Ma̱te̱yo̱ 2
2
E̱re̱nno̱k cik a̱vvu̱ je̱e̱na̱
1Baling a̱rri̱ta̱i̱ Ye̱su̱ o̱rge̱ ci een zara Betelem lo̱o̱ce̱ ci Ju̱de̱ya̱ ke̱, i̱i̱te̱ne̱ bali Alaan He̱ro̱d#2:1 Alaan He̱ro̱d: Awu ol He̱ro̱d cu azi ne, He̱ro̱d wa A̱ddi̱ki̱re̱. Een bali enne alaan e̱rki̱te̱ bali a̱rri̱ta̱i̱ Ye̱su̱ ke̱. Ikeb Lu̱ka̱ 1:5. Bali vu̱rrta̱ ming okko He̱ro̱d wa A̱ddi̱ki̱re̱ a̱da̱i̱, ize ngerinne He̱ro̱di̱ Antipas alaan. Ikeb Ma̱te̱yo̱ 14:1; Marko 6:14; Lu̱ka̱ 3:1; To̱na̱i̱t 4:27. Een enne alaan i̱i̱te̱ne̱ bali a̱gga̱me̱k Joni Ye̱su̱ ba̱ti̱ti̱mo̱ ke̱. Imma bali vu̱rrta̱ anyak alaan ci een He̱ro̱d Agirippa, ngerrti do̱le̱c ci He̱ro̱d wa A̱ddi̱ki̱re̱. Ikeb To̱na̱i̱t 12:1-23. a̱gga̱m ol ke̱. Imma zin i̱i̱te̱ne̱ neci, anyak da̱ ba̱li̱ye̱ e̱re̱nno̱k cik a̱vvu̱ eci je̱e̱ni̱, a̱vvu̱na̱k Jerusalem, 2kar ki̱jji̱nne̱t ol azi ne, “Aave do̱le̱c wa bali a̱rri̱ta̱i̱ kar kize atin alaan ci Ya̱u̱do̱ ko̱ nga? Kicinnta munyunyoc cinne eci je̱e̱no̱, ka̱vvu̱nna̱ kar ki̱vi̱ta̱ ki̱di̱ngdi̱nga̱nta̱ nonno.”
3Baling okko Alaani He̱ro̱di̱ aziye, iróng zin enne ki ol cik Jerusalemo atalne. 4Utu He̱ro̱di̱ alaat cik olli wawaco ki de̱me̱zzo̱k wak lo̱ti̱nno̱k wak Musesi ko̱ do̱o̱k kar ki̱jji̱n nogo, a̱nne̱k ne, aave Ki̱ri̱sto̱ wa okko atin a̱rri̱ta̱i̱ ko̱ nga? 5O̱bo̱dde̱k nege nonno, a̱nne̱k ne: “A̱rri̱ta̱i̱ atin o̱rge̱ ci een Betelem, Ju̱de̱ya̱, go̱o̱le̱ bali eherik a̱ri̱to̱i̱ti̱ ke̱,
6“‘Niga ol cik Betelemo, cik aavtiyyu lo̱o̱ce̱ ci Ju̱de̱ya̱,
izetu niga ol cik riilik orgene ci alaat cik Ju̱de̱ya̱,
iyowa atin alaani ngatinno̱ng,
ci okko atin een tuwayoit ci ol cigannik Israila.’#Maica 5:2”
7Imma zin nginatu niko, utu He̱ro̱di̱ e̱re̱nno̱k ne̱ke̱ genyiza, kar ki̱jji̱n i̱i̱te̱n ci acine nege munyunyoc ko̱, orong enne kar ka̱gga̱ nginti a̱rri̱ta̱ne̱ Ye̱su̱. 8I̱tto̱n zin i̱ye̱ He̱ro̱di̱ e̱re̱nno̱k ne̱ke̱ koot Betelema, kar kizek ne, “Oot icinnet do̱le̱c ju̱rru̱m. Ming u̱mu̱dda̱u̱ nonno, i̱vi̱ta̱ u̱du̱kta̱ng, kar kuk anna bu̱k ki̱di̱ngdi̱nga̱n nonno.”
9Baling ovvo nege aziye zoz ci alaano niko, oota, ma̱i̱je̱ munyunyoc bali acinnek nege je̱e̱n o̱rge̱ cinne̱ng ke̱, a̱vvu̱ o̱o̱we̱ cinne̱ng zee kar kuk kibil nginati a̱rri̱ta̱ne̱ do̱le̱c ci een Ye̱su̱ ko̱ o̱to̱ne̱ ci nyigjo. 10Baling ovvo nege acin munyunyoc ming abile o̱o̱we̱ cinne̱ng niko, ataltto oroot. 11I̱tto̱zzo̱ ce̱e̱z ci a̱rri̱ta̱ne̱ ol Ye̱su̱ ko̱, icinnet abarik do̱le̱c ki yaatinne Ma̱ri̱ya̱, a̱ka̱tte̱k nege u̱zu̱ngtti̱ lo̱o̱c kar ki̱di̱ngdi̱nga̱ni̱t nonno. Idimtta muci cigge̱k aanycik nonno. Adima nege dhahab ki maal ci ongooli laala ki lotagong kize muci ci anyike nege nonno. 12Imma vu̱rrta̱, u̱du̱wa̱k Ta̱mu̱ta̱dde̱n nogo o̱no̱zo̱we̱ a̱nne̱k ne, ma ngen ovvoyyu rok alaan ci een He̱ro̱d. Idimtta zoz necu aartik iin, i̱mi̱rtte̱ oot lo̱o̱ce̱ cinne̱ng go̱o̱le̱ immane.
