Amos 2
2
Pangsessa lako to-Moab
2:1-3
1Mangkada-I PUANG Allataala Nakua, “Ia to to-Moab pembuda bangmo mpugauk kagajatan, iamo joo nang la Kusessai. Te'da lalo naangga'i to rajana to-Edom, nasaba' nakalii to lamunanna, naalai to bukunna natunui arannai mengkapuh. 2Iamo joo Kulassumpunni to kota jio Moab arannai cappu' to bentengna kota Keriot. La matei to to-Moab ke maronta'i to tau namukkun sipetamba-tamban to tau na nnoni to tarompe'. 3Ia to raja sola sininna tomapangka'na to-Moab, la Kupatei ngasan.” Susimi joo kadan-Na PUANG Allataala.#Yesaya 15:1–16:14, 25:10-12; Yeremia 48:1-47; Yehezkiel 25:8-11; Zefanya 2:8-11
Pangsessa lako to-Yehuda
2:4-5
4Mangkada-I PUANG Allataala Nakua, “Ia to to-Yehuda pembuda bangmo mpugauk kagajatan, iamo joo nang la Kusessai. Nasaba' te'da lalo naangga'i to atoran-Ku' na cia' too mpugaukki to parenta-Ku'. Mangkai napalao sala dewata te'da bua'na to nasompa tojolona. 5Iamo joo Kulassumpunni to kota jio Yehuda arannai cappu' to benteng jio kota Yerusalem.”
Pangsessa lako to-Israel
2:6-16
6Mangkada-I PUANG Allataala Nakua, “Ia to to-Israel pembuda bangmo mpugauk kagajatan, iamo joo nang la Kusessai. Nasaba' nabalukki to tokaasi-asi to maruruh penawanna, sanga tangnakullei mbajah indanna, moi na siangga'ra pealli ce'la. 7Napakario-rioi to tokaasi-asi na te'da too naangga'i lan kampongna. Ia to ambe' sola anakkana muane manggauk sala lako mesa' anaqdara. Ia joo panggaukanna ncarepai sangang-Ku'. 8Namamma' lan bola passambajangan mpennampah pakean to napangpetannian tokaasi-asi, na lan bola to nanii ssompa Allataala nanii mangiso'-iso' anggoro' to narampa jio mai tonapaindanni.
9-10Ee kamu' umma'-Ku', Aku'mo to ssolan kamu' messun lan mai tana Mesir, milingkai padang pallawangan patangpulo taunna. Kamu'mo Kupatujui Kulanynya'ii to to-Amori to liwa' tande na mawatang susi kaju cendana, ammiwa'ding ntorroii joo kampongna.#Ulangan 3:8-11 11Aku' toomo to mpilei lan mai tangnga-tangngana anakkami to menjaji nabi la mpangpeissenan kadang-Ku' na den toopa to ba'tu pira-pira tomalolle' menjaji to-nazir#2:11 to-nazir Battuananna: tompangben kalena lako Puang Allataala, namassapah tangmpugaukki to ba'tu pira-pira pemali susinna, te'da nawa'ding male lako pangtomatean, tangnniso' anggoro', te'da namangcakkuru'. Bilangan 6:1-8.. Ee kamu' to-Israel, tangsusiraka joo?” Susimi joo kadan-Na PUANG Allataala.#Bilangan 6:1-8
12Mangkada-I Puang Allataala Nakua, “Miparukui to to-nazir nniso' anggoro', nate'damo napugaukki to passapahna. Tangmieloran too to nabi mpangpeissenan kadang-Ku'. 13Na ia tee too la Kusessa kamu', ammitangkullei mperasai to parri'mi susi nyarang matteke' liwa' mabanda'. 14Ia to tomalassi kinjara' te'da nakullei mpalaian kalena, tomawatang te'damo kamawatanganna, na tobarani te'da nakullei mpasalama' kalena. Te'da ngasanmo nakullei mpessalai pangsessa-Ku'. 15Susi unai to tontoe doke ke mangrarii te'da nakullei mangpatanan, na ia to tomalassi iarika to surudadu mangnyarang te'da too nakullei mpella'paran kalena jio mai pangsessa-Ku'. 16Ia joo wattu moi to pangbarani ssalaimo balili'na namale too mpalaian kalena, apa tatta' mperasai pangsessa.” Susimi joo kadan-Na PUANG Allataala.
Currently Selected:
Amos 2: mvpAD
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
