Buk wa To̱ni̱a̱u̱ 9

Utuhu Sauli zinin elema zoz ci Ye̱su̱

(Buk wa To̱ni̱a̱u̱ 22:6-16; 26:12-18)

1Ngen zin abarik Sauli emena a̱gi̱d nuyak cik Manyi dee. Uk enne ngati alaan ci a̱ddi̱ki̱re̱ wawaco 2kar ki̱jji̱n waraga ci i̱tto̱ni̱k lo̱ddi̱ki̱re̱ cik aavtte o̱rge̱ ci een zara Damascus, kar abunna ming amuda enne ngaai icima odot cik annu zoz ci Manyi Ye̱su̱, okko enne okkoye nogo lagama Jerusalema. 3Baling ojongoz enne Damascus, ataman niko icin tukulec ta̱mu̱-kenga ci aburuk nonno. 4U̱yu̱we̱ enne niko, kar kizik muluk ci ozozik nonno a̱nne̱k ne, “Saul, Saul, nyaa i̱nna̱ ming a̱gi̱da̱ annita ko̱?”

5I̱jji̱n zin Sauli nonno, a̱nne̱k ne, “E̱e̱ni̱ i̱nna̱ ngene, ddi̱ki̱ryo̱i̱t?”

O̱bo̱de̱k zin Ye̱su̱ nonno, a̱nne̱k ne, “Annit Ye̱su̱ ci a̱gi̱di̱ i̱nna̱ ko̱.” 6“I̱yo̱ko̱ zin, tinga je̱e̱na̱ bit orgato, okko atin e̱e̱ti̱ imma a̱du̱wa̱ki̱ gi̱i̱ ci la̱du̱n okko i̱nna̱ ogoni.”

7Imma ol balik eron ki Saul ke̱ ibilet li̱i̱m, abarik zin nege aziye muluk ci iróng bu̱k acin rok e̱e̱t imma bu̱k. 8Itinga Sauli lo̱o̱ta̱, baling okko enne oo ebere, abarik zin iróng enne ngen acine. A̱gga̱mi̱t ol nonno a̱zzi̱t rok Damascus. 9Ize Sauli ru̱be̱n i̱i̱nya̱ i̱i̱yo̱ ci iróng bu̱k adakye icima aude.

10Anyak bali nuyait imma ci een zara Ananiyas ci Damascusi. Utu Manyi Ye̱su̱ nonno o̱no̱zo̱we̱, “Ananiyas!”

O̱bo̱de̱k zin enne, azi ne, “I̱i̱ny, Manyi!”

11Iizek Manyi nonno ne, “Bit ce̱e̱ze̱ ci Judasi go̱o̱le̱ wa okko ṯop kar ji̱n e̱e̱t ci een zara Saul a̱kku̱ o̱rge̱ ci azi zar ne Tarasis, eci enne alaye. 12Okko o̱no̱zo̱we̱ ciginnek icin enne e̱e̱t ci een Ananiyas ming a̱kku̱ kar karik a̱zzi̱t cinne nonno kar enne kicine niko.”

13O̱bo̱de̱k zin Ananiyasi nonno, “Manyi, kiziya anna zoz ci obod ki e̱e̱t cu ki kaal cik gerzek u̱tu̱gu̱we̱k enne nuyak cigunnek Jerusalema. 14A̱kku̱ zin enne ngintu komize ci alaat cik olli wawaco kar keceb ol do̱o̱k wak annu zoz cunne.”

15A̱nne̱k zin Manyi Ananiyas ne, “Tinga je̱e̱na̱ bito! Een Sauli e̱e̱t ci katahala anna kize e̱e̱t ci uwahek i̱do̱ngi̱ ki alaat cigge̱k ki ol cik Israilo kaviyak cigannik abunna. 16Ki̱ye̱le̱k atin anna nonno gool ci okko enne apirnane zo̱ze̱ cinanni.”

