ öta: 8wale ae ca khana hnen je than eang hmelen: anyin a ne khanʼ ödra, me adre me ne ca he ka osatauroâ Thaniny hmeledrany: 9helâ me hna sihnalimen, ka habe,
Ame ca wâ hnen ecmak, kʼ ame ca long ge hnyiköny,
Kʼ ame ca dit ka hnyi hnyin at ta je ûnyi
Waleji a penapena Khong hobi kodra adre me hnyok kâu.
10Ke a hia but Khong omanenâ köta hnen Hanu: anyin a Hanu ame elelâm ta je ûnyi hia, eke, ta je ûnyi ae dit anyin Khong. 11Anyin a ie ke at ae khana ta je ûnyi anyin ke at, ke so thibi hanon at eû hnyi hnyin? helâe, ae ca khana at ta je ûnyi anyin Khong, ke so thibi Hanon Khong. 12Ke ate me ca kap bi hanon hmeledrany, ke so bi hanu ûnyi ge Khong; me me khanʼ öta thö ta je ûnyi a ham bâûâ köta Khong. 13Ke ohmun e ha ta je ûnyi e, ca ûnyi hnyi hofuc adre nâ hnen metâ anyin at, ke so bi ûnyi hnyi hna ûne hnen Hanu; ame omanenâ ta je ûnyi anyin hanu ka tavat aten hanu. 14Ke haba aten unyin ame ca kap ta je ûnyi anyin Hanon Khong: anyin a hwen monu e kâu; ke e ca khana he ka wâhmakhmetoâ e, anyin adre me wâ ûnykûme hnen hanu. 15Ke haba aten hanu ame wâ ûnykûme ta je ûnyi hia, ke ame ca wâ ûnykûme e hnen ke at. 16Anyin a ie at ae khana ûnykûmenen Than, me me he ka nâ e? Ke hu but gata ûnykûmenen Keriso.
Currently Selected:
I. Korinito 2: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
