Amos 7
7
Bungah pengkitanna Nabi Amos: Buda batik
7:1-3
1Napakitanna' mesa' pengkita PUANG Allataala, kukita-I mpaden batik gaja la'da', tonna mangkamo to tau ssaetan reu nyarangna raja, namentaruk pole' to garonto'na. 2Ia tonna la cappu'mo to tananan jio padang nakande batik, meta'damo' lako Puang Allataala kukua, “Oo PUANG Allataala, addampanganni to umma'-Ta' to malamma dikka', na tangnakulle mperasai pangsessa!” 3Ia joo peta'danna Amos Napesa'dingngi PUANG Allataala, Namangkada Nakua, “Ia joo mukita te'da una nalajaji.”
Pengkita mangpenduan jiona api
7:4-6
4Napakitan omo' mesa' pengkita PUANG Allataala. Kukita-I la ssessa umma'-Na mpake api. Ia joo api la llepa'i tasik maluah jiongna liu lino arannai makase, na mangngulala' lako bara'bah namampuh.#7:4 Ia to tojolo tonna anu' jio Israel nasangai kumua den unapa tasik maluah jiongna lino nanii messun wai kalimbuah. 5Meta'dana' lako Puang Allataala kukua, “Oo PUANG Allataala, danggi' Tapajajii joo pangsessa sanga malamma to umma'-Ta', tangnakulle mperasai joo pangsessa!” 6Ia joo peta'danna Amos Napesa'dingngi PUANG Allataala, Namangkada Nakua, “Ia joo mukita, te'da una nalajaji.”
Pengkita mangpentallun jiona bannang pangtimbang
7:7-9
7Napakitan pole' omo' mesa' pengkita Puang Allataala. Kukitai to Puang Allataala ke'deh jio sa'de tembo' ntoe bannang pangtimbang. 8Nakutanaina' Nakua, “Ee Amos, apara to mukita?” Kupebali-I kukua, “Bannang pangtimbang.” Mangkada-Mi Puang Allataala Nakua, “Susimi joo la Kunii timbang umma'-Ku', napajan to katangmarurusan penawanna. Cappu'mi kasabbarasan-Ku' nang la Kusessami.” 9Ia to sininna ngenan to nanii massompa bati'na Ishak la diancuru', na ia to bola passambajangna to-Israel, la diro'pokan ngasan. Na ia to bati'na Raja Yerobeam, la Kuewai mpake pa'dang.
Kasisakkanna Nabi Amos na Imang Amazia
7:10-17
10Den kapala imang jio kota Betel disanga Amazia, ngkiring pepasan lako Yerobeam, rajana to-Israel, susi tee, “Ia to Amos la mangngattai mesa' penawa sola tobuda la nnewaki', la nnancuru' kaparentanta'. 11Nakua, ‘Ia to Raja Yerobeam la mate dipa'dangngi, na ia to to-Israel nang la malei dipali' mambela jio mai tanana.’ ”
12Nakua Imang Amazia lako Nabi Amos, “Ee nabi, pole lakomoko tana Yehuda kampongmu, najiopa munii mpau pepasan-Na Puang Allataala. Na tau jio toopa mbenko to apa la mukande. 13Danggi'mo mumpau pepasan-Na Puang Allataala inde' kota Betel, nasaba' inde' kota Betel, den bola passambajangan mala'bih nanii raja massompa sola tobuda.” 14Apa mebalii Nabi Amos nakua, “Ia tee aku', tangngiana' nabi, te'da too kumentama kasirempunan nabi. Ia to jamangku' mangrewa bembala' sola todipagajina' mebua ara. 15Apa Nasuana' PUANG Allataala mpajaii joo jamangku' mangrewa bembala', Nasuana' male mpau pepasan-Na lako umma'-Na, to-Israel. 16Nasaba' tangmueloranna' mpau pangsessa-Na Puang Allataala lako to-Israel, jaji inde' to pepasan-Na PUANG Allataala lako iko: 17Nakua PUANG Allataala, ‘Ia to bainemu, la menjaji baine bandarang lan kota, na ia to anakkamu la mate dipa'dangngi. Na ia to tana muampui la nasitawa-tawai tau. La mate jioko kampongna tau. Na ia to to-Israel, nang la malei dipali' mambela.’ ”
Currently Selected:
Amos 7: mvpAD
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