17Uk zin Ananiyasi i̱tto̱ ce̱e̱zto̱. Atadek azzin ciginnek Saul, “Gotona, i̱tto̱na̱na̱ Manyi Ye̱su̱, bali i̱ye̱le̱ki̱ ele goola ngati i̱nna̱ a̱kku̱nne̱ ke̱ kar abunna ming kalaweki anna Ta̱mu̱ta̱dde̱n kar cine labak, kar bo̱do̱k ruba Vongiz ci A̱li̱le̱.” 18Ataman niko, itazzo kaala cik ogon ki tabbalanga cik u̱lu̱gta̱k eberene cik Sauli, kar zin enne kicine niko dee. Itinga zin enne kar ka̱gga̱ma̱ ba̱ti̱ti̱mo̱, 19kar baling okko enne adak da̱i̱ne̱t u̱gge̱, oboda ele cinne okkom kak.

Uwak Sauli Damascusa ki Jerusalema

Anyak Sauli i̱i̱nya̱ cik meelek ki nuyak Damascusa. 20Uwak gon bo̱do̱k enne Ce̱e̱zi̱nne̱ wak Lawinto azi ne, een Ye̱su̱ Ngerrti Ta̱mu̱ta̱dde̱no̱. 21Imma ol balik aziye nonno ke̱, a̱ma̱li̱ltte̱ o̱o̱tti̱, azi ne, “Iróng e̱e̱ti̱ cu een e̱e̱t bali a̱ru̱k nuyak wak Ye̱su̱ Jerusalema ko̱ ci awu zar ne̱ko̱ ko̱? A̱kku̱ enne kar ki̱ki̱ya̱ keceb ol lagama kar kanyik alaat cik olli wawaco.” 22Anyak Sauli komiz ci uwahe zoz ci Ta̱mu̱ta̱dde̱no̱ ka̱ma̱li̱ltte̱ o̱o̱tti̱ cik Ya̱u̱d wak abak Damascusa eci Sauli azi ne, een Ye̱su̱, Ki̱ri̱sto̱.

23Baling edeca Sauli i̱i̱nya̱ cik meelek, orongit Ya̱u̱di̱ kar ku̱ru̱we̱t nonno ka̱da̱k, 24abarik zin Sauli a̱gga̱ zoz cinne̱ng. Ebekce nege kaal tu̱p arana orong kar ku̱ru̱we̱t nonno. 25U̱lu̱gu̱nyye̱t nuyaha ciginnek nonno bali ba̱a̱l aartik dho̱ngku̱ ci a̱ddi̱ki̱re̱ kar ki̱tto̱nni̱t ngati volongi di̱la̱ta̱.

26Baling i̱ki̱ya̱k enne Jerusalem, orong ka̱vvu̱to̱ ki nuyak, o̱to̱ngo̱o̱ltte̱ zin nege do̱o̱k nonno, iróng nege a̱tu̱ ming een Sauli nuyait de̱de̱. 27Uwe zin Barnabasi nonno kar kanyahak nuyak. U̱du̱wa̱k Barnabasi nogo gool bali acine Sauli Manyi ngati enne erone ke̱, kar bo̱do̱k Manyi kozozek nonno, ki uwai bali uwahe enne zare cik Ye̱su̱ Damascusa ngati iróng o̱ngo̱o̱li̱nne̱ gi̱i̱ imma. 28A̱vvu̱to̱ zin Sauli ki nogo labak Jerusalema, ozoz kodok oo kak zare cik Manyi Ye̱su̱. 29Ozozo kar bo̱do̱k kadangto ki Ya̱u̱d wak a̱gga̱ zoz ci Gi̱ri̱yo̱, orongit zin ku̱ru̱we̱t nonno. 30Baling ovvo gotonoggja a̱gga̱ zoz necu, o̱o̱tte̱ zin nonno rok Kesarea kar zin ki̱tto̱nni̱t kuk o̱rge̱ ci een Tarasis.

31A̱vvu̱to̱ ol wak a̱tu̱we̱ labak lo̱o̱ce̱ ci Ju̱de̱ya̱, Ga̱li̱li̱, ki Samariya. Okkom ke̱le̱ci̱a̱ ne kak, aanyik Vongizi ci A̱li̱le̱ nogo komiz, otorte zin nege izeto meele kar zin nege kabaito ngati o̱ngo̱o̱li̱nne̱ Manyi.

