Numeri 16
16
1Kpa Koraki wan u Isehar wan u Kohati wan u Levi, man Datan man Abiram ônov mba Eliabi kua On wan u Peleti, ônov mba Ruben, ve kua a ior,
2ve va tile sha ishigh ki Mose; ve lu a Mbaiserael mbagenev, lu ior deri uhar man akunduahargber, lu mbahemen ior mba i yila ve mkohol yô, lu ior mba duen ati je;
3tsô ve kohol, ve hingir ayongo a Mose man Aron, ve kaa a ve er: Ne ya kuma ve, gadia ior cii ka uicighanmbaiorov, hanma or kpaa; TER ngu a ve; man ka nyi ne kenden ayol a en sha je er ne hemba ior i TER cii nahana?
4Er Mose ungwa nahan yô, a gure a kuma ishigh inya,
5a ôr kwagh a Koraki kua ior nav cii, a kaa er: Kper pepe TER Una tese mba ve lu mba Nav, man or u nan lu icighanor yô, Una er, nana kporom her a Na, een, or u Una tsuwa nan la, Una er, nana kporom her a na.
6Yô, er nen kwagh ne: tôô nen ugbande mba nanden kwaghhumandoon shimi, Koraki a ior nav cii;
7Kper yô, haa nen usu shimi, gema haa nen kwaghhumandoon sha mi, sha ishigh ki TER, tsô or u TER Una tsuwa nan la, ka nan nana lu icighanor ye, ne kumbur yum, ne ônov mba Levi.
8Tsô Mose kaa a Koraki er: Shi ungwa nen yôô, ne ônov mba Levi:
9Er Aôndo u Iserael A tsough ne ken ior mba Iserael sha u Una kporom a ven her a Na sha u né eren tom u tabernakel u TER, man né tilen sha ishigh ki iorough né eren ve tom,
10man er A kporom a we kua anngôôv ou, ônov mba Levi cii kpaa, nahan kpaa kuma ne gaa? Shi tom u pristi kpaa ne mba kerene?
11Nahan we a ior ou cii, ne kohol ne hingir iyongo a TER; Aron ngu di nyi man ne hon unu?
12Tsô Mose tindi i za yila Datan man Abiram, ônov mba Eliabi, kpa ve venda er: Sé va ga;
13er u dugh a vese ken tar u atumbabua man iyough dumbur ker la wer, ú va wua se ken desereti ne, nahan ka kwagh u kiriki? Shi ka u ka yan tor sha vese kpaa ha?
14Man u va a vese ken tar u atumbabua man iyough dumbur ker ga, u na se dyako u ishule man ikon i wain kpaa ga; sar u ka tsuwan ior mban ashe? Yô, sé va ga.
15Nahan ishima vihi Mose tsung, a kaa a TER er: De rumun nagh vegh ku ve ve a mi la ga; shin jaki môm tsô kpaa, m ngohol ve sha apera ga, shi m er mô ve môm kwaghvihin kpaa ga.
16Tsô Mose kaa a Koraki er: Kper yô, we, kua ior ou cii, va nen sha ishigh ki TER, we man ve man Aron;
17hanmô wen nana̱ tôô gbande u nan u kwaghhumandoon, nana̱ haa kwaghhumandoon shimi, man hanmô wen nana̱ va a gbande u nan u kwaghhumandoon sha ishigh ki TER, ka ugbande deri uhar man akunduahargber; we kua Aron kpaa, hanmô wen nana̱ va a gbande u nan u kwaghhumandoon.
18Tsô hanma or tôô gbande u nan u kwaghhumandoon nan haa usu shimi, shi nan haa kwaghhumandoon sha mi, nan za tile hen hunda u tenti u kohol ker la, a Mose man Aron imôngo.
19Koraki kohol ior cii, hingir ayongo a ve, hen hunda u tenti u kohol ker la; tsô iengem i TER va ande hen ior cii.
20Nahan TER ôr kwagh a Mose man Aron kaa er:
21Due nen ken ior mban kera, M tim ve icin i môm.
22Kpa ve gure ve kuma ishiv inya, ve kaa er: Ahii! Aôndo u ujijingi mba uumace cii, or môm nan er kwaghbo, tsô Ú gema Ú yuwe ior cii?
23Nahan TER ôr kwagh a Mose kaa er:
24Ôr kwagh a ior kaa ve wer: Kar nen hen tenti u Koraki man Datan man Abiram kera.
25Tsô Mose mough za hen Datan man Abiram; mbavesen mba Iserael kpaa cir un ijime.
