Buk wa To̱ni̱a̱u̱ 20

Iyok Pa̱u̱lo̱ eci Macedonia ki Gi̱ri̱k

1Ma baling ijaktte olli Ephesusi li̱i̱m, utu zin Pa̱u̱lo̱ nuyak, kar ki̱ti̱lo̱ nogo, kiza, kar kizek nogo ne, “Abunna kuwa anna.” Kar zin kuk lo̱o̱ce̱ ci Macedonia. 2Imma goola i̱lo̱t ol wak a̱tu̱we̱ o̱ro̱gjo̱we̱ ne̱k owoye enne ke̱ zee kuzuca lo̱o̱c ci een Gi̱ri̱k, 3ngin wa aave enne nyelowi i̱i̱yo̱. Orong bali enne keeron i̱bo̱wa̱ rok lo̱o̱c ci Syria, abarik zin Ya̱u̱di̱ uggak orong da̱ ku̱ru̱we̱t nonno, i̱mi̱re̱ zin enne go̱o̱le̱ ci Macedonia. 4Orkor enne ki Sopater ngerrti Pyrrhus o̱rge̱ ci een Berea, ki Aristarkas ki Secundus o̱rge̱ ci Te̱se̱lo̱ni̱ka̱, ki Gaius o̱rge̱ ci een Derbe, ki Ti̱mo̱te̱yo̱ bu̱k ki Tychicos ki Trophimos lo̱o̱ce̱ ci Asia. 5Ovvo ol ne̱ko̱ oowa ovvo e̱re̱ye̱t agita o̱rge̱ ci een Troas. 6Baling edeccai i̱i̱te̱ni̱ wa adahe ol Kwo̱o̱r wa Umunet wak iróng Amukcari, kar kotodda i̱bo̱ o̱rge̱ ci een Vilipi, kar bali i̱i̱nya̱ tu̱r kurumtowa ki nogo o̱rge̱ ci een Troas kar ka̱vvu̱ta̱ nginati i̱i̱nya̱ turgerem.

Aruguz Pa̱u̱lo̱ Eutychus daiza

7Imma i̱i̱te̱ne̱ wa een Dominika,#20:7 I̱i̱te̱ne̱ wa een Dominika: Eci ngati olli Ya̱u̱do̱ akane i̱i̱nya̱ cik biranocak ngatinne̱ng i̱i̱te̱ne̱ ci een oo kar kuṯurei i̱i̱te̱ne̱ ci een turgerem biranoca, nonno ci een I̱i̱te̱n wa Yu̱bze̱nto̱. Kovvo naga Tenneti kikeb i̱i̱nya̱ cigga̱c biranocak do̱ ngati olli Ya̱u̱do̱. Kazi naga ne I̱i̱te̱n wa Yu̱bze̱nto̱ ci een i̱i̱te̱n ci een torkonom kar i̱i̱te̱n ci annu I̱i̱te̱n wa Yu̱bze̱nto̱ ko̱ kawu naga kize i̱i̱te̱n turgerem. Kawu naga bo̱do̱k i̱i̱te̱n cinne̱ng oowu ko̱ kize Dominika icima I̱i̱te̱n ci Lawinto ming ka̱a̱da̱ naga i̱i̱te̱n bali ingane Ye̱su̱ daiza. ka̱vvu̱ta̱ naga do̱o̱k nga̱to̱de̱ kar kadakta umune wa ka̱a̱da̱nna̱ daiz bali Ye̱su̱ ke̱. Uwak Pa̱u̱lo̱ zee kize ba̱a̱li̱n keng, eci bali orong kar koto nge̱rre̱ti̱n ci reng. 8Ma̱i̱je̱ ce̱e̱zi̱ wak ta̱dde̱na̱ ko̱, anyak urezwa cik meelek atukul ngin wanai kalutene naga ke̱. 9Baling ngen Pa̱u̱lo̱ uwak niko, anyak da̱ lo̱gu̱t imma ci een zara Eutychus adunge oroot lopildinge ci ce̱e̱zu̱. Imma vu̱rrta̱, u̱yu̱we̱ meer ta̱dde̱na̱ ce̱e̱ze̱ wa atadonik ce̱e̱zi̱ uggak i̱i̱yo̱ ko̱ ka̱da̱k. 10Uluce zin Pa̱u̱lo̱ uk lo̱o̱ta̱, kar zin katabonga nonno azzine. Kar kizek ol ne, “Ma o̱ngo̱o̱li̱nnu̱, aruge enne!” 11Kar zin ki̱mi̱rte̱ do̱o̱k otoddit oot ce̱e̱z ta̱dde̱na̱, kar kadait da̱i̱ne̱t wak aadane nege daiz bali Ye̱su̱ ke̱ nga̱to̱de̱. Ozozik bo̱do̱k Pa̱u̱lo̱ nogo ba̱a̱li̱n do̱o̱k kaala looci, kar zin kuk. 12O̱o̱tte̱ zin ol lo̱gu̱t wanai i̱i̱na̱ ke̱ ce̱e̱za̱ labak, atalit zin ol oroot eci enne uruga.

