Dalaana 38
38
Yudaa a Tamaar
1Jamanii baaha, Yudaa kolohte ɓëy faam wa na, saañce faam Hira fi ɓëy Adulam. 2Daaha, Yudaa yúhëntëꞌté a kúkëy cafaƴ, ɓeɓpe ri ɓeleɓ, wa ñéerúuté. Boffi ɓelaa hínú Suwaa, ɗi ɓëy Kanaan. 3Ɓelaa pokke loo, lahte koy ƴaal, Yudaa yeɗte ri tii Er. 4Ɗi pokaatte loo, lahte koy ƴaal kay, ɗi yeɗte ri tii Onaan. 5Ɓelaa lahilte koy ƴaal kay, yeɗte ri tii Selaa ; límí koy ki baa ɗeef Yudaa húmú Kesip.
6Yudaa saamiɗte Er ɓeleɓ ; ɓelaa hínú Tamaar. 7Bi pagaɗɗi Er neɓaay Koo-Yahwee, Yahwee happe ri húl. 8Yudaa won Onaan tígí daaha tih : « Fu yúh yee waɗ ro di húlídë ɓahuu na ra maan ? Ɓeye ɓelaa, fu saamiɗ koy-yaafu tal. » 9Ndaa, bi yúh Onaan biti koy ka nay límú rë ii hen bii, ñéerëe rí a ɓelaa ɓéeɓ, ɗi hom keenaꞌ feey, kaaꞌ saamɗi koy-yaafi tal. 10Pagadee ke ri baa neɓaay Yahwee, Yahwee happe ri húl ɓal. 11Tígí daaha, Yudaa won Tamaar tih : « Paye fu jëtɗée faam boffu níi bín mitaa koy soꞌ Selaa ƴaal ra. » Ɗi won nufi tih : « Bee waray húl ti koy-yaayyi nen. » Tamaar yeeltee nimil faam boffi, hompe na.
12Tíkëhté yii maañce, koy Suwaa ɓeleɓ Yudaa húlté. Ɗúmëꞌ luuya ra, Yudaa saañce Timna yérí ɓëewë na ëylú fënúffí harri ra, ñéerëꞌté a Hira, koojee ke ri dék Adulam ra.
13Kelaꞌ Tamaar biti pacooli ín saañ Timna kénsëhí ɓëewë na ëylú fënúffí harri ra, 14ɗi yíppée nís búuɓɓí jëtíɗɗí, ɓeɓpe músëer jímbëerëhté, kaaꞌ biti yúhsúu, payte tookke haalaani Enayim, di waali Timna. Ɗeef nuf Tamaar payte biti Selaa mitte ƴaal te ri onuy ri ɓeleɓ.
15Olaꞌ Yudaa ɓelaa jímbëerëhté, ɗi habaꞌ ri ɓeleɓ tílëh. 16Bi yúhsëey rí ɓeleɓ koohi, ɗi ɗalte ɗii na ɓúk waala, won ɗi tih : « Aye fu fanoh a soꞌ hém neɓaꞌ ro. » Ndaa ɓelaa won ɗi tih : « Fay soo yere yih, biti fu fanoh a soꞌ ? » 17Yudaa won ɗi tih : « May ɓeɓ sékét teem-teem yubi soꞌ, mi kéyrëꞌ rë rí. » Ɓelaa won ɗi tih : « Mi tahte, ndaa fay soo yeɗ yii haba mi níi balaa baaha. » 18Yudaa meelte ri won tih : « May roo yere yih, fu ham ɗoo na ? » Ɓelaa won ɗi tih : « Yeɗ soꞌ búurë lúumú#38.18 búurë lúumú : Búur daa ri suumii ɗookuu a koyyi gúussé, ƴaal na pokoh ri. Filiɓ gonli beh, ɓelaa meelaꞌ búurë nda ɓëeꞌ mín yúhsúu., a duuda yaꞌu. » Ɗi yeɗte wa ɓelaa, fanohte a ri, ɓelaa ɓeyaꞌte na loo. 19Tamaar kolohte nimilte faam, níssé músëerë jímbëerëꞌ rí rë, ɓekaatte búuɓɓí jëtíɗɗí.
20Yudaa nahte koojee ke ri dék Adulam ra komi ɓelaa sékédë, wonte ri biti lah raa ɗi kalaaloh iña húmú yeɗ ɗi ɓelaa ra ; ndaa kooja olay ɓelaa. 21Ɗi meelte ɓëewí ƴaalla dékú daaha ra, nda wa oluy ɓelaa na húmú cagaaloh ɓúk waali Enayim ra. Wa wonute ri biti lëhírëy ɓelii na cagaaloh tígí daaha. 22Kooja nimilte Yudaa na, won ɗi tih : « Mi olay ri, te ɓëewë dékú në rë sah wonu ti lëhírëy ɓelii na cagaaloh tígí daaha. » 23Yudaa won ɗi daaha tih : « Ɗi haba iña yeɗ mi ri ra ɗii na, toñeh yen yaproh affi yen. Di mín rí man ɓéeɓ, mi kéyrëꞌté ɓelaa sékédë, te payaꞌ fu ra, fu olay ri. »
24Tíkëh yii waɗtee mit céyín éeyë, ow acce won Yudaa tih : « Tamaar ɓeleɓ koohu paam tílë níi loo ɗeeffe ri na. » Tígí daaha, Yudaa nahaꞌte hawi, won tih : « Ɗi ɗúhrún gina, tamu yéelíɗ. » 25Ndaa na ɗúhrú ɓelaa ra, ɗi wolaꞌte pacooli na won tih : « Ɓëeꞌ lahaꞌ iñƴee ra daa on soꞌ loo. Olsee noo, nda fay yúh ɓëeꞌ lahaꞌ búurë a duudi bee ra. » 26Yudaa yúhsëꞌté wë, won tih : « Ɗi luk soo júɓ ; biti mi onay ri koy soꞌ Selaa ɓeɓ ri ɓeleɓ, daa komaꞌ yee paŋ ri bee ra. » Kolaꞌte baaha, Yudaa fanlaay a ɓelaa.
27Tílëꞌ níi lowa lahte ra, ɓelaa kúɗ síis. 28Na ɓësíl rí rë, lahte bi ɗúhíɗté yaꞌi ; ɓelaa na múcël rë hampe yaꞌa pokke na lékít luum won tih : « Bee daa ɗéɓpí ac. » 29Ndaa ɗi hëelíɗté yaꞌi níi koy-yaafa daa ɗéɓpí límú. Ɓelaa na múcël rë yíppée won tih : « Waala ɗaɗ fu ra mën ɗí waal ? » Yudaa yeɗte ri tii Peres (daa ri : ɗaɗte waal). 30Koy-yaafa poku lékkí luuma yaꞌ ra antee límú. Yudaa yeɗte ri tii Serah (daa ri : púlí naꞌ).
Currently Selected:
Dalaana 38: NDV
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
