1 Ti̱mo̱te̱yo̱ 1

Zawinet

1Ki̱tto̱na̱ki̱ waraga cu anna Pa̱u̱lo̱ to̱ni̱a̱ti̱#1:1 To̱ni̱a̱k: E̱e̱ggi̱n ol ne̱ko̱ cik i̱tto̱n Ye̱su̱ doize cinne kar koot ke̱de̱me̱zi̱t ol zoz cinne kar bo̱do̱k kanyik nogo doiz ci otowe nege kuulo cik lo̱rye̱nta̱k kar kangaruc ol mo̱ri̱zo̱we̱ bu̱k. ci Ye̱su̱ Ki̱ri̱sto̱,#1:1 Ye̱su̱ Ki̱ri̱sto̱: Azi keng cik zar cik een Ye̱su̱ ko̱ ne i̱ti̱ri̱zze̱t Ta̱mu̱ta̱dde̱n agita. Utuge ci Gi̱ri̱yo̱ azi keng ci zar cik een Ki̱ri̱sto̱ ko̱ ne, wa o̱de̱ atahala Ta̱mu̱ta̱dde̱n kize Alaan. Utuge ci I̱bu̱ru̱ azi keng ci zar cik een Ki̱ri̱sto̱ ko̱ ne Missaya. wa bali atahala Ta̱mu̱ta̱dde̱n wa een Ti̱ri̱zo̱i̱t cinna ki Ye̱su̱ Ki̱ri̱sto̱ ci karike naga zi̱nze̱tti̱ ko̱.

2Keheriki i̱nne̱t Ti̱mo̱te̱yo̱ wa een ngeranni de̱de̱ tu̱we̱nta̱.

Kala Ta̱mu̱ta̱dde̱n Be̱e̱ti̱nna̱ ki Manyitinna Ye̱su̱ Ki̱ri̱sto̱ kar kaanyci deten ki bunnat ki a̱vvu̱ze̱t yahe.

Zuute ol wak edemez volong

3Ki baling ka̱jji̱nni̱ la̱du̱n i̱i̱ bali kokkoye anna lo̱o̱ce̱ ci een Macedonia ke̱, aave i̱nna̱ o̱rge̱ ci een Ephesus kar gerenyek ol wak edemezek ol wak a̱tu̱we̱ zoz ci een volong. 4Ma anyike ol ne̱ke̱ kecebta ol wak a̱tu̱we̱ o̱o̱tti̱ nga̱ri̱de̱te̱ wak reentik ki boorzet wa obod ki ji̱ji̱ti̱gga̱c, ma̱rri̱t kaala ne̱ke̱ ming anyaha dangonet ci gerze do̱ niko. Iróng dangonet neci eela e̱e̱t imma kabak baiz ci a̱tu̱we̱ enne Ta̱mu̱ta̱dde̱n zinine ci abunna.

5Keheraki zin waraga cu kar ti̱lo̱ ol wak a̱tu̱ Ye̱su̱ kirezto zi̱nze̱tti̱nne̱ cik voorik per, kar nege ki̱no̱ni̱t kaal cik abunna go̱o̱le̱ ci ki̱no̱ne̱ ol wak a̱tu̱ Ta̱mu̱ta̱dde̱n de̱de̱. 6Utungtek zin demezyaha uggak de̱mzi̱ne̱t ci Ta̱mu̱ta̱dde̱no̱ lo̱o̱c, abarik aartik zi̱nze̱tti̱ dangonet ci ozoze darace. 7Orong kizeto de̱me̱zzo̱k cik lo̱ti̱nno̱k cik Musesi, iróng zin nege e̱le̱tti̱ne̱ a̱gga̱ zo̱zzo̱k cik a̱du̱wa̱ ko̱, iróng bo̱do̱k a̱gga̱ u̱nge̱tti̱ cik de̱mzi̱ne̱t neci.

8Ka̱gga̱ ri̱t naga do̱o̱k niko ming abunna lo̱ti̱nno̱wa̱ ngati ka̱li̱ngli̱nge̱ go̱o̱le̱ ci abunna Ta̱mu̱ta̱dde̱no̱. 9Eci ka̱gga̱ niko iróng lo̱ti̱nno̱wa̱ een cik ol cik abunna, abarik e̱e̱ggi̱n cik ol wak een i̱rki̱ryo̱k ki ol wak abure zoz ci alaano, ki ol wak mu̱nye̱nu̱, ki wak abure zoz ci Ta̱mu̱ta̱dde̱no̱, ki wak a̱ru̱k be̱e̱ti̱gge̱k ki e̱e̱ti̱gge̱k ka̱da̱i̱to̱ ki wak amuny ol, 10ki ol wak orooto ki ngaai, ki ol cik macik ottodo kiwagon ming oogin ol ki ngaai, ki ol wak ogoroz dooli cik ollu koot ku̱tu̱yyo̱i̱ kizeto du̱cca̱k, ki ol wak e̱e̱ggi̱n volongnyok, ki ol wak iróng a̱du̱wa̱ zoz ci een de̱de̱ ngu̱me̱ ci Ta̱mu̱ta̱dde̱no̱, ki ol wak abure de̱mzi̱ne̱t wa een de̱de̱, 11orkor ki kaviyak cik abunna#1:11 Kaviyak cik abunna: Een necu zoz ci obod ki Ye̱su̱ Ki̱ri̱sto̱ wa bali utunya mu̱nye̱n cigga̱c ngati a̱da̱kne̱ enne ta̱la̱ke̱ca̱ kar kaanyyet ruget ci abak udut. Ta̱mu̱ta̱dde̱no̱ manyi ma̱yu̱we̱ne̱t balik i̱lo̱ti̱ka̱ enne annit ke̱.

