Kada Bulawan 20
20
1Gaja bango' to tau ke mangngiso' anggoro'i ba'tu tuak napumalangoi.
Ia ke malangoi mangcapa'i na tangsirundunan kadanna.
2Ia ke magallii to raja,
butung susii singa mberreng,
na ia to tompamagallii,
ncilakai kalena.
3Padami to tobango' ngkabudai massisakka,
apa dipuji to tompessalai kasisakkan.
4Ia ke te'da namanengko to tomakuttu ke wattunnami,
te'da toda ia assele'na ke wattu pepareanmi.
5Ia to akkatta llan penawanna tau susi bubun gaja dalan,
na ia to toden kamapahanganna, maccai ssiok wainna.
6Buda tau ssanga kalena mamase,
apa gaja sussa diampa' to totatta' mamase.
7Ia ke makassingngi na maruruh penawanna to ambe',
napumaupa' bati'na.
8Ia ke cumadokkoi raja jao kadera pangra'tasan kara-kara,
naparessa simesa'i to tau jio olona,
naissenni umbonna to tosala na totongan.
9Denraka ia tau wa'ding mangkada kumua,
“Mapaccing aku' to penawangku',
na te'da aku' dosaku'?”
10Gaja Nakaba'ci Puang Allataala,
ke silaenanni to dacing ba'tu litere' dipake mangngalli,
na ia to dipake mangbaluk.
11Moi anakkata' panggaukanna dinii nnissenni,
kumua meloraka sola maruruhraka penawanna ba'tu te'daraka.
12Ia to talinga dipake mangpesa'ding,
na mata dipake mengkita,
na Puang Allataala mpadenni.
13Danggi' namamma' manda mupugauk,
dikua nadanggi' mukaasi-asi,
apa la mi'cokko mubassa',
muampa' buda to la mukandena.
14Tuli nakua to tomangngalli,
“Gaja suli' na tangmelo.”
Apa ia ke nabajahmi,
napuborromi ncuritai,
nasaba' maccai mantawah.
15Sininna kada to mpaden kapaissenan,
la'bih keangga' na bulawan sola paramata.
16Inda-inda to mpangngakui la mbajaran indanna tomentoratu llan kampong,
sipato' diala to ewananna napuboro', arannai nabajah to pangngakuanna.
17Manyaman joloki' ngkandei to assele' pangnguraga,
apa undinna gaja mepa'dikki susi to nggaru'tukki batu jiong nande.
18Melo assele'na to akkatta ke disitimbangngii jolo'.
Iamo joo mpeta'dapiki' pangpatuju tamane' male parari.
19Totangditampun timunna to tomale melako bang ncurita tau,
danggi' siama' sola joo tomacapila.
20Inda-inda ntangdoi tomatuanna,
la lanynya' na te'damo dikita,
susi palita la bosi ke tangngai bongi.
21Te'da nadibarakka'i to manah diala jolo,
to te'dapa nawattunna diputawa.
22Danggi' mupabalahhii to tomangpanggaukan gaja' lako kalemu,
sabbaraqko, Puang Allataala la ntulungko.
23Gaja Nakaba'ci Puang Allataala to tompakande dacing.
Te'da namelo ke silaenanni banda'na to batu dacing dipake mangngalli, na ia to dipake mangbaluk.
24 Puang Allataala mpattantui to katuoanna simesa'-mesa' tau,
jaji moi mesa' tau te'da la nnissenni umbo susi to katuoanna.
25Wa'ding menjaji poja lako kita',
ke te'da nadipikkiri' melo tamangtinja' la mangkaroba lako Puang Allataala,
iamo ke menassan undiki'.
26Naissen raja macca indanna to togaja',
na nang la nasessai.
27Arrang jio mai Puang Allataala nnarrangngi penawanna tolino,
to mparessa issi penawa.
28Manyaman to raja ke mamasei na dikatappa'i too.
Ia ke mamasei la da'tanni makuasa mangparenta.
29Kamawatangan mpamataratte' tomalolle',
na uban mpamatona' tomatua.
30Perambi dipake mpatoba'ki',
na pesambak dipake mpemeloi penawa.
Currently Selected:
Kada Bulawan 20: mvpAD
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
