1 Ko̱ri̱nto̱ 11

1Abunna ming anuyang annit kaale wak gon kogonni anna ko̱, ki i̱yo̱ko̱ ming kanu anna kaal cik ogon Ki̱ri̱sto̱ ko̱.

Gool ci abunna ka̱di̱ngdi̱nga̱ne̱ Ta̱mu̱ta̱dde̱n ki baiz ci ke̱le̱ci̱o̱

2Katalne anna ngatinno̱ng oroot, go̱o̱le̱ ci aadanang niga annit ko̱, kar bo̱do̱k u̱zu̱tte̱ de̱mzi̱ne̱t bali kedemezung anna i̱ge̱t ke̱ do̱o̱k.

3I̱yo̱ko̱ zin, korongi ku̱du̱wa̱u̱ng, Ki̱ri̱sto̱ ci abal ol cik macik do̱o̱k, okko e̱e̱ti̱ ci maci abal ngaa, ma̱i̱je̱ Ta̱mu̱ta̱dde̱n nonno ci abal Ki̱ri̱sto̱. 4Ming alaye e̱e̱ti̱, icima ozoz a̱ri̱to̱i̱ti̱ ci zoz ci Ta̱mu̱ta̱dde̱no̱, kar bo̱do̱k ku̱bu̱ng oo, iróng enne o̱ngo̱o̱le̱ Ki̱ri̱sto̱ de̱de̱. 5Imma ngaa ci alaye, icima ozoz arizet ci zoz ci Ta̱mu̱ta̱dde̱no̱ kar ngatu iróng ecebek ru̱u̱m oo cinne, iróng enne o̱ngo̱o̱le̱ e̱e̱t cinne de̱de̱. Ogon ki ci enget enne ima ciginnek. 6Ming iróng ngaa eceb oo cinne ru̱u̱ma̱, abunna ming odota ima oowa do̱o̱k, ming een gi̱i̱ ci gerze ngati ngaawo ming odota ima, abunna ming ecebek ru̱u̱m oo. 7Iróng abunna ming a̱bu̱ng e̱e̱ti̱ ci maci oo, eci e̱e̱ti̱ ci maci eenycai kize ri̱ri̱to̱n ci i̱ye̱la̱ di̱ngdi̱ngo̱n ci Ta̱mu̱ta̱dde̱no̱; imma ngaa een enne di̱ngdi̱ngo̱n ci e̱e̱t ci maci. 8Eci e̱e̱ti̱ ci maci iróng a̱kku̱ ngaawa, abarik ngaa ci a̱kku̱ e̱e̱te̱ ci maci. 9Iróng e̱e̱ti̱ ci maci eenycai eliye ci ngaawo, abarik ngaa ci eenycai eliye ci e̱e̱t ci maci. 10Eci zin zo̱ze̱ necu, kar bo̱do̱k zo̱ze̱ ci anjilonyau, anyik ngaa ku̱bu̱ng oo ru̱u̱ma̱ kize gi̱i̱ ci een doiz cinne.

11Imma ngati Manyi Ye̱su̱, iróng ngaa abak do̱ kutungek e̱e̱t ci maci lo̱o̱c, icima e̱e̱ti̱ ci maci abak do̱ kutungek ngaa lo̱o̱c. 12Eci ngaa a̱kku̱ ngati e̱e̱t ci maci, a̱rri̱ta̱ bo̱do̱k ngaa e̱e̱t ci maci. Ma̱i̱je̱ ngatu a̱vvu̱ kaala do̱o̱k ngati Ta̱mu̱ta̱dde̱no̱. 13I̱no̱ni̱t zoz necu e̱le̱tti̱ne̱ cuggo̱k: Abunna yo gerza da̱ ming abile ngaa olle orgena, kar kala Ta̱mu̱ta̱dde̱n ki̱zzi̱ rok gi̱i̱ ci a̱bu̱nge̱ oo? 14Ka̱gga̱ naga keer cinna, ming aanyik e̱e̱ti̱ ci maci ima ciginnek kizeto wunte, een zoz necu a̱li̱ya̱n ngatinne. 15Abarik ming anyak ngaa ima cik wuntik, een necu di̱ngdi̱ngo̱n cinne. Eci Ta̱mu̱ta̱dde̱n aanyik nonno ima cik meelek kize ci a̱bu̱nge̱ oo cinne. 16Ming anyak e̱e̱t ci orong kadang zoz necu, iróng naga kanyak gool ci kogonne kaal, een necu gool ci kogonne kaal ke̱le̱ci̱a̱nya̱i̱ cik Ta̱mu̱ta̱dde̱no̱.

