Buk wa To̱ni̱a̱u̱ 21

Uk Pa̱u̱lo̱ Jerusalema

1Ma baling kengertowa naga ki nogo mozinta, ko̱o̱tta̱ naga i̱bo̱wa̱ rok nyatapar ci a̱ddi̱ki̱re̱ kar ko̱o̱tta̱ ṯop ki lo̱o̱c ci aburuk maama een zara Cos. Imma i̱i̱te̱n ci reng, ko̱o̱tta̱ lo̱o̱ce̱ ci aburuk maama een zara Rhodes, kar bo̱do̱k nginati ko̱o̱tta̱ ki lo̱o̱c ci aburuk maama een zara Patara. 2Kurubta i̱bo̱ ci okko lo̱o̱ce̱ ci Phoenicia, kar zin naga ko̱o̱tta̱ niko. 3Ma baling ize ojon nginti aburuk maama een Cyprus ko̱, kar ko̱o̱tta̱ o̱to̱ne̱ ci i̱do̱li̱yo̱ rok lo̱o̱c ci een Syria. Kar kibiltta o̱rge̱ ci een Tyre, okko nginati i̱bo̱ a̱ti̱ye̱k i̱jjo̱ lo̱o̱c. 4Ma baling ku̱mu̱dda̱ nuyak nginati, ka̱vvu̱tta̱ ki nogo i̱i̱nya̱ turgerem. U̱du̱ktta̱k nege Pa̱u̱lo̱ Vongize ci A̱li̱le̱, a̱nne̱k ne, ma okko Jerusalema. 5Ma̱i̱je̱ baling edeccai i̱i̱nya̱ cik kaavtiya naga nginati ke̱, kutungteya naga orog lo̱o̱c. I̱nya̱ma̱nte̱t nuyaha ki ngaai ki dooli rok orog abanyca, kar nginati nyatapare ci a̱ddi̱ki̱re̱ ti̱ti̱ma̱ ka̱ka̱te̱ya̱ naga u̱zu̱ngtti̱ lo̱o̱c kar kalayya Ta̱mu̱ta̱dde̱n. 6Ma baling kizayowa naga goola ki nogo, kotodda naga i̱bo̱, ma̱i̱je̱ nege i̱mi̱rrte̱ oot olo.

7Keerona naga o̱rge̱ ci Tyre kar kibiltta o̱rge̱ ci een Ptolemais, ngin wa kizaya naga gotonogget, kar zin ka̱vvu̱ta̱ ki nogo i̱i̱te̱n co̱de̱. 8Kitingazza i̱i̱te̱n ci reng, ko̱o̱tta̱ rok orog ci een Kesarea, kar ka̱vvu̱ta̱ ce̱e̱ze̱ ci Vilipi wa uwahek ol zoz ci Ta̱mu̱ta̱dde̱no̱ ko̱, e̱e̱t co̱de̱ olle balik e̱e̱ggi̱n turgerem.#21:8 E̱e̱t co̱de̱ olle balik e̱e̱ggi̱n turgerem: Ikeb ol cik e̱e̱ggi̱n turgerem ko̱ buwe ci To̱ni̱a̱u̱ 6:1-6. 9Anyak enne dooli we̱c cik nga̱a̱ye̱k ngen ki̱tti̱kte̱, a̱du̱wa̱ nege arizet ci zoz ci Ta̱mu̱ta̱dde̱no̱.

10Ma baling ka̱vvu̱tta̱ naga nginati i̱i̱nya̱ u̱gge̱, i̱ki̱ya̱ a̱ri̱to̱i̱ti̱ ci azi zara ne Agabas aluccai lo̱o̱ce̱ ci Ju̱de̱ya̱. 11Ma baling i̱ki̱ya̱ rok agita, idima nyakadingo ci Pa̱u̱lo̱ kar zin kecebe azzin ki zo̱o̱ ciginnek, kar zin kize ne, “Azi Vongizi ci A̱li̱le̱ ne, ‘Eceb atin Ya̱u̱di̱ cik Jerusalemo manyi nyakadingo cu ki i̱yo̱ko̱, kar zin kaanycik ol wak iróng een Ya̱u̱d.’”

12Ma baling kizikta naga zoz necu, kilalteya naga ki ol balik nginati ke̱ Pa̱u̱lo̱ gerze ming okko enne rok Jerusalem.

13A̱nne̱kke̱t zin Pa̱u̱lo̱ agit ne, “Nyaa niga ming a̱lu̱yyu̱ egerzannu zinin cinanni ko̱? Iróng anna korongi kecebe niko, abarik korongi ka̱da̱k zo̱ze̱ ci Manyi Ye̱su̱ Jerusalema.” 14Baling iróng enne ngen aziye zoz cinna̱ng, kutungteya naga nonno do̱, kar kizetta ne, “Manyi, anyik li̱ngli̱ngo̱n cunne ku̱tu̱gu̱we̱.”