A̱ti̱ri̱z Peturu e̱e̱t ci nyangnyangi

32Baling eron Peturu o̱ro̱gjo̱we̱ ke̱, okko bali enne acin ol wak a̱tu̱we̱ o̱rge̱ ci een zara Lydda. 33Uk uruba e̱e̱t ci een zara Anyes, nyangnyangi zoona oong kwe̱e̱na̱ e̱rki̱nya̱ tu̱rge̱. 34Utu zin Peturu nonno, a̱nne̱k ne, “Anyes, angaruwi Ye̱su̱ Ki̱ri̱sto̱#9:34 Ye̱su̱ Ki̱ri̱sto̱: Azi keng cik zar cik een Ye̱su̱ ko̱ ne i̱ti̱ri̱zze̱t Ta̱mu̱ta̱dde̱n agita. Utuge ci Gi̱ri̱yo̱ azi keng ci zar cik een Ki̱ri̱sto̱ ko̱ ne, wa o̱de̱ atahala Ta̱mu̱ta̱dde̱n kize Alaan. Utuge ci I̱bu̱ru̱ azi keng ci zar cik een Ki̱ri̱sto̱ ko̱ ne Missaya. i̱nne̱ta̱. Tinga je̱e̱na̱ lu̱c kwe̱e̱n cunne.” Ataman niko itinga Anyesi. 35Baling ovvo ol do̱o̱k wak abak o̱rge̱ ci een Lydda ki Sharon ko̱ acin zoz necu, unuwet zin Manyi Ye̱su̱.

Uruguz Peturu Dorkas daiza

36Anyak nuyait imma ci nga̱a̱ye̱ een zara Tabita, azi keng cik zar ciginnek ne Dorkas,#9:36 Dorkas: Azi zara cik keng cinne utuge ci Gi̱ri̱yo̱ ne, meger. a̱kku̱ enne o̱rge̱ ci een zara Joppa, ogon da̱ gon kaal cik abunna kar bo̱do̱k keela ol wak amati. 37Imma i̱i̱te̱n neci omor enne oroot kar ka̱da̱k, utunyyet ol ele cinne kar zin kabaktek ce̱e̱z ci atadonik imma ta̱dde̱na̱. 38Aave bali Lydda ojonun ki Joppa; ma baling ovvo nuyaha aziye azi ne, aave Peturu Lyddakte, i̱tto̱ni̱t zin ol rama kar kilaltek nonno, “Nger, i̱jja̱ ataman!”

39I̱mi̱rrte̱ Peturu oot ki nogo, baling okko enne azuca, o̱o̱tte̱ ol nonno ca̱a̱to̱. Ibilet ngaai wak boyek do̱o̱k aburuk nonno, a̱lu̱ kar ki̱ye̱lte̱k nonno ru̱u̱ma̱ni̱ balik adiman Dorkasi bali ngen aruge aavtte ki nogo ke̱.

40Ottok Peturu nogo do̱o̱k koot reena; kar zin enne akatek u̱zu̱ngtti̱ lo̱o̱c kar kalawo. Kar zin kutuhuwe kicin ngaa ci a̱da̱k ko̱, kar kize ne, “Tabita, tinga je̱e̱na̱.” Oo Tabita ebere ciginnek, bali okko enne acin Peturu itinga kar ka̱vvu̱ je̱e̱na̱ 41Eela Peturu nonno kitinga je̱e̱na̱. Utu zin enne ol wak a̱tu̱we̱, ki ngaai cik boyek kar zin ki̱ye̱le̱k nogo Dorkas ming aruge. 42A̱gga̱we̱ zoz necu Joppakte do̱o̱k, kar zin ol cik meelek ku̱tu̱we̱t Manyi Ye̱su̱. 43A̱vvu̱ Peturu ngati een Joppa do̱yo̱i̱t ki Si̱mo̱ne̱ wagon ododo kwaa ko̱.

Currently Selected:

Buk wa To̱ni̱a̱u̱ 9: tex

Highlight

Copy

Compare