Kada Bulawan 12
12
1Ia to tomasannang dipangngajahhi, ngkamali' kapaissenan,
apa gaja bango' to tocia' dipakainga'.
2Nakabudai Puang Allataala to tomelo penawanna,
apa la Nasessa to tompangngattai kagajatan.
3Ia to tomakassing la mawatang tarruh, susi garonto' kaju mawatang waka'na te'da natiroge,
apa ia to togaja' te'da nalamawatang tarruh.
4Ia to baine macca nnurusu' repokkona,
nataratte' tau to muanena,
apa ia to baine mpakasiri' muanena,
butung saki mpamarapoh bukunna muanena.
5Ia to tomakassing, kamarurusan manda to naakkattai,
apa ia to togaja' mangnguraga manda to napangngattai.
6Ia to kadanna to togaja' dipumate,
apa ia to kadanna tomaruruh penawanna mepasalama'.
7Ia to togaja', la dilanynya'i na te'da lalomo dikita,
apa ia to tomakassing, tatta' mawatang llan katuoanna ratu lako bati'na.
8Samelo-melona pangpikkirisanna to tau, sadipuji-pujinna,
apa tangdiangga' to tau ke majekkongngi.
9La'biranmo ke diangga' tobiasaki',
apa den jamanta',
na ia ke ssangaki' kaleta' toden,
apa moi la dikandena tangsirundunan.
10Ia to tomakassing mparakai melo patuoanna,
apa ia to pangpakamoja'na to togaja', maparrang.
11Ia to pangdusung bassa' tongan mpusara bara'bahna, te'da nakakurangan kande,
apa ia to tote'da akkalanna tangmpake melo wattunna.
12Ia to togaja' ngkadoangngi assele' jio mai padanna togaja',
apa ia to tomakassing mangngassele' melo susi garonto' kaju mabua.
13Ia to togaja', natumang kada gaja' messun jio timunna,
apa ia to tomakassing, la'pah jio mai kamasussan.
14Melo poleanna ke meloi buangan kadanna to tau,
susi toomi to tau pada ntarima saro assele' limanna.
15Gaja bango' to tossanga kalena tongan,
apa ia to tomacca ntarima melo pangpakainga'.
16Gaja bango' to tomadoi' bang mapa'dik penawa,
apa melo akkalanna to tosabbara' ke nacapa'i tau.
17Ia to tomaruruh penawa mpessa'bian katonganan,
apa ia to sa'bi majekkong messa'bi tangtongan.
18Ia to tosamangkadanna bang mepa'dikan penawa,
butung pa'dang mepakojong,
apa ia to kada tomacca,
butung pejampi mepamondo.
19Ia to kada katonganan messun jio timu tatta' diingaran,
apa ia to kada tangtongan cingga'tu'ra natangdiingaran.
20Na nang llanmo penawanna la mangnguraga to tomangngatta mpugauk kagajatan,
apa ia to tompangngattai kasikalinoan, la masannang.
21Ia to tomakassing te'da na la ngkannai abala',
apa ia to togaja' da'tan naratui kamacilakan.
22Nakaba'ci Puang Allataala to tomajekkong,
apa Nakabudai to totatta' mangkada tongan.
23Ia to tomelo akkalanna te'da napumatampo kapaissenanna,
apa ia to tobattuk mpapajan kabangosanna.
24Ia to tomarajin wa'ding mangparenta,
apa ia to tomakuttu la dipupangjama tangdigaji.
25Ia to malaja' jolo mpamoro' sumanga',
apa ia to kada mepamasumanga' mepamasannang.
26Ia to tomakassing, mpatuju melo soba'na,
apa ia to togaja', mpasala lalan kalena.
27Ia to tomakuttu te'da peattana ke malei rumangngan,
apa ia to tomarajin la nnampa' ewanan makeangga'.
28Ia to tonturu' pakkaeloran-Na Puang Allataala, mangnguju lako katuoan,
apa ia to tote'da naturu' pakkaeloran-Na Puang Allataala, mangnguju lako kamatean.
Currently Selected:
Kada Bulawan 12: mvpAD
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