Aanyik Pa̱u̱lo̱ Ta̱mu̱ta̱dde̱n zany ngati alalneke nonno mu̱nye̱n

12Kanyik zin anna zany Manyitinna Ye̱su̱ Ki̱ri̱sto̱. Kanyik bo̱do̱k zany ngati a̱gga̱we̱ zinin cinanni ming karike nonno. Kar zin a̱gga̱ya̱ annit ke̱e̱ni̱ e̱e̱t ci kabunna kar kaanya komiz ci ka̱li̱ngli̱nge̱ li̱ngli̱ngo̱n wainne. 13Baling ka̱gi̱di̱ ol wak a̱tu̱ zoz ci Ye̱su̱, kar zin kodom nonno nu̱nu̱n, ngen Ta̱mu̱ta̱dde̱n eelanna annit dee, alaleya mu̱nye̱n wagannik ma̱rri̱t ngen bali anna kelema zoz cinne, kar bo̱do̱k ngen ka̱gga̱ kaal ne̱k balik kogonni ke̱. 14Aanya zin Manyitinna eezete wainne, tu̱we̱ne̱t ki rezinet wa karuba ngati Ye̱su̱ Ki̱ri̱sto̱.

15Een zoz cu de̱de̱, orong kelemtta, i̱ki̱ya̱k Ye̱su̱ Ki̱ri̱sto̱ wa atahalai lo̱o̱c kar ki̱ki̱ya̱ ki̱ti̱ri̱z ol wak mu̱nye̱nu̱ ki bali ming ke̱e̱ni̱ anna e̱e̱t ci mu̱nye̱nu̱ kommogo ke̱. 16Alaleya Ta̱mu̱ta̱dde̱n annit e̱e̱t wa mu̱nye̱nu̱ wa ommog veelek kar ol kicinnta bunnat ci Ye̱su̱ Ki̱ri̱sto̱ ngatinanni, kar ol kicinnet laliz ci zinin ci Ta̱mu̱ta̱dde̱no̱. Kar ol cik a̱tu̱ zoz ci Ye̱su̱ kuruget udut. 17Kala alaan kar bo̱do̱k ki̱di̱ngdi̱nga̱n nonno wa abak udut, wa iróng a̱da̱i̱, wa iróng kacin eberene, nonno Ta̱mu̱ta̱dde̱n o̱de̱ ṯok! Ko̱to̱ngo̱o̱ltte̱ nonno udut. I̱i̱ny.

I̱lo̱t Pa̱u̱lo̱ Ti̱mo̱te̱yo̱

18Ti̱mo̱te̱yo̱ wa e̱e̱ni̱ ngeranni tu̱we̱nta̱, kamitaneki zoz necu niko kar zuute ele olle wak edemezek gonoggi volong azi ne zoz ci a̱kku̱ Ta̱mu̱ta̱dde̱na̱. Kozozi zin niko ngibali a̱du̱wa̱ne̱ a̱ri̱tto̱wa̱ muluk ci a̱kku̱ Ta̱mu̱ta̱dde̱na̱ obod ki i̱nne̱ta̱. Zik ti̱lo̱wi̱ne̱t necu ju̱rru̱m kar nyak tu̱we̱ne̱t, abunna atin ming u̱u̱li̱ a̱ri̱tto̱k ne̱k edemez ol volong ke̱. 19Anyak ol u̱gge̱ cik iróng arike tu̱we̱ne̱t zi̱nze̱tti̱, bak a̱ddu̱te̱ tu̱we̱ne̱t cinne̱ng ki i̱ra̱na̱ cik aavtte de̱e̱ra̱. 20Ma̱i̱je̱ zin ol ne̱k ogon kaal ne̱ko̱ ko̱, ciko Hymenaeus ki Alizanduru, kodotiya anna nogo lo̱o̱c iróng ngen ki̱lo̱ti̱ nogo kar kedemez Sitani#1:20 Sitan: Awu ol nonno azi ne, lo̱rye̱ni̱t wa een alaan ci anjilonyau wak bali abure Ta̱mu̱ta̱dde̱n ta̱mu̱-kenga, kar Ta̱mu̱ta̱dde̱n kottowak nogo lo̱o̱c. I̱vi̱ta̱ zin anjilonya ne̱ko̱ izeto kuulo lo̱o̱ta̱ ngatu. IkebO̱no̱zzo̱k 12:7-9. nogo, gerza ming odom nege Ta̱mu̱ta̱dde̱n.

Currently Selected:

1 Ti̱mo̱te̱yo̱ 1: tex

Highlight

Copy

Compare