Izza Pa̱u̱lo̱ ddi̱ki̱rze̱t ci Ephesusi

13Ko̱o̱tta̱ naga oowa i̱bo̱wa̱ rok orog ci een zara Assos, nginti kovvo naga karumo ki Pa̱u̱lo̱, okko atin enne nginati zoone. 14Baling urubait enne agita Assos, ko̱o̱tta̱ zin naga ki nonno i̱bo̱wa̱ rok orog ci een zara Mitylene. 15Imma i̱i̱te̱n ci reng, ko̱o̱tta̱ i̱bo̱wa̱ rok lo̱o̱c ci aburuk maama een zara Kios. Ma bo̱do̱k i̱i̱te̱n co̱de̱ ke̱, ko̱o̱tta̱ lo̱o̱ce̱ ci aburuk maama dee een zara Samos, kar i̱i̱te̱ne̱ ci reng kuzuca orog ci een zara Miletus. 16Odola zin Pa̱u̱lo̱ kozoro orog ci Ephesusi kar abunna ming iróng okkoye i̱i̱nya̱ cik meelek lo̱o̱ce̱ ci Asia, eci enne orong kuk ataman rok Jerusalem, ming amuda enne gool, I̱i̱te̱ne̱ wa Pentakosi.

17Baling arawa Pa̱u̱lo̱ orog ci een zara Miletus, i̱tto̱ne̱k enne waraga lo̱ddi̱ki̱re̱ cik ke̱le̱ci̱a̱k o̱rge̱ ci Ephesusi. 18Baling i̱vi̱tta̱k nege nonno, iizek zin nogo ne: “A̱gga̱yyu̱ niga gool ci kabahe anna nginti bali kabak ki i̱ge̱t i̱i̱nya̱ do̱o̱k, i̱i̱te̱ne̱ wa een oo ka̱kku̱na̱k anna lo̱o̱c ci Asia. 19Ki̱li̱ngli̱nga̱ anna ngati Manyi ci iróng kodongi ele cinanni ki ti̱la̱lo̱ eberene, ming nu̱nu̱n ka̱ggi̱de̱ anna oroot zo̱ze̱ ci adawana olli Ya̱u̱do̱, 20ka̱du̱wa̱kku̱ng zoz ci een de̱de̱ odohize zu̱wa̱ ki bo̱do̱k ce̱e̱zi̱nne̱ ciggo̱k. 21Ku̱du̱wa̱ha̱ olli Ya̱u̱do̱ ki Gi̱ri̱k kar kuturtak mu̱nye̱n cigge̱k Ta̱mu̱ta̱dde̱n kar bo̱do̱k ku̱tu̱we̱t Manyitinna Ye̱su̱.

22“I̱yo̱ko̱ zin, a̱du̱wa̱ka̱ Vongizi ci A̱li̱le̱ abunna la̱du̱n ming kokko anna Jerusalema, ci iróng ka̱gga̱ gi̱i̱ ci i̱i̱na̱ka̱ atin nginati. 23Ka̱gga̱ anna eci a̱du̱wa̱ka̱ Vongizi ci A̱li̱le̱ o̱no̱zo̱we̱ o̱ro̱gjo̱we̱ cik kokkoye, azi ne, okko atin gi̱de̱ne̱t ki piryanzet i̱i̱na̱ka̱ annit lagama. 24Abarik zin anna iróng karik zinin zoz ci atin okko i̱i̱na̱k baiz cinanni, ming kedeca anna li̱ngli̱ngo̱n bali aanya Manyi Ye̱su̱ ke̱, kar kuwahek ol kaviyak cik abunna anyak deten ci Ta̱mu̱ta̱dde̱no̱.

