Daniel 10
10
Pengkitanna Daniel tonna jio randan Sa'dan Tigris
10:1–11:1
1Ia tonna taun mangpentallunnamo kaparentanna Koresh rajana to-Persia, ratumi pepasan-Na Puang Allataala lako Daniel to disanga too Beltsazar. Tongan joo pepasan mpaui kumua la den kasirarian la'da'. Naparinawa tonganni Daniel joo pepasan, napemanassaii to pengkita ratu lako kalena.
2Nakua Daniel mangkada, “Ia joo wattu, duangpulo mesa allona kunii masussa susi to nnoloi tomate mpikkiri'i joo pepasan. 3Ia to kande melo te'da kukandei, moi juku' sola anggoro' te'da too mentama anga'ku', te'da toomo kujio'i ulungku' arannai liwa' joo wattu duangpulo mesa allona kunii masussa.
4Ia tonna allo mangpenduangpulomo appa' bulan mesa' jiona' randan sa'dan maluah to disanga Sa'dan Tigris. 5Mentingngarana' kukita mesa' tau mangpakean kaen lenan na mangsaripi bulawan massang jio mai Ufas.#Pengkitanna Yahya 1:13-15, 2:18, 19:12 6Ia to batang kalena susi paramata tarsis na susi palepa' cumbia' to lindona. Ia to matanna susi sulo dukku-dukku. Ia to limanna sola ajena cumbia' susi tambaga mangka disa'po, na ia to gamaranna disa'ding susi gamaranna ke budai tau. 7Aku' mandara ngkitai joo malaeka' mangrupa tau, ia to tau kusolan te'da nakitai, iamo na gaja simalajatan, namale membuni. 8Jaji aku' mandamora torro jio ntuu joo ngenan.
Ia tongkukitai joo pengkita la'da', malamma kaleku' natibaliang lindoku', te'da lalomo kapakulleanku'. 9Ia tongkusa'dingmi gamaranna ta'pa limpuna' kusongka tipalumbang do' litak. 10Apa den lima ntoena' kupasa'ding, kumangtedong mi'cok. 11Mangkadami joo malaeka' mangrupa tau lako aku' nakua, ‘Ee Daniel, Napakamoja'ko Puang Allataala. Ke'dehmoko mupesa'dingngi tee pepasanku', sanga Nasuana' Puang Allataala ratu lako iko.’ Ia tongkusa'dingmi joo kadanna malaeka', ke'dehna' nambe'beh to ajeku'.
12Namangkada pole' joo malaeka' mangrupa tau lako aku', nakua, ‘Daniel, danggi' mumalaja', nasaba' Nasa'dingmo Puang Allataala to passambajangmu tommumane' nnakkattaii la nnissenni joo pepasan-Na ammumpamajiong kalemu lako Allataala to musompa. Iamo kuratu, nasaba' passambajangmu. 13Apa mane' ratura' tee too, nasaba' duangpulo mesa allona nnewa mesa' malaeka' gaja' to ngkuasai Persia. Mangkai joo too, ratui Mikhael sala mesa'na kapala malaeka' ntulungna', nasaba' dipamesa-mesana' ntuu joo sola rajana to-Persia.#Pengkitanna Yahya 12:7 14Kumane' ratu ssikitanko mpapahangngiko to apa la jaji lako bangsamu keanu', nasaba' ia tee pengkita la jaji tee wattu la dioloi lako.’
15Ia tonna mangkada unapa joo malaeka' mangrupa tau, cukkuna' te'da kuissenni mangkada. 16Namane' ssapu timungku'. Kupangkadaii kukua, ‘Ie' puang, ia tee pengkita mpupemmalammana' na te'da lalomo kapakulleanku'. 17Susina' to mesa' kaunan ke'deh jio olona puangna. Te'da kusipato' la mangkada lako kita' puang! Te'da lalomo kapakulleanku' na tangkuissen menawa.’ 18Nasapu pole'na' nakerangngan to kamawatanganku'. 19Mangkadai nakua, ‘Ee Daniel, danggi' mumalaja', Napakamoja'ko Puang Allataala. Danggi' mupussak! Mawatang tonganko!’ Mangkada unapi susi joo kusa'dingngi to kaleku' mawatang pole'. Mangkadamo' kukua, ‘Mangkadamiki' puang, nasaba' kerangnganmi to kamawatanganku'.’
20-21Nakua mpebalina' joo malaeka' mangrupa tau, ‘Muissenraka saba'na kuratu ssikitanko? Ratuna' mpauanko apa to diuki' lan Sura' Katonganan. Cingga'tu'mora kumale pole' sirari malaeka' gaja' to ngkuasai Persia. Mangkai joo too ratu todai to malaeka' ngkuasai Yunani.
Moi mesa' te'da to ntulungna' nnewai saliwanna malaeka' Mikhael, to ngkuasai Israel bangsamu.
Currently Selected:
Daniel 10: mvpAD
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