Aniye ol Ye̱su̱ ovvoye lo̱o̱ce̱ ci een Masir
13Baling ovvo e̱re̱nno̱wa̱ a̱mi̱re̱, ma̱i̱je̱ anjilo ci Manyi i̱ye̱le̱k Yosevo o̱no̱zo̱we̱ ele a̱nne̱k ne, “Tinga je̱e̱na̱, i̱yi̱k niye do̱le̱c necu ki yaatinne bite lo̱o̱ce̱ ci Masiro! Bit a̱vvu̱ nginati zee, ku̱du̱wa̱i̱ kizei ne, mi̱re̱ eci alaani ci een He̱ro̱d, orong do̱le̱c necu kar ku̱ru̱k ka̱da̱k.” 14Imma bali ba̱a̱li̱n neci, itinga Yosevo uwe do̱le̱c ki yaatinne rok lo̱o̱c ci Masiro. 15A̱vvu̱to̱ zin nege lo̱o̱ce̱ neci zee ka̱da̱k He̱ro̱di̱. I̱ki̱ya̱ zoz ci Manyi ko̱ ize de̱de̱ go̱o̱le̱ bali a̱du̱wa̱ a̱ri̱to̱i̱ti̱ ke̱, azi ne, “Kawu atin anna ngeranni Masire.”#Hoseyya 11:1
16Baling okko He̱ro̱di̱ a̱gga̱ u̱lu̱te̱t e̱re̱nno̱wa̱ ne̱ke̱ nonno niko, omoze, izek aciir ne, u̱ru̱we̱t dooli cik macik aavtte Betelema ko̱ do̱o̱k ki cik aavtte ojonun anyak e̱rki̱nya̱ ram ki dooli cikidik veelek. 17Ma̱i̱je̱ zoz bali u̱du̱wa̱ Ta̱mu̱ta̱dde̱n utuge ci a̱ri̱to̱i̱t ci zoz cinne een Jeremiah ke̱ akat mo̱o̱le̱t, azi ne,
18“Kazii muluk ci u̱lu̱wa̱nu̱ o̱rge̱ ci een Ramah,
a̱lu̱ ol u̱lu̱wa̱ ci a̱ppwe̱ oroot,
a̱lu̱ Racheli#2:18 Rachel: Imma zin zo̱ze̱ cu, iddera zara cik Racheli ngaai wak u̱ru̱kte̱ dooli cigge̱k do̱o̱k. Een enne bali ngaa ci Ya̱ko̱bo̱ kar bo̱do̱k een e̱e̱ti̱ Yosevo ki Benjamin. Ikeb zoz ci obod ki Rachel ngati Kananet 29-35. dooli ciginnek a̱da̱i̱,
kutubur rok ol wak a̱gga̱m nonno a̱zzi̱t u̱lu̱wa̱na̱ bu̱k,
eci a̱da̱i̱to̱ dooli ciginnek veelek.”#Jeremiah 31:15
O̱bo̱dda̱ Yosevo ki Ma̱ri̱ya̱ Masire
19Ma bali vu̱rrta̱, ngati a̱da̱he̱ He̱ro̱di̱, i̱ye̱le̱k anjilo ci Manyi Yosevo ele baling ngen Yosevo ngen aave Masire ke̱. 20A̱nne̱k anjilo nonno ne, “Tinga je̱e̱na̱, bite Ma̱ri̱ya̱ ki do̱le̱c lo̱o̱ce̱ ci een Israil eci ol balik orong ku̱ru̱we̱t nonno ke̱, a̱da̱i̱to̱.”
21Itinga Yosevo ki Ma̱ri̱ya̱ o̱o̱tte̱ do̱le̱c lo̱o̱ce̱ ci een Israil. 22Baling okko enne aziye azi ne, ize do̱le̱c ci een Archelaus ci He̱ro̱di̱ alaan ci Ju̱de̱ya̱, o̱to̱ngo̱o̱le̱ iróng ngen okko nginati. Imma bali o̱no̱zo̱we̱ u̱du̱wa̱k Ta̱mu̱ta̱dde̱n nonno a̱nne̱k ne, bit zin lo̱o̱ce̱ ci Ga̱li̱li̱. 23Oot zin nege a̱vvu̱to̱ o̱rge̱ ci een Nazeret. Ize ne, ize zoz bali u̱du̱wa̱ Ta̱mu̱ta̱dde̱n ke̱, de̱de̱, ki baling a̱du̱wa̱ a̱ri̱to̱i̱ti̱ azi ne, “Akanonik atin do̱le̱c zara cik azi ne, Nazarene.”
Currently Selected:
Ma̱te̱yo̱ 2: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.