Amos 6
6
Ia to to-Israel ssattuan kasugiranna, la Nasessa Puang Allataala
6:1-14
1Macilaka kamu' to manyaman katuoanna lan kota Sion sola tomasannang jio tana Samaria. Macilaka kamu' to dikita ambe' to dipeta'da tulungngi lan tana Israel. 2Male kamu' llingkaii mikitai to kota Kalne, mitarruh lako kota matonggo Hamat, mipatarruhhi lako kota Gat jio tana to-Filistin. Mipasikitai kumua la'bih meloraka to katuoanna to tau jio kotana, na ia to katuoanmi kamu' to-Yehuda sola to-Israel? Ba'tu la'bih maluahraka to tanana tolaen na tanami? 3Ee kamu' to macapa', misangari kumua ia to wattu pangsessa la masainpa, apa panggaukanmi napusaba' namadoi' ratu to pangsessa lako kalemi.
4Macilaka kamu' saba' mamma'-mamma' bang kamu' jao katindoan liwa' ballo mimukkun too ngkande juku' anak bembala' sola juku' anak sapin. 5Mikabudai ngkabua' kelong susi to napugauk Raja Daud, apa ia to mipukelong mpake cu'bekan, kelong tangkebattuan. 6Miponnoi anggoro' to busu mimangngiso' samosomi, mipuminynyak minynyak kaminang melo, apa te'da mipumasussai to kamasolanganna to-Israel. 7Iamo joo, manassa kumua kamu'mo la jolo dipali'. Jaji ia to kamasannanganmi anggemi.
8Massapah-Hi PUANG Allataala to makuasa mpau kale-Na Nakua, “Liwa' Kukaba'ci to kamatampoanna to-Israel. Na te'da Kupumasannangngi to istana ballona. La Kueloran to ewana ngkuasai kota lompona sola sininna to lan kota.”
9Ia ke den unapi tau sangpulo membuni lan bola, nang la mate too. 10Ia ke ratui to mesa' rapunna to tomate, to biasa ngkasarai batang rabuk, nnalai joo tomate, na kutanaii to tau jio boko' bola nakua, “Denparaka totuo iti'?” Namebali joo tau nakua, “Te'damo.” Nakua omo joo rapunna tomate, “Kamma'ki', iamo ke mangkadaki' tapaui to sangan-Na PUANG Allataala.”
11Na sitonganna Napangparentanmo PUANG Allataala, na ia to bola la matonggona na la biccu'na la diro'pokan ngasan namenjaji burauk. 12Te'da nakullei to nyarang kinjara' jao buntu batu, te'da too tau ngkullei ntengko tasik mpake sapin. Susi toomi joo ke mpasibalikan kamu' kamarurusan sola katonganan menjaji tangtongan, wa'ding napumate tau.
13Ee kamu' to gaja matampo mangkada, nasaba' mangkamo kamu' ntalo kota Lodebar. #6:13 kota Lodebar Ia tee sanga kota disa'ding susi kada basa Ibrani battuananna te'da apa-apanna. Mikua toopa kumua, kamawatanganmi miwa'ding ntaloi to kota Karnaim.#6:13 kota Karnaim Ia tee sanga kota biccu' battuananna ‘tanduk’ to mesa' tanda kamawatangan.
14Apa mangkada-I PUANG Allataala to makuasa Nakua, “Ee to-Israel, la ssuana' surudadu jio mai bangsa laen la rrarii kamu', mangpamula jio mai lalan mangnguju lako Hamat, ratu sau' sa'dan jio Araba.”
Currently Selected:
Amos 6: mvpAD
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