26A za ôr kwagh a ior, a kaa er: Kar nen hen utenti mba aferaior mban kera yôô; de benden nen ma kwagh ve ave ga, sha er né tim sha asorabo a ve la cii ga yô.
27Tsô ve kar hen utenti mba Koraki man Datan man Abiram kera; Datan vea Abiram yô, ve due, ve tile hen hunda u utenti vev, ve a kasev vev man ônov vev mba nomso man mbayev vev mba kiriki.
28Mose kaa er: Ka sha kwagh ne man né fa er i lu TER A tindim sha u m̱ eren ityom ne cii ye, m gbe eren i sha ishima yam tsô ga.
29Aluer ior mban vea kpe er ior cii ve kpen nahan, shin ma kwagh á er ve u a eren ior mbagenev kpaa yô, ka TER A tindim ga.
30Kpa aluer TER Una er kwagh u he, inya ia aver zwa u i, ia mena ve kua ior vev cii, vea haa shin Sheol uma yô, fa er ior mban ve laha TER yô.
31Tsô kur akaaôron ne yô, inya pav hen pe ve tile la;
32inya aver zwa u i, mena ve man ônov vev kua ior mba Koraki cii, a akaa ve cii.
33Ve a akaa a ve lu a mi cii, ve haa shin Sheol uma; inya hide zua her, cir ve, ve tim ken ior kera.
34Mbaiserael mba ve kase ve cii, zum u ve ungwa mliam vem la yô, ve yevese; gadia ve kaa er: Inya i̱ de men se ga.
35Shi usu due hen TER, hia ior deri uhar man akunduahargber mba ve va nande nagh ku kwaghhumandoon la.
36Tsô TER ôr kwagh a Mose kaa er:
37Kaa Eliasar wan u pristi Aron, a̱ kura ugbande mba kwaghhumandoon ken usu u lu masen enger la, a̱ tsenda usu la kera ca je; gadia ve hingir uicighanmbaakaav;
38ka ugbande mba kwaghhumandoon mba ior mba asorabo a ve a ne ve ku ne; i var iyôv mbi par par mbi cirin atse a nanden nagh sha mi la a mi; gadia ve va a mi sha ishigh ki TER, ka nahan man ve hingir uicighanmbaakaav ye; nahan vea lu Mbaiserael ikav.
39Tsô pristi Eliasar tôô ugbande mba togula mba kwaghhumandoon mba ior mba i nande ve, ve va na nagh a mi la, i̱ var kwagh u cirin atse a nanden nagh sha mi la a mi;
40sha u ve̱ lu Mbaiserael ikav i umbur kwagh, man sha u or u ken inya nan lu ken tsombor u Aron ga, nana de kporom er nana̱ nande kwaghhumandoon sha ishigh ki TER, nana gema á hingir er Koraki a ior nav nahan ga, er TER kaa Mose, Mose gema kaa un nahan.
41Tsô sev mbu av yô, ior i Mbaiserael cii mough ayôôso sha Mose kua Aron, ve gba kaan er: Ka ne je ne woo ior mba TER ye.
42Tsô er ior kohol hingir ayôôso a Mose man Aron la yô, ve gema ashe ken vegher u tenti u kohol ker la, ibeenegh gema cir sha mi, iengem i TER kpaa ande ken igbar.
43Tsô Mose vea Aron ve kar ken hemen u tenti u kohol ker la.
44TER ôr kwagh a Mose, kaa er:
45Kar nen hen ior ne kera, Me tim ve icin i môm; tsô ve gure ve kuma ishiv inya.
46Mose kaa a Aron er: Tôô gbande wou u kwaghhumandoon, dugh usu ken atse a nanden nagh sha mi, wa shimi, haa kwaghhumandoon sha mi, tôô fese za a mi hen ior, za na iwom sha ci ve; gadia TER ngu yuwen, bouange kpaa hii ve.
47Tsô Aron tôô, er Mose kaa un nahan, za ayem, za nyôr ior hen atô; yô bouange vande hiin hen ior kera kpaa; tsô a haa kwaghhumandoon sha mi, a na iwom sha ci u ior.
48Tsô til hen atô u mbakpenev a mbaumav yô, bouange la maa de.
49Ior mba ve kpe sha bouange la yô, lu ior dubu pue kar unyiin man deri utaankaruhar je, i ôr ior mba ve kpe sha kwagh u Koraki la ga.
50Tsô Aron hide hen Mose hen hunda u tenti u kohol ker la; bouange la kpaa bee.
TIV OLD BIBLE © The Bible Society of Nigeria, 2014.