Kada Bulawan 15
15
1Ia to kada tangkebuku mparadan kamagallian,
apa ia to kada mepa'dikan penawa ssarrang kamagallian.
2Ia to tomacca mpau kada kapaissenan,
apa ia to messun jio timu tobattuk mpapajan kabangosanna.
3Nakita Puang Allataala to apa jaji jio sininna ngenan,
Napemataii to tomelo penawanna na togaja' panggaukanna.
4Ia to kada tangkebuku mepamasumanga',
apa ia to kada pangnguraga mepa'dikan penawa.
5Bango' to tocia' napangngajahhi indo ambe'na,
apa macca to tontarima melo pangpakainga'.
6Jio bolana tomakassing buda ewanan,
apa ia to assele'na togaja', mpadenri kamasussan.
7Ia to kada tomacca nnamboh kapaissenan,
apa ia to llan penawanna tobattuk te'da nasusi joo.
8Ia to passambajangna to tomaruruh penawanna, Natarima Puang Allataala
apa Nakaba'ci to passompana togaja'.
9Nakaba'ci Puang Allataala to panggaukanna togaja',
apa Nakamasei to tompangngattai mpugauk pakkaeloran-Na Puang Allataala.
10Ia to tompugauk kagajatan,
la dipangngajahhi makarrah,
na ia to tongkaba'ci pangpakainga',
la mate.
11Naissen ngasan Puang Allataala to jaji jiong lino tomate,
apa pole'raka to llan penawanna tolino.
12Ia to topacapa' cia' dipakainga'
na te'da namadoang siama' tomacca.
13Ia to penawa masannang mpamabarakka' lindo,
apa ia to masse penawa, mpamoro' sumanga'.
14Ia to tomapahang nnangah kapaissenan,
apa ia to tobattuk mparri-parri mpugauk kabangosan.
15Ia to todipakario-rio masussa bang penawanna,
apa ia to tomasannang bang penawanna da'tan mario.
16La'biranmo nnampui ci'di' ewanan,
apa ngkalaja' ngkasiri' Puang Allataala,
na ia to nnampui buda ewanan,
apa tangrapa' to penawa.
17La'biranmo to camme bangra dikande,
apa situru'i pangpakamoja',
na ia to ngkande bang juku' malunda',
apa naturu' kamaba'cian.
18Ia to tomadoi' bang magalli mpaden passipuran,
apa ia to tosabbara' mparadan kasisakkan.
19Ia to katuoanna tomakuttu, butung nnolai tananan keduri,
apa ia to katuoanna tomaruruh penawanna, butung nnola lalan melo te'da sakkalanganna.
20Ia to pea macca mpamasannang penawanna indo ambe'na,
apa ia to pea battuk te'da naangga'i to tomatuanna.
21Ia to kabangosan, iamo nakabudai to tote'da akkalanna,
apa ia to tomacca tatta' mpugauk kameloan.
22Te'da nakeassele' to akkatta ke te'da nadisitimbangngi,
apa keassele' melo ke budai tau mepatuju.
23Pebali melona mpamario mesa' tau,
na la'bih keangga' to kada ke wattunnapi na dipau.
24Ia to tomandalan pangtangngaranna mangnguju de',
namambela jiong mai lino tomate.
25Naro'pokan Puang Allataala to bolana tomatampo,
apa Najagai to tana manahna baine balu.
26Nakaba'ci Puang Allataala to akkatta gaja',
apa ia to kada melo, napumasannang penawan-Na.
27Inda-inda to nnangah saro te'da nadiala maruruh,
nnancuru' tananan dapohna,
apa inda-inda to cia' disogo',
la tuo masannang.
28Ia to tomakassing natimbang melo namane' mangkada,
apa ia to togaja', gaja doi' mpasun kada meba'cian.
29Ia to togaja' te'da Naparinawai Puang Allataala,
apa ia to passambajangna tomakassing Napesa'dingngi.
30Ia to lindo mario mpamasannang penawa,
na kareba melo mangpamasumanga'.
31Ia to tompesa'dingngi pangpakainga' to mbenki' katuoan,
direken tomacca.
32Ia to tocia' dipangngajahhi
tangnnangga' kalena,
apa ia to tontarima melo pangpakainga',
la macca.
33Ngkalaja' ngkasiri' Puang Allataala,
iamo garonto'na pangpangngajah to mepamacca.
na ia ke madoangki' diangga'
mpamajiongki' penawanta'.
Currently Selected:
Kada Bulawan 15: mvpAD
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