Da̱i̱ne̱t wak aadane ol daiz wa Ye̱su̱

17I̱yo̱ko̱ niko, iróng anna korongi kirezung bo̱do̱k zo̱zzo̱we̱ cik korongi ku̱du̱wa̱u̱ng ko̱, eci ming ovvo alutenu nga̱to̱de̱ zo̱ze̱ ci alawinu, abarik lutenet cunno̱ng ko̱ anyahakku̱ng zoz ci gerze. 18Kazii azi ol ne arrak oowa, ming ovvo niga alutenu izet ol cik ke̱le̱ci̱a̱k, anyakku niga ngero orgene cunno̱ng, ka̱gga̱ zin anna ogon zoz necu niko de̱de̱. 19Abarik bo̱do̱k ngero cunno̱ng ko̱ iróng gerza, kar abunna ka̱gga̱ elemi Ta̱mu̱ta̱dde̱n ollik jang ngatinno̱ng.

20Ming urumteu niga nga̱to̱de̱ kar adait da̱i̱ne̱t wak a̱a̱da̱nnu̱ niga Manyi, iróng niga a̱a̱da̱nnu̱ daiz cinne go̱o̱le̱ ci abunna. 21Ming ovvo niga adainu, adakce ol uggak iróng ere gonoggi. Erahek ol uggak magizet, ovvo uggak aud merte do̱ kebakte. 22Iróng niga anyakku ce̱e̱zi̱ cik adainu kar uudet merten nginati? Ma ibbezzu ke̱le̱ci̱a̱ ci Ta̱mu̱ta̱dde̱no̱, kar etezit ol cik iróng anyak da̱i̱ne̱t. Ku̱tu̱gu̱we̱u̱ng wo̱ye̱ anna i̱ge̱t nya? Abunna kirezung zo̱ze̱ necu? Iróng een niko.

Kwo̱o̱r ci da̱i̱ne̱t cik Manyi

(Ma̱te̱yo̱ 26:26-29; Marko 14:22-25; Lu̱ka̱ 22:14-20)

23Eci bali Manyi Ye̱su̱ i̱ye̱le̱ya̱ annit kaal balik kedemezung anna i̱ge̱t ke̱. Idima Manyi Ye̱su̱ umune ba̱a̱li̱n bali adawane ol nonno ke̱, 24baling aanyik enne Ta̱mu̱ta̱dde̱n zany, u̱du̱l umune kar kize ne, “Een necu ele cinanni, anyoziung i̱ge̱ta̱, u̱tu̱gu̱z niko ngati aadanang.” 25Imma go̱o̱le̱ neci ele baling uduttet da̱i̱nte̱, idima uduc ci merto (vi̱no̱wo̱), kar kize ne, “Een necu olom ci een jor bi̱ye̱te̱ cigannik, u̱tu̱gu̱z zoz necu, ming ovvo auddu, abunna ming aadanang.” 26Ming adakku umune cu kar uudet merte cu, uwakku niga zoz ci daiz ci Manyi Ye̱su̱ zee kobodak enne lo̱o̱c.

27Ming adak e̱e̱ti̱ umune neci icima aud merte (vi̱no̱) go̱o̱le̱ ci gerze, u̱tu̱gu̱ enne mu̱nye̱n eliya ki bi̱ye̱te̱ cik Manyi. 28Anyik e̱e̱t kicin kaal cik anyak enne zinina ju̱rru̱m ming ngen kadak umune icima kuud merte uduca. 29Ming adak e̱e̱ti̱ imma umune icima aud merte (vi̱no̱) ngati iróng enne elemne ele ci Manyi, adahek icima audek ele cinne lo̱ki̱ko̱ ci okko atin ettedonik nonno. 30Imma zin zo̱ze̱ necu, anyak ol u̱gge̱ orgene cunno̱ng cik omori kar korbboit, a̱da̱i̱to̱ zin ol cik meelek orgene cunno̱ng. 31Ma̱i̱je̱ ming katiman naga zi̱nze̱tti̱ cigga̱c kaale cik kogon ko̱, i̱llo̱i̱ atin lo̱ki̱ko̱ ci ettedoniketa. 32Ming apahekket Manyi lo̱ki̱ko̱, amad enne baiz cinna, kar iróng atin apahoniket lo̱ki̱ko̱ ki ol cik lo̱o̱tu̱.

33I̱yo̱ko̱ zin, gotonogga ki ngonogga tu̱we̱nta̱, ming ovvo niga alutenu nga̱to̱de̱ da̱i̱nte̱, e̱re̱yya̱ gonoggu do̱o̱k ki̱vi̱ta̱. 34Ming anyak e̱e̱t ci adak magiz, anyik nonno kadaho ce̱e̱za̱, kar abunna iróng anganyu e̱le̱tti̱ cuggo̱k ngati ovvo alutenu.

Kar ming ki̱ki̱ya̱ anna kokko atin ka̱du̱wa̱kku̱ng kaal u̱gge̱.

Currently Selected:

1 Ko̱ri̱nto̱ 11: tex

Highlight

Copy

Compare