Jonah 4
4
Omoze Jonah ngati Manyi oroot
1Omoze Jonah ngati Ta̱mu̱ta̱dde̱no̱ oroot eci Manyi iróng ngen adita olli Nineveh. 2Ala Jonah Manyi, “Manyi bai, ngen ba̱li̱ye̱ ku̱du̱wa̱ baling korongi kuk rok orog ci een Tarshish? Ka̱gga̱ niko ba̱li̱ye̱ kar zin ketteda gool cinanni. Ka̱gga̱ niko e̱e̱ni̱ i̱nna̱ Ta̱mu̱ta̱dde̱n ci abunna kar bo̱do̱k i̱i̱rke̱, iróng i̱nna̱ etteda zinin ataman kar bo̱do̱k rezinet cunne abak udut olle, eci e̱e̱ni̱ i̱nna̱ Ta̱mu̱ta̱dde̱n ci iróng adita ol. 3Manyi bai, i̱yo̱ko̱ zin inya ka̱da̱u̱, maya daizi rugeta.”
4O̱bo̱de̱k zin Manyi Jonah, a̱nne̱k ne, “Ngene ci aanyi kar moze ko̱?”
Edemez Ta̱mu̱ta̱dde̱n Jonah bunnat cinne
5Uk zin Jonah a̱vvu̱ lo̱o̱ta̱ o̱to̱ne̱ ci je̱e̱ni̱. Idiman ti̱ti̱ nginati kar ka̱vvu̱ ri̱ya̱ kerewo kicin nya ci atin i̱i̱na̱k orog ci a̱ddi̱ki̱re̱ ko̱. 6Aanyik zin Manyi keet ci atanak kitiliza abunna ri̱i̱ ming eela Jonah, kar ka̱vvu̱ labak, kar zin enne katalo oroot. 7Imma nge̱rre̱ti̱n ci reng, i̱tto̱na̱ Ta̱mu̱ta̱dde̱n u̱lu̱ta̱ni̱t ci adak egeroc ci ke̱e̱tu̱ kar keet ka̱da̱k ki̱zzi̱ ri̱i̱ ngati Jonah. 8Baling iyowa koor, i̱tto̱na̱ zin Ta̱mu̱ta̱dde̱n ngoot ci a̱bu̱re̱ oroot o̱to̱ne̱ ci je̱e̱ni̱, kar zin koor kovvoc oo ci Jonah kataval, orong a̱da̱i̱ kar kize ne, “Inya ka̱da̱k udut, maya daizi rugeta.”
9Ma̱i̱je̱ Ta̱mu̱ta̱dde̱n iizek Jonah ne, “Ngene ci aanyi moze zo̱ze̱ ci keet cu ko̱?”
Azi Jonah ne, “Annita, komoze anna oroot korongi abarik ka̱da̱u̱.”
10Kar zin Manyi kize ne, “A̱lu̱ i̱nna̱ keet cu oroot, ma̱i̱je̱ nu̱nu̱n ming amire i̱nne̱t ci anyike nonno kitiliza, alina zin keet cu ba̱a̱li̱n co̱de̱ ki̱ddi̱ki̱r kar bo̱do̱k ka̱da̱k ba̱a̱li̱n ci reng. 11Abarik zin anyak ol cik meelek e̱e̱ggi̱n i̱bbo̱nge̱t o̱bo̱n co̱de̱ moten ram (120,000) cik iróng bu̱k a̱gga̱ gi̱i̱ ci gerze ki gi̱i̱ ci abunna, ogon elegjene cik meelek ko̱ bu̱k niko. Abarik zin a̱u̱ce̱ zinin cinanne, ka̱lu̱ orog ci Nineveh a̱ddi̱ki̱re̱ ki ol ciginnek ko̱ do̱o̱k?”
Currently Selected:
Jonah 4: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.