1 Korintus 1

Passallang

1:1-3

1-2Ee, tomala'bihku' sola ngasan, tomatappa' lako Puang Allataala jio kota Korintus,#Jamanna Rasulu' 18:1 to napilei Puang Allataala menjaji umma'-Na, to napatorro leko' Puang Isa Almaseh jio mai to totangnturu' Puang, sola sininna to tossompa Puangta' Puang Isa Almaseh umbo-umbo nanii! Iamo Puangta' sola ngasan. Aku' Paulus sola padanta' tomatappa' Sostenes ngkiringan kamu' tee sura'. Napileina' Puang Allataala situru' pakkaeloran-Na menjaji rasulu'-Na Puang Isa Almaseh. 3Dennaa upa' nabarakka'i kamu' Ambe'ta' Puang Allataala sola Puang Isa Almaseh naben kamu' kamasannangan.

Nabarakka'i kamu' Puang Allataala nasaba' Almaseh

1:4-9

4Tuli mangkurru sumanga'na' lako Puangku' Puang Allataala, sanga nabenmo kamu' barakka'-Na nasaba' Puang Isa Almaseh. 5Iamo joo miampui buda apa. Susinna mipahang to apa masussa dipahang, na macca kamu' mpangpangngajaranni lako tau. 6Iamo mpamanassai kumua ia to pangngajaran jio mai Almaseh mikatappa'i tonganmo, 7anna te'da barakka' tangmiampui jio mai Puang Allataala, ammida'tan ntajanni to karatuan-Na pole' Puangta' Puang Isa Almaseh. 8Puangta' Puang Isa Almaseh Ia la mpamawatang kamu' mida'tan matappa' ratu lako cappa'na anna moi ci'di' te'da kasalanmi, ke ratu pole'mi. 9Ia to Puang Allataala sipato' dikatappa'i. Iamo mpilei kamu' ammimesa' penawa sola Anak Allataala, Puangta' Puang Isa Almaseh.

Kasipekkanna tomatappa' jio kota Korintus

1:10-17

10Ee, tomala'bihku' sola ngasan! Kuasan-Na Puangta' Puang Isa Almaseh kumeta'da kumua mimesa' pangtangngaran. Danggi' misipekka, apa la memmesa' penawara kamu'. 11Ee, tomala'bihku'! Napauanna' rapunna Kloe kumua sipekka-pekka kamu'. 12Susi tee to kusanga, pada mipau kumua, “Nturu'na' Paulus,” “Nturu'na' Apolos,” “Nturu'na' Petrus,” ba'tu “Nturu'na' Almaseh.”#Jamanna Rasulu' 18:24 13Te'da namentama akkalan ke titawa-tawai to umma'-Na Almaseh. Tangngia Paulus dipampang jao kaju sitamben ammididampangan. Te'da too midijio' mpake sanganna Paulus. 14Mangkurru sumanga'na', nasaba' te'da tau kujio' iti', sangadinna Krispus manda sola Gayus.#Jamanna Rasulu' 18:8, 19:29; Roma 16:23 15Jaji, te'da milamangkada kumua, “Dijio'na' mpake sanganna Paulus.” 16Oo, aku' too pale' njio'i Stefanus sola rapunna. Ia to kuingaranna te'damo tolaen kujio'.#1Korintus 16:15 17Nasuara' Almaseh male mpangpeissenan Kareba Kasalamatan, te'da nasuana' male njio' tau. Tangngia kamaccanku' ba'tu kapaissenanku' kupake mpangpeissenan Kareba Kasalamatan. Sanga ia ke susii joo, te'da naissenni tau to kuasa kamatean-Na Almaseh jao kaju sitamben.

Almaseh mpamanassa kuasan-Na sola kamaccan-Na Puang Allataala

1:18-25

18Ia to tolannampa' kamaparrisan keanu' nasangari curita tangtongan to kareba kumua matemi Puang Isa jao kaju sitamben la mpasalama' tolino. Apa ia to kita' to dipasalama'mo taissen kumua, ia joo kareba iamo carana Puang Allataala mpapajan kuasan-Na. 19Nakua Puang Allataala lan Sura' Allataala kumua,

“Ia to kapaissenanna tomacca la kupasiputtakki

na ia to pahangna to buda paissenna la kulanynya'i.”#Yesaya 29:14

20Ia ke susii joo, te'damo bua'na to tomacca, guru agama sola to buda paissenna lan tee lino. Napangpekitanmo Puang Allataala kumua ia to kapaissenanna tolino te'da lalo angga'na.#Ayub 12:17; Yesaya 19:12, 33:18, 44:25

21Sanga moi samatumbanna macca to tolino, te'da nakullei nnissen Puang Allataala mpake kamacanna. Apa macca to Puang Allataala. Iamo joo naeloranni dipangpeissenan to Kareba Kasalamatan, to nasanga tolino curita tangtongan, anna pasalama'i to tongkatappa'ii. 22Meta'dai to to-Yahudi tanda mejangngaran menjaji butti, na ia to to-Yunani gaja mpattuanni kapaissenan linona. 23Ia to kita' mpangpeissenan mandaki' Almaseh to mate dipampang jao kaju sitamben. Cia' lalo to to-Yahudi ntarimai joo kareba na ia to bangsa tangngia to-Yahudi nasangari curita tangtongan. 24Apa ia to tonapileimo Puang Allataala, la to-Yahudi, ba'tu bangsa tangngia to-Yahudi, napahang kumua, iamo carana Puang Allataala mpapajan kuasan-Na sola kapaissenan-Na. 25Ia to nasanga tolino tangpakulle-Na Puang Allataala, la'bihpa ia pakulle-Na na ia to pakullena tolino. Na ia to nasanga tolino tangpaissen-Na Puang Allataala, la'bihpa ia paissenna na ia to kapaissenanna tolino.

Kuasan-Na Puang Allataala na katangpakulleanna tolino

1:26-31

26Ee, tomala'bihku' sola ngasan! Ingaranni torroanmi tonna pilei kamu' Puang Allataala. Nasanga tolino ci'di'ra kamu' to tomacca, topakulle ba'tu todikasiri'. 27Napilei Puang Allataala to nasanga tolino tangpaissen anna masiri' to tossanga kalena macca. Napilei too Puang Allataala to nasanga tolino tangpakulle anna masiri' to tossanga kalena topakulle. 28Napilei Puang Allataala to nasanga tolino tomajiong torroanna ba'tu tote'da bua'na iarika totangdikasiri', anna lanynyasan ngasanni Puang Allataala to nasanga tolino parallu. 29Iamo napugaukki susi joo dikua anna moi mesa' tau te'da wa'ding mpikkiri'i kumua, “Napileina' Puang nasaba' kamaccanku'.” 30Menjajimo kamu' umma'-Na Puang Isa Almaseh, nasaba' Puang Allataalara. Iamo ssua Puang Isa la mpasalama' kamu', napupenjaji kamu' tomacca, tomelo, napatorro leko' kamu' jio mai to totangnturu' Puang, nala'bak kamu' jio mai kuasa dosa. 31Iamo joo naden diuki' lan Sura' Allataala kumua, “Ia to tomangpuji, iara la napuji to apa napugauk Puang.”#Yeremia 9:24

Currently Selected:

1 Korintus 1: mvpAD

Highlight

Copy

Compare