Kada Bulawan 30
30
Pira-pira kadanna Agur
1Susi tee to kadanna Agur anakkana Yake to-Masa nakua,
“Oo Allataala, bo'jo'mo',
nang bo'jo' tonganmo',
na tangkukullemi!
2Nasaba' aku'mo bango'na jio mai sininna tau,
susina' olok-olok te'da kamapahanganna.
3Te'da naden kupelajahhii to macca,
arannai te'da kapaissenanku' jiona Allataala Tomala'bih.
4Indara to mellao mende' suruga?
Indara to wa'ding ngka'pan angin?
Indara to wa'ding mbukkuq wai mpake kaen,
ba'tu nnanggean tampak lino?
Ia ke muissenni paui kee, indara sanganna
na indara sanganna anakkana?
5Sininna kadan-Na Allataala tongan ngasan.
Iamo perisai lako sininna to toratu mentilendung lako kale-Na.
6Danggi' murangngan-rangnganni kadan-Na Allataala
danggi' Napasalako,
Nasangako to pangpakena.
7Oo Puang Allataala, den dua tee la kupeta'da
danggi' Tacia' ntarimai ta'bulu' tuo unapa', iamo to:
8Danggi' lalo namessun jio timungku' to kada majekkong sola mangnguraga,
na danggi' Taeloranna' kaasi-asi ba'tu sugih.
Ia bangmo kupenyamanni to kande Tabenna'.
9Iamo ke sugihna', kupesakkanni-Ki' kumangkada kumua,
‘Indara to Puang Allataala?’
ba'tu ia ke kaasi-asina', mbai kumale boko,
nanco'lai sangan-Ta'.”
Ba'tu pira-pira pangpangngajah laen
10Danggi' mupau salai to kaunan lako puangna,
danggi' natangdoiko joo kaunan, na iko dipasala.
11Den tau ntangdoi ambe'na
sola tangnnangga' indona.
12Den tau ssanga kalena te'da salana,
apa sitonganna te'dapa nadipaccingngi dosana.
13Den tau te'da naangga' padanna rupa tau,
nakita majiong bangngi.
14Den tau maparrang mangkengke butung pa'dang
na susi piso to torana,
gaja sa'ga' ncappu'i to tokaasi-asi
sola tomase-mase llan mai lino.
15Ia to toraka susi lematik nnampui dua anak baine to disanga,
“Aku'-aku' diben!” sola “Aku'-aku' diben!”
Den tallu passalan to te'da naden namangkada nakua, “Barahmo'!”
Na den appa' passalan to te'da naden namangkada nakua, “Budamo!”
16Iamo to lino tomate,
baine tamanang,
padang makase to gaja ngkadoangngi uran
na api mangngulala'.
17Ia to toncapa' ambe'na
ba'tu cia' mpesa'dingngi indona,
la natittoi kaok to matanna
nakandei langkan to batang rabukkuna.
18Den tallu to mpajangngahna'
iarika appa' to gaja sussa kupahang, iamo to:
19langkan mentia' jao langi',
ulah menonoh jao buntu batu,
kappala' nnorong jiong tasik,
na kallolo macinna lako ana'dara.
20Ia to akkalanna baine kemuanemo na sala kedo susi tee,
ianna mangka manggauk sala,
susii to tomangka kumande, mpa'di timunna,
namangkada kumua, “Te'da aku' apa gaja' kupugauk!”
21Den tallu to mpamarongka lino
iarika appa' passalan to gaja sussa dioloi, iamo to:
22kaunan menjaji raja,
tobango' nakeassele' ngasan to nakadoangngi,
23den mesa' baine te'da tau ngkabudaii, apa kemuane unai,
mesa' kaunan baine menjaji puang ssulle puangna baine.
24Den appa' olok-olok sibiccuk llan lino
apa sigaja macca, iamo to:
25Lintik te'da namawatang,
apa ianna pealloan iamo nanii rrempun kande.
26Pelanduk te'da too namawatang,
apa ngkabua' bola jao buntu batu.
27Batik te'da rajana,
apa marappi mangbalole'.
28Ci'cak to wa'ding bang dijokko lima,
apa wa'dingngi torro llan istana raja.
29Den tallu patuoan to melo tengkana
iarika appa' passalan to mepatakkajanna' ke dipemakitaii umbo nakua lumingka, iamo to:
30singa, iamo olok-olok kaminang mawatang,
na te'da lalo apa nakalaja',
31beke muane na manuk londong to tongnga' bang lumingka,
na raja lumingka situru' surudadunna.
32Ia ke mpumatampoko kabattukanmu,
nnakkattai mpugauk kagajatan,
kanana'iko timummu.
33Sanga ia to dadik ke dipamokkongngi menjaji dangkei,
ia ke dijangguru'i to illong, messunni to rara.
Ia ke dipamalussui to tomabirih, mpaden kasipuran.
Currently Selected:
Kada Bulawan 30: mvpAD
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
