Daniel 6
6
Lo'ko' singa
6:1-29
1Ia tonna mangkamo dipatei Raja Belsyazar, mangpamulami mangparenta Darius to-Media. Annanmi pulona dua taunna umuru'na joo wattu. 2Naangka'i saratuh duangpulo to gubernur to la mparenta propinsi lan karajaan. 3Nnangka' tooi tau tallu menjaji ponggawana to gubernur, na Daniel sala mesa'na. Ia joo tallu ponggawa la mpuissen jamanna gubernur danggi' narugi joo raja. 4La'bih makassing ia to assele' jamanna Daniel na ia to ponggawa laen iarika to gubernur, sanga la'bih melo penawanna, iamo namadoang raja nnangka'i la ngkuasai ngasan karajaanna.
5Apa ia to gubernur sola ponggawa laenna naanggai' bang nnangah kasalan to napugauk Daniel lan jamanna, apa te'da naampa'i, sanga gaja maruruh to Daniel nawa'ding dikatappa'i. 6Nasipangkadaimi sola ngasan kumua, “Ia mandara la tanii nnampa' kasalanna Daniel ke siumpu'na agamanna.”
7Ta'pa male ngasanmi mangngolo lako raja, nakua, “Ie' puang, malambeh sunga'ki' tarruh-tarruh te'da anggena. 8Kami' to tomangjamata', la ponggawa, wakkele' raja, gubernur, iarika tomangpakainga'ta', mesa' kadamokan kikua kenna tapasun sura' parenta to la naturu' ngasan tau. La tapangparentan kumua moi mesa' tau te'da nawa'ding lan tallung pulo allona massambajang lako dewata ba'tu lako tau saliwanna lako manda kita' puang, na ia to tau te'da namangpesa'ding la dica'bean tama lo'ko' singa. 9Ia joo sura' parenta diuki', la tateken dikua naassah menjaji atoranna to-Media sola Persia to te'damo nawa'ding disullei.” 10Arannai dipasun tongan to sura' parenta natekenni Raja Darius.
11Ia tonna issenmi Daniel kumua dipasun tonganmi joo sura' parenta, ta'pa polemi lako bolana, naendek de' loteng to tuli nanii massambajang, nasuju' massambajang ssompa Allataala susi to biasa napugauk sipentallun sangngallo, na den to pentiroanna joo loteng titimbak tingngo lako kota Yerusalem. 12Ta'pa male ngasanni to tongkaba'ci Daniel namentama, nakitai to Daniel massambajang meta'da tulung lako Allataala to nasompa.
13Mangkai joo too malemi to tongkaba'ci Daniel mangngolo lako raja mpangpeasanni nakua, “Oo puang, tangmangkamoraka tateken to sura' parenta nnanggai tau massambajang tallung pulo allona masainna lako dewata ba'tu lako tau saliwanna lako manda kita'? Na ia to totangmpesa'dingngi joo atoran, la dica'bean tama lo'ko' singa.” Namebali raja nakua, “Tongan joo. Mangkamo kuteken joo sura' parenta menjaji atoranna to-Media sola to-Persia to te'damo nawa'ding disullei.” 14Mebali pole' omi to tau nakua, “Ia to Daniel sala mesa'na to todipali' jio mai tana Yehuda, cia' mpesa'dingngiki' na te'da naturu'i to parentata', kannori massambajang lako Allataala sipentallun sangngallo.” 15Ia tonna sa'dingngi raja joo, gaja liwa'i masse penawanna, naangah akkalan umbo nakua mpasalama'i to Daniel, na napikkiri' tarruh ratu lako karuen.
16Male pole' omi to tau mangngolo lako raja, nakua, “Oo puang, taingaranni kumua situru' atoranna to-Media sola to-Persia, ia to parenta napasun raja te'da nawa'ding disullei.” 17Arannai napangparentan raja nadijokko to Daniel, nadica'bean tama lo'ko' singa. Mangkadai raja lako Daniel nakua, “Dennaa upa' na ia to Allataala to te'da napaja musompa la mpasalama'ko.” 18Namane' ditutu' batu tonggo joo lo'ko' singa, nadica' mpake cincin kakuasanna raja sola cincin ponggawa tomajao pangka'na dikua na moi mesa' tau te'da wa'ding la lla'paranni to Daniel. 19Mangkai joo too polemi raja lako istana. Cia'i kumande na cia' tooi dipakatana na ia joo bongi cia' mamma' matanna.
20Masawanna makale' tonna marimu-rimu unapa mi'cokmi raja, nata'pa male lako lo'ko' singa. 21Ia tonna mandoppi'mo lako lo'ko' singa massemi penawanna ntambai Daniel nakua, “Daniel, taun-Na Allataala to tuo, Napasalama' unarokoka Allataala, to te'da napaja musompa, na te'da nakandeko singa?” 22Mebalii Daniel lako raja nakua, “Ie' puang, dennaa upa' tamalambeh sunga' tarruh-tarruh te'da cappa'na. 23Ia to Allataala kusompa ssua malaeka'-Na ngkamummunni to anga'na to singa. Iamo joo na te'da naapana', nasaba' te'da aku' kukasalan jio olo-Na Allataala, moi lako kaleta' te'da too kupugauk kagajatan.” 24Gaja liwa' mario raja, napangparentanni nadipasun to Daniel lan mai lo'ko' singa. Ia tonna dipasunmo te'da lalo ia kojong jio kalena, sanga kamatapparanna lako Allataala to nasompa. 25Napangparentanni raja nadijokko to tau mangka mpangpeasan Daniel, moi anakkana sola bainena nadica'bean ngasan tama lo'ko' singa. Te'dapa narapa' do' litak lan lo'ko' singa to tau, natoangmi singa, napasigaropoanni to bukunna.
26Mangkai joo too, massuai Raja Darius nadikiring to sura' lako sininna bangsa, rapu tau na basa lan lili'na lino. “Salama' lako kamu' sola ngasan! 27Kupangparentan lako sininna tau to torro lan kaparentanku' anna taratte'i to Allataala to tuo te'da anggena to nasompa Daniel. Ia to karajaan-Na te'da na la lanynya' na ia to kamangparentan-Na te'da anggena. 28Iamo Tomangpasalama' ntulungki' to mpajaji tanda mejangngaran lan lino sola jao langi'. Ia toomo to mangka lla'paran Daniel jio mai singa.”
29Iamo joo natatta' bang unapa majao pangka'na Daniel lan kaparentanna Raja Darius sola Raja Koresh to-Persia.
Currently Selected:
Daniel 6: mvpAD
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
