Kada Bulawan 13
13
1Ia to pea macca mangpesa'ding ke napangngajahhii ambe'na,
apa ia to topangcapa' cia' dipakainga'.
2Ia to kadanna tomakassing mpaden kamauparan lako kalena,
apa ia to tomajekkong, nakabudai mpugauk kamasa'garan.
3Ia to tongkanana'i buangan kadanna ngkarewai kalena,
apa ia to tosamangkadanna bang, ncilakai kalena.
4Ia to tomakuttu buda bang to apa nakadoangngi,
apa moi mesa' te'da naampa',
apa ia to tomarajin mengkaja,
naampa' ngasan to apa nakadoangngi.
5Ia to tomakassing ngkaba'ci pangnguraga,
apa ia to togaja', mpakasiri' sola ncalla kalena.
6Ia to tote'da caccana najagai kamakassingan, nadanggi' namangpanggaukan gaja',
apa ia to tomadosa naancuru' sipa' gaja'na.
7Den tau ssanga kalena sugih,
apa te'da apa naampui,
den too to ssanga kalena kaasi-asi,
apa gaja sugih.
8Ia to tosugih, kasugiranna napupela'bak sunga',
apa ia to tokaasi-asi te'da nalampangngandoi tau.
9Ia to tomakassing butung arrang liwa' macora,
apa ia to togaja', butung to palita bosi apinna.
10Ia to tomatampo mpaden bangri kasisakkan,
apa ia to tomacca ntarima pangngajaran.
11Ia to kasugiran marawa bang diampa',
madoi' bang too cappu',
apa ia to ewanan dirempun sici'di'-ci'di',
la sabuda-budanna.
12Ia ke te'dapa nadiampa' to apa dirannuan memassean penawa,
apa ia ke diampa'mi, mpamasannang penawa.
13Ia to totangnnangga' kadan-Na Puang Allataala, ncilakai kalena,
apa ia to tonturu' parenta-Na, la nnampa' saro.
14Ia to pangpangngajahna tomacca,
susi mata wai mbenki' katuoan melo,
arannai salama'ki' jio mai poja kamatean.
15Ia to tomangpikkiri' melo la dipuji,
apa ia to tomajekkong, la masussa katuoanna.
16Ia to tomelo akkalanna, mangpikkiri' jolo' namane' mangpugauk,
apa ia to tobattuk mpapajan kabangosanna.
17Ia to totangdikatappa'i mbawa pepasan mpaden cilaka,
apa ia to todikatappa'i mbawa pepasan mpaden assele' melo.
18Ia to tocia' dipangngajahhi,
la kaasi-asi na dipakasiri',
apa ia to tomangpesa'ding ke dipakainga'i,
la ditaratte'.
19Liwa' dipumasannang ke diampa'i to apa dikadoangngi!
Ia to tobattuk, cia' paja mpugauk kagajatan.
20Ia to tau siama' sola tomacca,
la macca toda,
apa ia to tosisoba' tobattuk,
la macilaka.
21Ia to tomadosa naula'-ula' bang abala',
apa ia to tomakassing tuli nduppa kamasannangan.
22Ia to tomelo penawanna mben manah bati'na,
apa ia to tomadosa, undinna la naputawa tomakassing to kasugiranna.
23Ia to padang lo'bang wa'ding bang nanii tokaasi-asi nnangah kande,
apa nasakkalangngii katangmarurusan mangra'tah arannai lampung joo padang.
24Inda-inda to te'da napekaju anakkana ke salai,
te'da napakamoja'i to anakkana.
apa inda-inda to mpakamoja' anakkana
den wattunna napekajui.
25Ia to tomakassing mangpebarah tarruh,
apa ia to togaja', da'tan bang tangbarah.
Currently Selected:
Kada Bulawan 13: mvpAD
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
