MATTHEW 5
5
Jesus Ɔkwɔrɔ Ikɔ Ke Enyɔŋ Obot
1EKEM ke adaŋemi Enye okutde mme otu owo, Enye ɔdɔk ke akamba obot; ndien ke Enye ama ɔkɔsuhɔre etie, mbet Esie etiene Enye: 2Enye onyuŋ atat inua Esie ekpep mmɔ ete,
3 Ɔfɔfɔn ɔnɔ mmɔ eke ebuenede ke spirit: koro Obio Ubɔŋ Heaven enyene mmɔ.
4 Ɔfɔfɔn ɔnɔ mmɔ eke etuaŋade: koro eyedɔŋ mmɔ esit.
5 Ɔfɔfɔn ɔnɔ mmɔ eke enyenede ifure-ifure ido: koro mmɔ eyeda isɔŋ enyene.
6 Ɔfɔfɔn ɔnɔ mmɔ eke ekopde biɔŋ ye nsat-itɔŋ edinen ido: koro mmɔ eyeyuhɔ.
7 Ɔfɔfɔn ɔnɔ mmɔ eke etuade owo mbɔm: koro eyetua mmɔ mbɔm.
8 Ɔfɔfɔn ɔnɔ mmɔ eke esit mmo asanade: koro mmɔ eyekut Abasi.
9 Ɔfɔfɔn ɔnɔ mme anam emem: koro eyekot mmɔ nditɔ Abasi.
10 Ɔfɔfɔn ɔnɔ mmɔ eke owo ekɔbɔde mmɔ kabaŋa edinen ido: koro Obio Ubɔŋ Heaven enyene mmɔ.
11 Ɔfɔfɔn ɔnɔ mbufo ke adaŋemi owo edisuŋide mbufo, enyuŋ enam mbufo isin-enyin, enyuŋ etiŋ kpukpru oruk idiɔk-ŋkpɔ ke nsu edian mbufo kabaŋa Mi. 12Edaresit, edara eti-eti: koro utip mbufo ke Heaven omokpon: koro kpa ntre ke mmɔ ekanam mme prophet emi ebemde mbufo iso edu isin enyin.
13 Mbufo edi inuŋ isɔŋ: edi inuŋ ama akabare adaba, edida nso enam enye enyene inem? ifɔnke aba ke baba ŋkpɔ kiet, ibɔhɔke nditop nduɔk, owo ndidigi ke ukot. 14Mbufo edi uŋwana ererimbot. Obio eke ebɔpde ke enyɔŋ obot ikemeke ndidibe. 15Owo inyuŋ idomoke utuenikaŋ ida abaŋ ifuk, edi owuk ke uwuk-utuenikaŋ; ntem ke uŋwana ayama ɔnɔ kpukpru owo eke edude ke ufɔk. 16Kpa ntre yak uŋwana mbufo ayama ke iso owo, man mmɔ ekut nti utom mbufo, enyuŋ etoro Ete mbufo emi odude ke Heaven.
17 Ekuse ete ŋkedi ndiwuhɔre ibet ye mme prophet; ŋkedige ndiwuhɔre, ndi ndiwuk mma. 18Koro ke akpanikɔ ke ndɔhɔ mbufo, Tutu enyɔŋ ye isɔŋ ebe efep, baba ntɔi kiet mme ekpri ŋkpɔ kiet idibehe ifep ke ibet, tutu kpukpru ŋkpɔ esu. 19Mmɔdɔ owo ekededi eke edibiatde ata ekpri ibet emi kiet, edinyuŋ ekpepde owo efen nditiene mbiat, eyekot enye ata ekpri ke Obio Ubɔŋ Heaven: edi owo ekededi eke edinimde, edinyuŋ ekpepde owo efen ndinim, eyekot enye akamba ke Obio Ubɔŋ Heaven. 20Koro ndɔhɔ mbufo nte Edieke edinen ido mbufo mikanke eke mme scribe ye mme Pharisee, mbufo ididukke ke Obio Ubɔŋ heaven.
21 Mbufo emokop ete, ekɔnɔ mbio eyo oko uyo, ete, Kuwot owo: edi owo ekededi eke owotde owo esesin idem ke ikpe: 22Edi Ami ndɔhɔ mbufo nte, owo ekededi eke ayatde esit ye eyen-ete esie esesin idem ke ikpe; owo ekededi eke ɔdɔhɔde eyen-ete esie ete, Raca (ikpikpu owo), esesin idem ke ikpe Sanhedrin; owo ekededi eke ɔdɔhɔde ete, Afo ndisime, esesin idem ke ufen hell eke asakde ikaŋ. 23Mmɔdo edieke adade enɔ fo edi ke itie-uwa, onyuŋ etide do ete, eyen-ete fo enyene ikɔ ye afo, 24kpɔŋ enɔ fo do ke iso itie-uwa, ka kebem iso nam emem ye eyen -ete fo, ndien di diwa enɔ fo. 25Wara nam emem ye owo-utɔk fo, ke adaŋemi afo odude ye enye ke usuŋ; mbak owo-utɔk fo edida fi ɔnɔ ebierikpe, ndien ebierikpe ayak fi ɔnɔ asaŋutom esop, ndien eduɔk fi ke ufɔk-ŋkpɔkɔbi. 26Ke akpanikɔ ke ndɔhɔ fi, Uduwɔrɔke do, tutu osio akpatre okuk isɔn fo.