25“I̱yo̱ko̱, ka̱gga̱ anna iróng atin niga ngen acinnang udut, ommogje niga ol balik kuwaheke anna nogo ba̱a̱li̱ne̱t ci Ta̱mu̱ta̱dde̱no̱ ke̱. 26I̱yo̱ko̱ zin, ka̱du̱wa̱kku̱ng i̱ge̱t do̱o̱k, iróng bo̱do̱k bi̱ye̱ta̱ cik ollu adaka annit. 27Eci anna ku̱du̱wa̱u̱ng i̱ge̱t zoz do̱o̱k kaviyahe cik abunna Ta̱mu̱ta̱dde̱no̱. 28U̱zu̱tte̱ e̱le̱tti̱ ciggo̱k ki ol wak a̱a̱nyu̱ng Vongizi ci A̱li̱le̱, abunna ming aballu nogo. Izet tuwayok cik ke̱le̱ci̱a̱ ci Ta̱mu̱ta̱dde̱no̱, wak balik uuta Ye̱su̱ bi̱ye̱te̱ ciginnek ke̱. 29Ka̱gga̱ anna niko ming kutungeung anna i̱ge̱t lo̱o̱c, anyak atin ol cik gerzek ogon kiwagon gu̱zu̱le̱ ovvo atin ottok ol cik ke̱le̱ci̱e̱ ci Ta̱mu̱ta̱dde̱no̱. 30Anyak atin ol orgene cunno̱ng cik ovvo uhu zoz wa een de̱de̱ kize volong, kar ku̱lu̱te̱t ol cik Ta̱mu̱ta̱dde̱no̱. 31U̱zu̱tte̱ zin e̱le̱tti̱ ciggo̱k, a̱a̱dda̱ zin e̱rki̱nya̱ balik een i̱i̱yo̱ ke̱, ngen anna kibiliz ti̱lo̱wi̱ne̱t i̱ge̱t ba̱a̱li̱n ki wazin ki ti̱la̱lo̱ eberene.

32“I̱yo̱ko̱ zin karikku̱ng a̱zzi̱t ci Ta̱mu̱ta̱dde̱no̱ ki zoz ci deten cinne, eci eelanung atin kar aragizet niga bu̱k bunnat ki ol cik a̱li̱le̱ Ta̱mu̱ta̱dde̱no̱. 33Ngen anna katamatek ziik cik ataltali icima dhahab icima ru̱u̱ma̱ni̱ cik e̱e̱t imma. 34A̱gga̱yyu̱ niga ju̱rru̱m ka̱li̱ngli̱ngo̱ni̱k anna ele cinanni ki gonogga azzine cigannik. 35Imma kaale cik kogonni anna do̱o̱k, ki̱ye̱le̱u̱ng anna i̱ge̱t gool ci ka̱li̱ngli̱nge̱ naga oroot kar keelta ol cik amati, ka̱a̱da̱ zoz ci a̱du̱wa̱kke̱t Manyi Ye̱su̱ enne ele, azi ne: ‘A̱ma̱yu̱we̱ e̱e̱ti̱ ci aanyik e̱e̱t gi̱i̱ kommog e̱e̱t ci a̱gga̱ma̱ gi̱i̱ neci.’”

36Baling edeca enne zoz necu, kar zin enne kakatek u̱zu̱ngtti̱ ki nogo do̱o̱k kar zin kalayo. 37U̱tu̱lu̱zzo̱ zin nege, kar zin kizzac Pa̱u̱lo̱. 38Gi̱i̱ zin ci aanyik nogo komozte oroot, zoz ci azi enne ne, iróng atin nege acin nonno udut. Kar zin ki̱nya̱ma̱nte̱k nonno gool kuluce kuk i̱bo̱wa̱.

Currently Selected:

Buk wa To̱ni̱a̱u̱ 20: tex

Highlight

Copy

Compare