2 Ko̱ri̱nto̱ 5

E̱le̱tti̱ cik een jor

1Ka̱gga̱yya̱ naga e̱le̱tti̱ cik kanyak lo̱o̱ce̱ cu ko̱ ogon ki ti̱te̱tta̱ cik a̱ra̱gi̱ne̱ ol. Iróng zin ko̱ngo̱o̱le̱ gi̱i̱ ci adak e̱le̱tti̱ cigga̱c. Ka̱gga̱ ming ka̱da̱i̱, aanyyet atin Ta̱mu̱ta̱dde̱n nginti kaavtte udut ta̱mu̱-kenga. Iróng ngin neci ogon ki ce̱e̱zi̱ cik adiman ol azzine ko̱. 2Ming ngen kabak lo̱o̱ta̱ ngatu, kapirna, kabalac odohize eci korong kovvoya ta̱mu̱-kenga, ngati kovvo kabak ki Ta̱mu̱ta̱dde̱n ta̱mu̱-kenga. 3Eci ming kovvo naga kaavtte ki Ta̱mu̱ta̱dde̱n ta̱mu̱-kenga, kanyak atin naga kaal do̱o̱k. 4Een zin de̱de̱ ming ngen naga karuge, kanyak e̱le̱tti̱ cik ogon ki ti̱te̱tta̱ ko̱, kabalac odohize eci korong kutungttek e̱le̱tti̱ ne̱ko̱ lo̱o̱c. Iróng korongnyya ka̱vvu̱tta̱ ki ci a̱zze̱ e̱le̱tti̱ to, abarik kabalac eci korong nginti kabahe ki Ta̱mu̱ta̱dde̱n ta̱mu̱-kenga. Korongnyya zoz necu ku̱tu̱gu̱we̱ ataman abunna e̱le̱tti̱ cik ovvo atin a̱da̱i̱ ko̱ kutuhuye kizeto e̱le̱tti̱ cik abak udut. 5Ta̱mu̱ta̱dde̱n ele ci uhu e̱le̱tti̱ cigga̱c kizeto jor. Nonno bo̱do̱k ci a̱du̱wa̱kke̱t arrak oowa azi ne akati atin zoz neci mo̱o̱le̱t. I̱ye̱le̱kke̱t ngati i̱tto̱na̱ne̱ Vongiz ci A̱li̱le̱ karrak li̱ngli̱ngo̱n cinne kar kedecak neci.

6I̱yo̱ko̱ zin, ming ka̱gga̱ kabak e̱le̱tti̱ne̱ cik kanyak lo̱o̱ta̱ ngatu ko̱, iróng naga kabak ki Manyi ta̱mu̱-kenga. 7Kabak ngati ka̱tu̱we̱ Ta̱mu̱ta̱dde̱n, iróng kabak ngati kacine kaal eberene. 8Ki i̱yo̱ko̱ ming ka̱du̱wa̱ ko̱, karikka naga zi̱nze̱tti̱ Ta̱mu̱ta̱dde̱n, korongnyya ko̱do̱tte̱yya̱ e̱le̱tti̱ cik kabahe naga i̱yo̱ko̱ ko̱ lo̱o̱c, kar ka̱vvu̱tta̱ ki Manyi ce̱e̱za̱, ta̱mu̱-kenga. 9Ma i̱yo̱ko̱ nu̱nu̱n ming kabak lo̱o̱ta̱ ngatu icima ta̱mu̱-kenga, korongnyya ku̱tu̱gu̱zza̱ kaal cik anyike Manyi katalo. 10Korong zin naga do̱o̱k ol cik a̱tu̱we̱ abunna kogon kaal cik abunna, eci anyak i̱i̱te̱n imma ci kovvo kabile lo̱ki̱ko̱ ci okko Ki̱ri̱sto̱ ettedekket ba̱ci̱nno̱k cik kabaci naga baling ngen karuge lo̱o̱ta̱ ngatu, icima abunna icima gerza.