27 Mbufo emekop ete, ekɔnɔ owo uyo ete, Kusin efibe: 28edi Ami ndɔhɔ mbufo nte, Owo ekededi eke esede ŋwan ke enyin use ama esin efibe ye enye ama ke esit esie. 29Edi edieke enyin nnasia fo esinde fi ɔduɔ, wubere enye, top, duɔk: koro ɔfɔn ye afo ubak idem fo nditak utu ke ndikpɔduɔk fi ofuri idem ke hell. 30Onyuŋ edieke ubɔk nasia fo esinde fi ɔduɔ, sibe enye, top, duɔk: koro ɔfɔn ye afo ubak idem kiet nditak utu ke ndikpesin fi ofuri idem ke hell.
31 Ekenyuŋ edɔhɔ ete, Owo ekededi eke osiode ŋwan esie ndɔ, yak ɔnɔ enye ŋwed usio-ndɔ. 32Edi Ami ndɔhɔ mbufo nte, owo ekededi eke osiode ŋwan esie ndɔ, ke mitoho ke ntak eridue ye erenowo, anam ŋwan oro akabare edi esin-efibe: owo ekededi eke edinyuŋ ɔdɔde ŋwan oro esiode enye ndɔ, edi esin-efibe.
33 Ŋko, mbufo emekop ete ekɔnɔ mbio eyo oko uyo, ete, Kutomo ŋkpɔ ke nsu, edi nam nɔ Jehovah kpa nte ɔkɔŋwɔŋede. 34Edi Ami ndɔhɔ mbufo nte, Ekutomo baba ŋkpɔ kiet; ekutomo heaven, koro heaven edi itie-ubɔŋ Abasi; 35ekutomo isɔŋ, koro isɔŋ edi udori-ukot Esie; ekunyuŋ etomo Jerusalem, koro Jerusalem edi obio akwa Edidem. 36Kunyuŋ utomo ibuot fo, koro ukemeke ndinam idet kiet akabare edi afia mme obubit. 37Edi yak ikɔ mbufo edi; Edi ntre, ye, Idige ntre: koro se ibede oro oto ke andidiɔk.
38 Mbufo emekop ete ekɔnɔ owo uyo, ete, Enyin ke usiene enyin, ye edet ke usiene edet. 39Edi Ami ndɔhɔ mbufo nte, Ekuŋwana ye anam-idiɔk: edi owo ama oyibi fi ke mfuk nnasia, kabare mfuk eken nɔ enye. 40Owo ama onyuŋ oyom ndikot fi ikpe mbɔ ekpri ɔfɔŋidem fo, yak ekura fo nɔ enye nko. 41Owo ama onyuŋ esin fi asaŋa mile kiet, saŋa iba ye enye. 42Nɔ owo eke ebeŋede fi ŋkpɔ, kunyuŋ udaha ukpɔŋ owo eke oyomde ndibuɔt ŋkpɔ ke ubɔk fo.
43 Mbufo emekop ete ekɔnɔ owo uyo, ete, Ma mbɔhiduŋ fo, nyuŋ sua owo usua fo. 44Edi Ami ndɔhɔ mbufo nte, ema mme asua mbufo enyuŋ ebɔŋ akam eyom ufɔn mmɔ eke enamde mbufo isin-enyin: 45man mbufo edi nditɔ Ete mbufo emi odude ke heaven; koro Enye anamde utin Esie asiaha ɔnɔ mme idiɔk owo ye nti owo, onyuŋ anamde edim edep ɔnɔ ndinen owo ye mme anam ukwaŋ-ido. 46Koro edieke mbufo emade mmɔ eke emade mbufo, nso utip ke enyene? Nte kpa mme publican inamke suk ntre? 47Ndien edieke ekɔmde nditɔ-ete mbufo ikpɔŋ-ikpɔŋ, nso ke enam ebe adaŋa? Nte kpa mme Gentile inamke suk ntre? 48Mbufo efɔn ema ndien, kpa nte Ete mbufo ke heaven ɔfɔnde ama.
Currently Selected:
MATTHEW 5: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.