Kada Bulawan 25
25
Ba'tu pira-pirapa pangpangngajahna Raja Sulaiman
1Denpa tee pira-pira pangpangngajahna Raja Sulaiman, to nauki' pole' pira-pira pangjama jio istanana Hizkia, rajana to-Yehuda.
2Napumala'bih Allataala to apa tang-Napangpeissenan,
napumala'bih raja, sanga wa'dingngi mpamanassai to tangnaissenna tau.
3Tangdidete' mpahangngi to llan penawanna raja,
susi tasik mandalan ba'tu susi langi' matande.
4Paccingngii to pera',
namemmassang natampai pande.
5Alai ngasanni to togaja' llan mai istana,
namakassing sola mawatang to kaparentanna raja.
6 #
Lukas 14:8-10
Ia ke mangngoloki' lako raja danggi' bawa matampoi,
danggi' munii ngenan tomapangka'.
7La'bih melo ke nakuanki' tau
“Nteeki' cumadokko,”
na ia ke ta'pa cumadokko bangki',
tadipakasiri' jio olona tomapangka'.
Ia ke te'da mukanassa tonganni to kara-kara,
8danggi' mumadoi' bang male mangparapa' lako tomangra'tah kara-kara.
Iamo dau ke iko-iko sala napakasiri'ko padammu rupa tau,
apamora la mupugauk?
9Ia ke sisala pahangko solamu, sipemeloan bangmo kamu' sola dua,
apa danggi' mupaui to tanglanaissenna tau,
10dikua na danggi' nasangako tau jale'puh,
mupumatunai ratu lako matemu.
11Ia to kada sipato'na unamo dinii mpaui,
susi bulawan dipajiong baki' pera'.
12Ia to pangpakainga'na tomacca butung cincin na rante bulawan,
diben lako tompesa'dingngii.
13Napumasannang tomassua ke dikatappa'i to todisua,
butung wai mpasau wakke ke wattu peparean.
14Ia to tomangjanji la mangparasengngi nate'da napugaukki,
susii saleu' makamban nairi' angin nate'da nauran.
15Ia to kasa'barasan wa'ding mpamatappa' tomakuasa,
na ia to kada malamma mpacokok tobattuk.
16Ia ke nnampa'ko canik, danggi' nabuda bang muiso',
iamo ke gaja barahko, napatikollokko mutilua.
17Danggi' mumareso bang male lako bali bolamu,
iamo dau ke marossomi ngkitako, nakannora ngkaba'ciko.
18Ia to tosa'bi tangtongan lako padanna rupa tau,
susii pepa'tong ba'tu pa'dang, ba'tu pana mataran.
19Ia ke ngkatappa'iki' to tote'da napugauk janjinna ke naratuiki' sussa,
susi isi marapo dipengkeman,
ba'tu susi togento lumingka.
20Ia ke mpukelongki' kelong mario-rio jio olona tomasussa,
butung to dipupangkale-kalei ke wattu macakkeq,
ba'tu padai to kojong dibolloi cukka.
21 #
Roma 12:20 Ia ke tangbarahhi to ewamu, benni kande.
Ia ke mawakkei, benni wai kula'.
22Nasaba' ia ke mupugaukki susi joo, memmasiri'i to ewamu,
Napabalahhii kameloan Puang Allataala joo panggaukanmu.
23La mparatu uran to angin mangngiri' tingngo jaja mai
susi toomi joo la mpaden kamagallian to tompau sala tau.
24La'biranmo to torro jiong bala bola
na ia to sibola mesa' baine passipuran.
25Ia ke ssa'dingki' kareba melo jio mai kampong mambela,
butung to nniso' wai cakke' mpasau wakke.
26Ia to tomakassing ke menturu'i lako togaja',
padai to mata wai malino memmaucca',
ba'tu wai bubun macero mencarepa.
27Te'da namelo to takkaliwa' nniso' canik,
susi toomi te'da namelo to madoang bang napuji tau.
28Ia to tote'da nanta'tan kalena,
susii kota ro'pok bentengna.
Currently Selected:
Kada Bulawan 25: mvpAD
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