15Ma baling ke̱de̱cca̱ zoz necu, kitingazza ko̱o̱tta̱ Jerusalema. 16I̱nya̱ma̱nte̱t nuyaha uggak cik orog ci een Kesarea rok ce̱e̱z ci Mnason, nginti kaavtiya naga. Een enne e̱e̱t ci nginti aburuk maama een Cyprus kar bo̱do̱k kize nuyait co̱de̱ nuyahe balik o̱o̱tti̱nu̱ ke̱.

Arawa Pa̱u̱lo̱ Jerusalem

17Baling ka̱ra̱yya̱ naga Jerusalem, a̱gga̱mta̱i̱t olli Ta̱mu̱ta̱dde̱no̱ ju̱rru̱m. 18Kar i̱i̱te̱n ci reng, ko̱o̱tta̱ naga uggak ki Pa̱u̱lo̱ kovvo kacinna Je̱mi̱s ki lo̱ddi̱ki̱re̱ do̱o̱k. 19Izza zin Pa̱u̱lo̱ nogo do̱o̱k kar zin koobek nogo kaal cik ogonik Ta̱mu̱ta̱dde̱n ol cik iróng e̱e̱ggi̱n Ya̱u̱d li̱ngli̱ngo̱nte̱ ci u̱tu̱gu̱ Pa̱u̱lo̱.

20Baling iziyyet nege zoz necu, innatit nege Ta̱mu̱ta̱dde̱n. Kar zin kizettek Pa̱u̱lo̱ ne, “Gotonet acinni i̱nna̱, e̱e̱ggi̱n olli Ya̱u̱do̱ wak a̱tu̱ zoz ci Ye̱su̱ i̱bbo̱nge̱t cik meelek giir, annu zin nege lo̱ti̱nno̱k cik Musesi zi̱nze̱tti̱nne̱ cigge̱k do̱o̱k. 21Iziyyet bali nege zoz ci azi ne, edemezi i̱nna̱ Ya̱u̱d wak abak ki ol wak e̱e̱ggi̱n i̱do̱ngi̱ kutuburret lo̱ti̱nno̱k wak Musesi, a̱nne̱k zin i̱nna̱ nogo ne, ma etteddu dooli wucic vi̱ca̱vi̱cce̱t, icima abak go̱o̱le̱ ci keer cinna̱ng. 22Kogon wo̱ye̱ naga nyaa? Eci nege iziyyet azi ne, i̱ki̱ya̱ i̱nna̱. 23I̱yo̱ko̱ zin, tu̱gu̱ gi̱i̱ ci ka̱du̱wa̱ki̱ naga ko̱. Anyak ol we̱c cik u̱tu̱gu̱zzo̱ olom ngati Ta̱mu̱ta̱dde̱no̱.#21:23 Olom ngati Ta̱mu̱ta̱dde̱no̱: Ikeb kaal cik u̱tu̱gu̱zzo̱ Ya̱u̱di̱ bali ogonik nege olom cu Ta̱mu̱ta̱dde̱n buwe ciNambars 6:1-27. 24Dima ol ne̱ko̱, kar urumte ki nogo u̱tu̱gu̱z keer ci ogonnu e̱le̱tti̱ ki̱li̱le̱c kar i̱nna̱ ru̱k o̱ro̱bi̱ya̱ cik odote nege o̱o̱tti̱ cigge̱k. Kar ol do̱o̱k atin ka̱gga̱c i̱llo̱i̱ zoz ci een de̱de̱ obod ki i̱nne̱t zo̱ze̱ necu, abarik i̱nna̱ eliya abai ngati o̱ngo̱o̱li̱nne̱ lo̱ti̱nno̱k cik Musesi. 25Ma̱i̱je̱ ngati ol cik iróng e̱e̱ggi̱n Ya̱u̱d wak a̱tu̱we̱, keteherteya ba̱li̱ye̱ naga nogo kar iróng adak i̱di̱ng ci apahek ol ta̱mu̱ta̱dde̱ne̱t, ma auddu bi̱ye̱, ma adakku e̱le̱gi̱t ci adal ol kar bo̱do̱k ma e̱e̱ggi̱nnu̱ a̱li̱ya̱k.”

26Imma i̱i̱te̱n ci reng, uwe Pa̱u̱lo̱ ol ne̱ke̱ kar nege kidimanit e̱le̱tti̱ kubunnta ki nogo nga̱to̱de̱. Kar zin enne kuk Ce̱e̱ze̱ wa Ta̱mu̱ta̱dde̱no̱ ku̱du̱wa̱k ol i̱i̱te̱n ci okko aṯurneke dimaninet e̱le̱tti̱ kar kapahozik ol ne̱ke̱ do̱o̱k wawaci e̱co̱de̱ e̱co̱de̱.

