Galatia 1
1
Sallangna Paulus lako jamaa jio tana Galatia
1:1-5
1-2Ia tee sura' pole jio mai aku', Paulus, sola padanta' tomatappa' to kusolan, kikiring lako jamaa jio tana Galatia. Ia tee aku' mesa' rasulu' tangngia napilei tolino, tangngia too nasua tolino, apa nasuana' Puang Isa Almaseh sola Ambe' Puang Allataala, to mangka mpatuo Puang Isa jio mai kamatean. 3Dennaa upa' nabarakka'i kamu' Ambe'ta' Puang Allataala sola Puang Isa Almaseh, naben kamu' kamasannangan. 4Ia to Puang Isa mangka mpangben kalena dibuno situru' pakkaeloran-Na Ambe'ta' Puang Allataala, dikua anna dampanganki' to tomadosa, danggi'mo tatuo susi togaja' lan lino. 5La mpakala'bih tarruhki' Puang Allataala te'da cappa'na! Amin.
Paulus nggarra' to-Galatia, sanga nturu'i Kareba Kasalamatan tangtongan
1:6-10
6Jangngahna' aku', sanga madoi' bang kamu' mboko'i Puang Allataala to mpileimo kamu' menjaji umma'-Na. Torro sala bang to pangpakamoja'-Na Almaseh, nasaba' male kamu' nturu' kareba kasalamatan laen. 7Na ia to laenna tangngia ia Kareba Kasalamatan, apa denri tau la mpalao sala kamu' na madoang la mbalikki to karebanna Almaseh. 8Moiraka na kami' ba'tu malaeka' jao mai suruga mpangpeissenanni to Kareba Kasalamatan ke sisalai to mangkanna kipangpeissenan lako kamu', ake'mo nakannai tampak ropu. 9Susi to mangkamo kipauan kamu', kudadu' pole' kupau kumua, ia ke denni tau mpangpeissenan Kareba Kasalamatan, na te'da nasusi to mangkannamo mitarima, la ditampakkii ropu.
10Na umbo nakua, pangkabudaian tolinoraka to kuangah? Te'da, apa pangkabudaian-Na Puang Allataala. Ba'tu nnangahra'ka lalan dikua nakabudaina' tolino? Ia ke nnangah unapa' lalan dikua nakabudaina' tolino, manassa tangngiana' taun-Na Almaseh.
Paulus ntarima Kareba Kasalamatan jio mai Puang Isa, tangngia jio mai tolino
1:11-24
11Ee, kamu' to kupusile'to! Kupauan kamu' kumua, ia to Kareba Kasalamatan kupangpeissenan, tangngia curita nagaraga tolino, 12sanga te'da kutarima jioi mai tolino. Na tangngia too tolino nnajahhina', apa kutarima jio mai Puang Isa Almaseh to mpangpekitan kalena lako aku'.
13Misa'dingmo to panggaukanku' tonna tee, tongkumangngagama to-Yahudipa, kumua liwa' kusessa to tomatappa' lako Puang Isa na la kusabu'i,#Jamanna Rasulu' 8:3, 22:4-5, 26:9-11 14angkusamacca-maccanna lan agama Yahudi, kucau' ngasanni to sangbara'ku' jio bangsaku', sanga liwa' kukanana'i to atoran tojoloku'.#Jamanna Rasulu' 22:3
15Apa moi nasusi joo, ia to Puang Allataala mangka mpileina' tongkulan unapa ba'tangna indoku', na Iamo mpakedoi penawangku', sanga kameloan penawan-Na lako aku'. 16Ia tonna puelohmi Puang Allataala, napangpeissenanmi to Anak lako aku' lan pengkita, kumua la kupangpeissenanni lako bangsa tangngia to-Yahudi. Na ia joo wattu te'damo kupeta'da pangngampa'na tolino.#Jamanna Rasulu' 9:3-6, 22:6-10, 26:13-18 17Susinna te'damo kumale lako kota Yerusalem, ssikitanni to tojolomo ia menjaji rasulu' na aku', apa ta'pa malena' lako tana Arab, kumane' male pole' lako kota Damsyik. 18Tallung taun mangkanna joo, kumane' male lako kota Yerusalem mpessitammui Petrus,#1:18 Petrus ia bang una Kefas. kumangbongi jio bolana sangpulo a'pa' bonginna.#Jamanna Rasulu' 9:26-30 19Apa ia to rasulu' laen te'da kusikita, Yakub mandara to sile'to-Na Puang Isa.
20Puang Allataala nnissenni tee kuuki' kumua tongan, na te'da kumangnguraga.
21Mangkai joo too malemo' lako tana Siria sola Kilikia. 22Ia joo wattu, te'da bang naperupana' to jamaa jio tana Yudea. 23Apa ssa'ding bangri kareba kumua, “Ia to tau mpakario-rioki' tonna tee, ia too allo mpangpeissenan omi karebanna Puang Isa, na mangkamo mpengkulle-kullei tonna tee mparuku tau mboko'ii.” 24Mpakala'bihmi Puang Allataala, nasaba' ia to apa jaji lako aku'.
Currently Selected:
Galatia 1: mvpAD
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
