Daniel 7

Pengkitanna Daniel ngkita appa' olok-olok

7:1-8

1Ia tonna taun pamulanna nanii mangparenta to Raja Belsyazar jio Babel, den sangbongi namangtindo Daniel. Ia tonna mamma' ngkitai pengkita to pole jio mai Allataala. Mangkai joo too nauki'mi Daniel to dipakitanni susi tee,

2“Lan pengkitangku' joo bongi kukitai to angin bara' mangngiri' jio mai appa' sulapa' rroge tasik maluah. 3Na den appa' olok-olok gaja tonggo endek jiong mai tasik to silaen-laenan.#Pengkitanna Yahya 13:1, 17:8 4Ia to bungahna endek, susi singa na kepani' susi pani' langkan. Ia tongkukita unapi, ia to pani'na tirebu', natiangka' jio mai litak dipake'dehhi to ajena dua susi tolino, nadiben toopa penawa susi tolino.#Pengkitanna Yahya 13:2 5Den omi olok-olok mangpenduanna susi beruang, ke'dehhi, apa ia manda to aje undinna napupellese, na den tallu buku bamban nakengke. Na den gamara kusa'ding ngkuanni, ‘Ee, kandemoko juku' sabarahmu.’ 6Ngkita omo' olok-olok laen susi cinggallung, na kepani' susi pani' langkan appa' jao boko'na, na appa' ulunna, nadiben kakuasan mangparenta.

7Mangkai joo too, kukita omi lan tindoku', den omo olok-olok mangpennappa', gaja watang naliwa' melajatan. Ia to isinna bassi na gaja tonggo. Nagaru'tukki bang naamma'i to apa nakande, na ia to sesanna nalullu'. Silaenan ia na ia to olok-olok jolona, sangpulo toopa ia tandukkuna.#Pengkitanna Yahya 12:3, 13:1 8Ia tongkukita unapi to tandukkuna, tuo omi mesa' to tanduk biccu' jio paralla'na, na tirebu'i to tallu tanduk jolona anna sipolloran. Na ia joo tanduk mane' tuo kemata susi mata tau na ia to timunna mpau kada matampo.#Pengkitanna Yahya 13:5-6

Pengkitanna Daniel ngkita Puang Allataala to tuo te'da anggena

7:9-14

9Kupematai tarruhhi, naden to ba'tu pira-pira to cadokkoan mala'bih dipasadia. Namane' cumadokko to Puang tuo tarruh te'da anggena la rra'tah kara-kara. Ia to bajunna sola beluakkana mabuccang susi kapah. Na ia to cadokkoanna na rodana dukku-dukku susi api.#Pengkitanna Yahya 1:14, 20:4 10Mellala'i to api jio mai olo-Na Puang, na massa'bu-sa'bu tomparakai-I, na mangjuta-juta to tau ke'deh jio olo-Na. Cumadokkomi to tomangra'tah kara-kara, nadibukka' to sura'.#Pengkitanna Yahya 5:11, 20:12

11Kukita tarruhhi, sanga ia joo tanduk biccu' matampo bang unapi mangkada, namane' dipatei to olok-olok mangpennappa', na ia to kalena dipembuangan tama api naarannai ma'bong. 12Te'damo naeloranni Puang to olok-olok laen mangparenta, apa naeloran unapa tuo ratu lako wattu to pura dipattantuanni.

13Kukita tarruh lan tindoku' joo bongi, na den kukita susi Anak Mentolino ratu jao mai langi' nabombonni saleu', nadisolan male mangngolo lako Puang to tuo te'da anggena.#Matius 24:30, 26:64; Markus 13:26, 14:62; Lukas 21:27; Pengkitanna Yahya 1:7, 13, 14:14 14Namane' dibarakka'i kakuasan sola kamala'biran menjaji raja joo Anak Mentolino, arannai ratu to tau jio mai sininna bangsa, rapu tau na basa ssompai. Ia to kakuasanna tatta' te'da anggena, na ia to kaparentanna te'da nalata'de.#Pengkitanna Yahya 11:15

Pengkitanna Daniel dibattuananni

7:15-28

15Ia tee aku' Daniel malaja'na' na tangrapa' penawangku' ngkitai joo pengkita. 16Jaji malena' mpendete'i to mesa' tau ke'deh jio, angkukutanaii kumua apa battuananna joo kukita anna pauanna' battuananna, nakua, 17‘Ia to appa' olok-olok matonggo, iamo to appa' kaparentan la ollong lan lino. 18Apa Allataala Tomala'bih mbenni kuasa to umma'-Na mangparenta, na ia joo kaparentanna la tarruh te'da anggena.’#Pengkitanna Yahya 22:5

19Madoangna' nnissenni apa battuananna joo olok-olok mangpennappa', to te'da nasusi olok-olok laenna, to liwa' melajatan. Ia to isinna bassi, na ia to kanukunna tambaga, nagaru'tukki bang naamma'i to apa nakande, nalullu' bangngi to sesanna. 20Madoang toona' nnissenni battuananna to sangpulo tanduk jao ulunna sola to tanduk biccu' mane' ollong arannai tirebu'i to tanduk denmo jolona napollo. Ia to tanduk biccu' den matanna na ia to timunna mpau kada matampo. La'bih mejangngaran ia na ia to tanduk laenna. 21Na kukitai joo tanduk biccu' mangrari nnewa umma'-Na Allataala na ci'di'mora nataloi.#Pengkitanna Yahya 13:7 22Apa ratumi Puang to tuo te'da anggena Napattantui kumua te'da ia na sala to umma'-Na Allataala Tomala'bih. Jaji nadete'mi wattunna la mangparenta to umma'-Na Allataala.#Pengkitanna Yahya 20:4

23Iamo tee battuananna pengkitangku' to napauanna' joo tau, ‘Ia to olok-olok mangpennappa' iamo kaparentan mangpennappa' to la ollong lan lino, to te'da nasusi to tallu kaparentan jolona. Ia joo kaparentan la nnancuru' lino naamma'i nalullu' tooi to sesanna. 24Ia to sangpulo tanduk, iamo sangpulo raja to la mangparenta lan joo kaparentan. Ia ke mangkami, la mangparenta omi to mesa' raja silaenan na ia to raja jolona, na la nataloi to tallu raja.#Pengkitanna Yahya 17:12 25La mpaui kada to nnewa Allataala Tomala'bih, nasessa tooi to umma'-Na. La mpengkulle-kullei ssullei atoran sola wattu pangmaroasan to mangka Napattantu Allataala, naparentai to umma'-Na Allataala tallung taun sitangnga.#Pengkitanna Yahya 12:14, 13:5-6 26Cumadokkomi to tomangra'tah kara-kara, napasoro'i mangparenta joo raja, naancuru'i arannai lanynya'. 27Na ia to kamangparentan, kakuasan sola kamala'biranna kaparentan lan sininna lino la dipangbengan lako umma'-Na Allataala Tomala'bih. Ia to kaparentanna la tarruh te'da anggena, na sininna tomakuasa la tatta' mpangjamanni na mangpesa'ding.’#Pengkitanna Yahya 20:4, 22:5

28Susimi joo to kukita lan tindoku'. Na ia tee aku' Daniel, gaja sussana' mpikkiri'i sininna joo arannai tibaliang lindoku', apa moi mesa' tolino te'da kupauan.”

Currently Selected:

Daniel 7: mvpAD

Highlight

Compare

Copy