Ecebe Pa̱u̱lo̱

27Baling ngen i̱i̱nya̱ cik e̱e̱ggi̱n turgerem kedeccai, kar zin Ya̱u̱di̱ uggak edenyca Pa̱u̱lo̱ Ce̱e̱ze̱ wa Ta̱mu̱ta̱dde̱no̱ lo̱o̱ce̱ ci Asia. U̱lu̱tta̱ koole ci a̱ppwe̱ kar ka̱gga̱mi̱t nonno, 28egerenyit izeto ne, “Ol wak Israilo, eeletu agita! Een necu e̱e̱t ci edemez ol lo̱o̱co̱we̱ do̱o̱k kutuburret ol cigga̱c lo̱ti̱nno̱k ki ngintu. Anyahak bo̱do̱k enne ol cik een Gi̱ri̱k re̱e̱nu̱n ci Ce̱e̱z wa Ta̱mu̱ta̱dde̱no̱ kar ku̱tu̱wu̱le̱t nginti a̱li̱le̱ ko̱” 29Icinnet nege ba̱li̱ye̱ Trophimos ci orog ci een Ephesus orkor ki Pa̱u̱lo̱ orgato, i̱no̱n nege azi ne, Pa̱u̱lo̱ ci anyaha nonno re̱e̱nu̱n ci Ce̱e̱z wa Ta̱mu̱ta̱dde̱no̱.

30A̱vi̱ra̱ ol do̱o̱k orgato go̱o̱lo̱we̱ do̱ do̱. Baling a̱gga̱mi̱t nege Pa̱u̱lo̱, u̱tu̱gu̱rta̱ nonno Ce̱e̱ze̱ wa Ta̱mu̱ta̱dde̱no̱, ki aran ming anyuge ataman. 31Ma baling orong nege kar ku̱ru̱we̱t nonno ka̱da̱k, uzuca zoz ddi̱ki̱ryo̱i̱t wa a̱ddi̱ki̱re̱ aciiru Romi,#21:31 Ddi̱ki̱ryo̱i̱t wa a̱ddi̱ki̱rne̱ aciir: Een enne ddi̱ki̱ryo̱i̱t ci a̱gga̱m aciir cik e̱e̱ggi̱n i̱bbo̱ng co̱de̱. azi ne, akate jo̱o̱re̱ Jerusalema. 32Idima ddi̱ki̱ryo̱i̱ti̱ wa a̱ddi̱ki̱re̱, ddi̱ki̱ryyo̱k ki aciir u̱gge̱ kar kuluce koot ngati koole neci. Baling icinnet nege ddi̱ki̱ryo̱i̱t ki aciir ciginnek, iróng nege ngen a̱ru̱k Pa̱u̱lo̱.

33I̱ki̱ya̱ ddi̱ki̱ryo̱i̱ti̱ wa a̱ddi̱ki̱re̱ eceb Pa̱u̱lo̱ kar zin enne ku̱du̱wa̱k ol kecebit nonno diditai cik e̱e̱ggi̱n rama. Kar zin enne ki̱jji̱no̱, een enne ngene, u̱tu̱gu̱ enne nyaa? 34Egerenyit koole do̱o̱k, egereny uggak zoz cinne̱ng, ovvo bo̱do̱k uggak ngatinne̱ng egereny zoz ci aave do̱, iróng zin ddi̱ki̱ryo̱i̱ti̱ wa a̱ddi̱ki̱re̱ ngen a̱gga̱ keng ci zoz ci een de̱de̱ eci ol awalwali, u̱du̱wa̱k zin aciir ko̱o̱tte̱ Pa̱u̱lo̱ ngati aavtte nege. 35Baling uzucca Pa̱u̱lo̱ lo̱ti̱ti̱nya̱, izeto ol moote oroot kar zin aciiri kodongit Pa̱u̱lo̱ niko. 36Imma koole bali ngen annu nonno ke̱, azi ne, “U̱ru̱we̱t nonno ka̱da̱k!”

Ozozik zin Pa̱u̱lo̱ koole

37Ma baling orong aciiri ko̱o̱tte̱ Pa̱u̱lo̱ ngati aavtte nege, i̱jji̱n zin enne ddi̱ki̱ryo̱i̱t wa a̱ddi̱ki̱re̱, a̱nne̱k ne, “Aanya ucca ku̱du̱wa̱i̱ zoz imma i̱nne̱ta̱?”

O̱bo̱de̱k zin ddi̱ki̱ryo̱i̱ti̱ Pa̱u̱lo̱, a̱nne̱k ne, “Ozozi i̱nna̱ Gi̱ri̱k?” 38“Iróng i̱nna̱ e̱e̱ni̱ Masirenit bali akane jo̱o̱re̱, kar kaanyik ol cik e̱e̱ggi̱n i̱bbo̱nge̱t we̱c ki̱tto̱zo̱ balal e̱rki̱nya̱ balik ke̱?”

39O̱bo̱de̱k Pa̱u̱lo̱ nonno, a̱nne̱k ne, “I̱llo̱i̱, ke̱e̱ni̱ anna Ya̱u̱do̱c o̱rge̱ ci Tarasis, orog ci riili lo̱o̱ce̱ ci Cilicia. Inya bai kozozek ol ke̱.”

40Ma baling anyik ddi̱ki̱ryo̱i̱ti̱ wa a̱ddi̱ki̱re̱ nonno kozoz, ibil Pa̱u̱lo̱ abanyca, kar zin ki̱ti̱va̱n koole. Baling ijaktte nege do̱o̱k, ozozek zin enne nogo utuge ci Aramaik, a̱nne̱k ne:

Currently Selected:

Buk wa To̱ni̱a̱u̱ 21: tex

Highlight

Copy

Compare