Vilipia 4

U̱tu̱gu̱z kaal wak edemeztu niga ngatinanni

1Gotonogga ki ngonogga wak zinino, korongi gon anna kar kurumte ki i̱ge̱ta̱, eci gon aanyang niga annita talninet kar bo̱do̱k anna kodong ele ngatinno̱ng. Ibilet zin ju̱rru̱m ngati Manyi.

2I̱yo̱ko̱ kilalekkung i̱ge̱t ngonogget cik e̱e̱ggi̱nnu̱ rama ko̱ Euodia ki Syntyche abunna ming ungneku dango lo̱o̱c, elemit e̱le̱tti̱ zo̱ze̱ ci Manyi. 3Ka̱jji̱ni̱n goona de̱de̱, kar eela ngaai ne̱k arike e̱le̱tti̱ ki annita li̱ngli̱ngo̱ne̱ ci kaviyak cik abunna, ki bo̱do̱k e̱e̱t ci een Kelemen ki ol u̱gge̱ wak ka̱li̱ngli̱ngnya̱ bu̱k, ol wak e̱he̱rye̱ zara cigge̱k buwe ci rugeto.

4Ataltto odohize zo̱ze̱ ci Manyi baize cunno̱ng! Kobodonik ka̱du̱wa̱ dee, ataltto. 5Tu̱gu̱we̱k ol do̱o̱k kaal cik abunna zinine ci alali. Ize ojon i̱i̱te̱ni̱ ci a̱kku̱nne̱ Manyi. 6Ma anyikku zi̱nze̱tti̱ kibilet je̱e̱na̱ zo̱ze̱ ci kaalu, abarik alac Ta̱mu̱ta̱dde̱n kaale do̱o̱k zi̱nze̱tti̱nne̱ cik alali ngati anyikku nonno zany. 7Kar gano ci Ta̱mu̱ta̱dde̱no̱ wa ommog genyiz ci e̱e̱t ci diiri do̱o̱k, kuzute zi̱nze̱tti̱ ki i̱no̱ni̱ cuggo̱k ngati Ye̱su̱ Ki̱ri̱sto̱.

8Gotonogga ki ngonogga tu̱we̱nta̱, aartik zi̱nze̱tti̱ zoz ci een de̱de̱, zoz ci caale, zoz ci okko ṯop, zoz ci a̱li̱le̱, ki zoz ci abunna, icima zoz ci a̱zi̱ze̱ orong zi̱nze̱tti̱, ki zoz ci abunna kinnat naga. Ma abilizzu i̱no̱ni̱ne̱t kaal ne̱ko̱ do̱o̱k. 9I̱li̱ngli̱ngte̱ kaal cik edemeztu niga icima a̱gga̱ma̱nnu̱ icima iziktu icima icinntu ngatinanni. Kar Ta̱mu̱ta̱dde̱n ci een manyi gano ka̱vvu̱ ngatinno̱ng.

Aanyik Pa̱u̱lo̱ olli orog ci een Vilipi zany

10Katalne anna ngati Manyi eci niga bali vu̱rrta̱ i̱no̱nnta̱u̱ zoz cinanni. De̱de̱ orongnyu ba̱li̱ye̱ eeltawang, i̱llo̱i̱ zin gool ci eelannang. 11Iróng anna ka̱du̱wa̱ zoz neci eci anna korongi kaal u̱gge̱ ngatinno̱ng, eci anna ka̱gga̱wa̱ gool ci baiz cinanni kurteke amut zinin kaale cik kanyai. 12Ka̱gga̱ anna baiz cinanni ming korongi da̱i̱ne̱t, ka̱gga̱ ming kanyai kaal cik meelek. Kedemeza anna ele cinanni da̱i̱nte̱ cikidik baiza, ming anyari looci icima adak lo̱o̱c magiz. 13Kogonni wo̱ye̱ anna kaal do̱o̱k zo̱ze̱ ci Ki̱ri̱sto̱ nonno ci aanya doiz.

14Abarik niga u̱tu̱gu̱zzu̱ zoz ci abunna eci ozoltu pirnanet cinanni. 15Imma niga olli lo̱o̱c ci Vilipi a̱gga̱yyu̱ ri̱t niga ba̱li̱ye̱ zoz ci kaviyak cik abunna, baling kokko anna kungnek lo̱o̱c ci een zara Macedonia lo̱o̱c, i̱llo̱i̱ ke̱le̱ci̱a̱ co̱de̱ ci amucan, i̱ge̱t do̱ niko cik eelannang kaale. 16Ma̱i̱je̱ ming ngen anna kaave o̱rge̱ ci Te̱se̱lo̱ni̱ka̱ ke̱, i̱tto̱na̱kka̱ng niga annita muci cuggo̱k odohize odohize ming koronga gi̱i̱ imma. 17Iróng zin anna korongi muci cuggo̱k, abarik korongi kaal cik okko Ta̱mu̱ta̱dde̱n a̱mu̱yu̱kku̱ng. 18I̱yo̱ko̱ zin, kuruba kaal cik korongi anna do̱o̱k, otorte abarik, aanya e̱e̱ti̱ ci een Epaphroditus muci balik i̱tto̱na̱kka̱ng niga ke̱. Ongooli muci ne̱ke̱ mediz ci aanyik Ta̱mu̱ta̱dde̱n katalo. 19Kar atin Ta̱mu̱ta̱dde̱n cinanni ka̱a̱nyu̱ng kaal cik orongnyu niga eezet cinne ngati Ye̱su̱ Ki̱ri̱sto̱.

20Kinnatit Ta̱mu̱ta̱dde̱n Be̱e̱ti̱nna̱ udut. Nonno nenen.

Zawinet ci vu̱rrto̱

21Izza olli Ta̱mu̱ta̱dde̱no̱ veelek zare cik Ye̱su̱ Ki̱ri̱sto̱. Ovvo bo̱do̱k gotonoggeti wak aavtte imma annita i̱tto̱na̱kku̱ng zawinet cinne̱ng. 22Izayung i̱ge̱t bu̱k olli Ta̱mu̱ta̱dde̱no̱ ngatu, ommogje oroot ol wak a̱li̱ngli̱ng ce̱e̱ze̱ ci alaan ci a̱ddi̱ki̱re̱ Romi.#4:22 Alaan ci a̱ddi̱ki̱re̱ Romi: Een enne alaan ci a̱ddi̱ki̱rne̱ alaat cik lo̱o̱cco̱k u̱gge̱ ki bo̱do̱k Ju̱de̱ya̱ ki Ga̱li̱li̱ lo̱o̱ce̱ ci Ya̱u̱do̱. Awu olli Romi alaan ci a̱ddi̱ki̱re̱ kize Kesari.

23Anyik deten ci Manyi Ye̱su̱ Ki̱ri̱sto̱ ka̱vvu̱ ngatinno̱ng i̱ge̱t do̱o̱k. Amen.

Currently Selected:

Vilipia 4: tex

Highlight

Copy

Compare