Kada Bulawan 29
29
1Ia to tote'da lalo namadoang mangpesa'ding ke dipakainga'i,
ta'pa la masolang na te'damo nadikulle mpemeloii.
2Ia ke sabuda-budannai tomelo sipa'na mangparenta napumario tobuda,
apa ia ke togaja' mangparenta, sisumarroan to tobuda.
3Ia to tongkabudai macca, mpamario ambe'na,
apa inda-inda sisoba' baine bandarang, mpaboro-borori ewananna.
4Ia ke maruruhhi mangra'tah to tomangparenta,
la mawatang to kaparentanna,
apa ia ke mpeta'dai sima tangsipato'na,
la napumasolang kampongna.
5Ia to tompuji-puji padanna rupa tau,
padai to ntananan poja kalena.
6Ia to togaja' napoja panggaukan gaja'na,
apa ia to tomakassing la mario makkelong na masannang.
7Ia to tomakassing, naissen to sipato'na napuapa tokaasi-asi,
apa ia to togaja' te'da naparinawai.
8Ia to topangcapa' mpasisakka bang tau llan kota,
apa ia to tomacca, mparadan kamagallian.
9Ia ke sikara-karai to tomacca sola tobattuk,
ia joo tobattuk metawa camelle na mangjallo', arannai mpaden kamarongkan.
10Ia to tomaruruh penawanna nakaba'ci topapatean,
apa napasalama' tomelo sipa'na.
11Ia to tobattuk madoi' ta'pa mabirih,
apa ia to tomacca, sabbara' te'da nata'pa magalli.
12Ia ke napesa'dingngi bangngi tomangparenta to kada tangtongan,
nang la gaja' sipa' ngasanni to pangjamana.
13Den napadan tokaasi-asi na tomangpandasa,
pada Puang Allataala mbenni mata napake mengkita.
14Ia to raja maruruh rra'tah kara-karana tokaasi-asi,
la mawatang tarruh to kaparentanna.
15Pangpangngajah na mangpekaju, la mepamacca,
apa ia ke dipupangngelohnai to pea, la mpakasiri' indona.
16Ia ke togaja' sipa'mo ntoe kuasa,
sabuda-budannami to totangnturu' atoran,
apa ia to tomelo sipa'na
la ngkita kamasolanganna togaja'.
17Ajahhii to anakkamu
napamanyamanko,
napamasannangko.
18Ia to bangsa te'da natarima pangpatuju, la maricu bang to tobudanna,
apa masannang to tonturu' atoran.
19Ia to mesa' kaunan te'da naganna' ke diajahhi kada mandari,
napahang apa te'da napugaukki.
20Den una ia dirannuanna to tobattuk,
na ia to tomesa mangkadanna bang.
21Ia to kaunan dipaturu'i bang penawanna mangpamula malolle'na,
la membattuk undinna.
22Ia to tomadoi' bang mabirih mpaden kasisakkan,
na ia to tomadoi' bang magalli mpabuda kasalan.
23Ia to tomatampo nakita soloh tau
apa tompamajiong penawanna la dipuji.
24Ia to tomesa' penawa sola toboko,
battuananna ngkaba'ci kalena.
Ia ke napaui to tonganna jio olo tomangra'tah kara-kara,
nang la disessai,
ia ke kamma' bangngi,
nang la nakannai petangdo-Na Puang Allataala.
25Ia ke tolinora dikalaja', butung naalaki' poja na te'da dikulle la'pah,
apa ia to tomatappa' lako Puang Allataala, la manyaman.
26Buda tau nakabudai massede lako tomangparenta,
apa Puang Allataalara to maruruh mangra'tah.
27Nakaba'ci tomakassing to tomajekkong,
na nakaba'ci togaja' to tomaruruh lalan katuoanna.
Currently Selected:
Kada Bulawan 29: mvpAD
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