Ke̱e̱ggi̱n naga zoc ci Ta̱mu̱ta̱dde̱no̱

11Ki i̱yo̱ko̱ ming ka̱gga̱ naga zoz ci ko̱ngo̱o̱li̱ne̱ Manyi ko̱, korongnyya la̱du̱n kanyakta ol Manyi. A̱gga̱ Manyi baiz cinna ki kaal cik kedemez naga ko̱, karike zin anna zinin a̱gga̱yyu̱ niga bu̱k baiz cinna̱ng. 12Iróng naga korongnyya kar kodongta e̱le̱tti̱ zo̱ze̱ cinna̱ng ngatinno̱ng bo̱do̱k, abarik ka̱a̱nyu̱ng gool ci kar niga odongit e̱le̱tti̱ zo̱ze̱ cinna, kar zin atin abarizek ol cik odong e̱le̱tti̱ gi̱i̱ye̱ ci acin nege eberene kommog gi̱i̱ ci aave zinina. 13Ming adakket ngamoni, adakket zo̱ze̱ ci Ta̱mu̱ta̱dde̱no̱; ming kaavtte naga labak, kaavtiya zin zo̱ze̱ cunno̱ng. 14Eci rezinet ci Ki̱ri̱sto̱ adangeket zoz cu, ma̱rri̱t naga ka̱gga̱c a̱da̱k e̱e̱ti̱ co̱de̱ zo̱ze̱ ci ollu do̱o̱k, kar ol do̱o̱k ka̱da̱i̱to̱. 15A̱da̱i̱ Ki̱ri̱sto̱ zo̱ze̱ ci ol do̱o̱k, kar abunna ol wak aruge iróng ngen irez e̱le̱tti̱ cigge̱k do̱ niko, abarik abunna ming irez Manyi bali a̱da̱i̱ zo̱ze̱ cinne̱ng, kar Ta̱mu̱ta̱dde̱n kitingawe nonno daiza kurug bo̱do̱k.

16I̱yo̱ko̱ zin, ka̱gga̱yya̱ irez Ki̱ri̱sto̱ ol do̱o̱k, iróng zin naga ngen ki̱no̱na̱ ki ol do̱o̱k, ngati ol ne̱k ngen kelemtta zoz ci Ta̱mu̱ta̱dde̱no̱ ko̱. Baling ngen naga kelemtta zoz ci Ki̱ri̱sto̱, ki̱no̱ni̱ zoz cinne ki ol wak ngen kelemtta. Iróng zin naga i̱yo̱ko̱ ngen ki̱no̱na̱ kiwagon ba̱li̱ye̱ ke̱. 17Uhu de̱de̱ Ta̱mu̱ta̱dde̱n baiz ci ol wak a̱tu̱ Ki̱ri̱sto̱ ka̱vvu̱to̱ do̱. Utungtek baiz ci reeni ogone kaal cik lo̱o̱tu̱ gerzek ke̱ lo̱o̱c, u̱tu̱gu̱zzo̱ kaal cik een jor baize cinne̱ng. 18Ta̱mu̱ta̱dde̱n ci adiman kaal cik een jor baize cinna ko̱ do̱o̱k. I̱tto̱na̱ enne Ki̱ri̱sto̱ kar ki̱ki̱ya̱ kaganizet agit ki nonno, kar kaanyyet agit li̱ngli̱ngo̱n ci kaganiza ol ki nonno. 19Een zin necu zoz ci gon kuwakka naga baling a̱da̱k Ki̱ri̱sto̱ ko̱ necu. Anyike Ta̱mu̱ta̱dde̱n ol do̱o̱k lo̱o̱ta̱ ngatu abunna ming anyak gano ki nonno. Iróng enne ngen azunne ba̱ci̱nno̱k balik ogon ol wak a̱tu̱we̱ ke̱. Aanyyet enne kaviyak cik kabahe naga labak ki nonno. 20Ke̱e̱ggi̱nna̱ naga ol cik ka̱li̱ngli̱nge̱kka̱ Ki̱ri̱sto̱ lo̱o̱ta̱ ngatu. Ming kuwahekka ol kaviyak cik Ki̱ri̱sto̱, Ta̱mu̱ta̱dde̱n ele ci anyike ol kiziyet zoz cinna̱ng. Kilalekkung zin anna i̱ge̱t de̱de̱ zo̱ze̱ ci Ki̱ri̱sto̱, abunna ming anyakku gano ki Ta̱mu̱ta̱dde̱n. 21Abunna ming a̱tu̱we̱nu̱, ngen Ki̱ri̱sto̱ kabac zoz imma, Ta̱mu̱ta̱dde̱n ci anyaha nonno ki̱ki̱ya̱ ki̱ti̱ri̱z mu̱nye̱n cik ogon ol, ogon ki ci een Ye̱su̱ ele ci anyak mu̱nye̱n. Kar i̱yo̱ko̱ eci naga kowowo ki Ki̱ri̱sto̱, i̱ti̱vi̱la̱ Ta̱mu̱ta̱dde̱n mu̱nye̱n cigga̱c do̱o̱k.

Currently Selected:

2 Ko̱ri̱nto̱ 5: tex

Highlight

Copy

Compare